بێجگە لە ڕەگە مێژوییەکان، ئەم جەنگە لە کورتماوەدا هەم پەیوەستە بە ململانێی هەژمونی ساسی و پاوەنخوازی نێوان کۆماری ئیسلامی و دەوڵەتی ئیسرائیل لە ڕۆژهەڵاتی ناوەڕاست، هەم پەیوەستە بە ململانێی ئابوری و بازرگانی و بازاڕی ئەمڕۆی جیهانی، هەم ململانێ بەرژەوەندی ئابوری و سیاسی و جەمسەرە گەورەکانی جیهان، وەک (روسیاو چین و ئەمەریکاو ڕۆژئاوا).
لە جەنگی نێوان ئێران و ئیسرائیلدا هەمان باوەڕ و ناکۆکی و ململانێی مێژوویی لە کرۆکی ئەم جەنگەدا هەیە، لە سەر هەمان بنەمای شەڕەنگێزی دەرونی مرۆڤە، وە هەمان ئەجنداو عەقڵی داگیرکاری و پاوانخوازی کۆن لە هەردوو دەوڵەتدا بونی هەیە و هیچیان سەر بە بەرەیەکی جیاکراوەی ژیاندۆدۆستی و ژینگە دۆستی و ئینساندۆستی نیین، بۆیە هاوسۆزیبون بۆ هەر بەرەیەکی ئەم شەڕە لە گەمژەیی نزیکمان دەکاتەوە.
شەڕی بە وەکالەت:
لە دوا پێناسەو هەڵسەنگاندنی کورتدا دەتوانین بڵێین ئەم شەڕە درێژکراوەی (شەری بە وەکالەت)ە. شەڕی بە وەکالەت چی‌یە: شەڕی بە وەکالەت کاتێک ئەنجام دەدرێت کە دوو زلهێزی گەورە خەریکی ڕکابەرییەکی ستراتیژین کە نایانەوێت بگەنە دۆخی شەڕێکی ڕاستەوخۆ و فراوان کە ناکۆکی نێوانیان گەشتۆتە بنبەست."
شەڕی بە وەکالەت شەڕێکە کە لە لایەن دەوڵەتێک و چەند دەوڵەتێکی بەهێزەوە وڵاتێکی تر دەدرێت بۆ دروستبونی ناکۆکی و ئاشوبی کۆمەڵایەتی بە دەوڵەتێکی ڕەقیب، شەڕی بە وەکالەت ململانێیەکی ناڕاستەوخۆیە لە نێوان دوو زلهێزی گەورەدا، کە دەوڵەت یان بزووتنەوە بچووکەکان بەکاردەهێنن بۆ ئەنجامدانی شەڕێک لە وڵاتێکدا کە خاوەنی خاکی بەپیت و پڕ لە داهات و سامانی سروشتی‌یە، ئەم جۆرە شەڕە تاکتیکە لە پێناو ئامانجێکی ستراتیژی گەورە، بە پڕۆسەیەکی هێواش‌و لە ڕێگایەکی هەرزانتر و سەلامەت دژ دەوڵەتی ئامانجدار، تا هێدی هێدی بنکۆڵی بکەن و بیڕوخێنن.
شەڕی بە وەکالەت میژوویی قوڵی هەیەو لە هەموو سەردەمەکاندا لە سەردەمی ێۆنانەوە تا ئەمڕۆ لە ڕێگای بەکارهێنانی کارەکتەرێکەوە یان گروپێک، سودی لێوەرگیراوە، بۆ نمونە لە سەردەمی (شەڕی سارد)ا لە ولاتانی ئەمەریکای لاتیندا(کوباو نیکاراگوا...) وە لە ئاسیادا( کۆریای باکور و ڤێتنام و میسرو عیراق) لە لایەن ڕوسیاوە شەڕی بە وەکالەت دروستکراوە، وە ئەمەریکاش لە ئەڤغانستاندا لە رێگای گروپە ئیسلامیەکانی وەک تاڵیبان، ئەمڕۆش ئەمەریکاو ئەوروپاو تورکیاو ئێران لە رۆژهەڵاتی ناوەراستدا لە ئاستی جۆراو جۆردا ئەم جۆرە شەڕەیان دژ بە یەکتر خوڵقاندوەو ئارامی و ئاسایشی ئەم ناوچەیان تێکداوە.
خولی یەکەمی شەڕی بە وەکالەت لە نێوان ئێران و ئیسرائیل:
هەندێ شەڕی بە وەکالەت ستراتیژی و ئامانجدارە بەپێی پلان و بەرنامەیەکی دارێژراو کاری لەسەر دەکرێت، بە چەند قۆناغێک دەست پێدەکات. بۆ نمونە ئەم شەڕەی نێوان ئێران و ئیسرائیل تەواوکاری چەند قۆناغێکی مێژوی‌یە کە چەندین ساڵە تا داگیرکردن و وێرانکردنی شاری(غەزە) و کوشتنی سەرکردەکانی حەماس و حیزبولڵە بەردەوام بوە، بەڵام لە ئێستادا ئەم شەڕ و ململانێ‌یە گەیشتۆتە قۆناغی سەرنەکەوتوی بەرەی کۆماری ئیسلامی، واتا یەکەم خولی شەڕی بە وەکالەتەکانی نێوان (بزوتنەوەی حەماس، حیزبوڵلەی لوبنان، حوسیەکانی یەمەن، گروپە شیعیەکانی عێراق) لە شەڕی دژ بە ئیسرائیلدا شکستیان هێنا.
خولی دووەمی شەڕی بە وەکالەت لە نێوان ئێران و ئیسرائیل:
ئەمڕۆ ئەم شەڕەی نێوان کۆماری ئیسلامی ئێران و دەوڵەتی ئیسڕائیل هەر وەک یاری تۆپی پێی جیهانی گەیشتۆتە خولی پێش کۆتایی، واتا شەڕەکە گەیشتۆتە خولی دووەم، شەڕی وەکالەتی وەکالەت، دەبڵ وەکالەتی هەردوو دەوڵەتی (ئێران و ئیسرائیل)، واتا لە ئاستێکی بەرزتردا.
هەردوو دەوڵەتی ئێران و ئیسرائیل ماوەی (٦) ڕۆژە، بە راستەوخۆیی بە توانایەکی تەکنەلۆژیای سەربازی بەهێزەوە شەڕێکی گەورەو ترسناکیان دژ بەیەک لە رۆژهەلاتی ناوەراستدا دەستپێکردوە.
ئەم شێوازە نوێیەی جەنگ لەبەر ئەوەی بە چەکی تۆقێنەرو بەهێز ئەنجام دەدرێت، بە پێچەوانەی جەنگە کلاسیکیەکانی سەدەکانی پێشوەوە درێژخایەن نی‌یەو کاتێکی زۆر کەمی پێویستە، لە ماوەیەکی کەمدا بە سەرکەوتن و سەرنەکەوتن و دۆڕان و براوە کۆتایی دێت، ئەگەر لە لایەن جەمسەرە گەورەکانەوە پڕ لە وزەو چەک نەکرێنەوە..!
ئامانجی ستراتیژی ئێران و ئەمەریکاو ئیسرائیل:
لە ئێستادا خەون و ئامانجە گەورەکانی ئێران هەموی لە تێكەڵ بە دوکەڵی بۆمبەکان بون، شکستیانهێنا چون بە ئاسمانداو لە هەوادا سڕانەوە، تەنها ئامانجی تاکتیکی و ستراتیژی ئێران مانەوەیەتی لە سەر کورسی حومڕانی..!
بەڵام ئیسڕائیل‌و ئەمەریکا بەردەوامن لە هەوڵ‌و شەڕکردن بۆ بەدەستهێنانی ئامانجەکانیان لە ڕۆژهەڵاتی ناوەڕاستدا، هەرگیز ناوەستن، لە مەودای دور بێت یان لە نزیک دەیانەوێت بگەنە ئامانجی ستراتیژییان.
یەکەم/ پلانی سترایژی :
١/تەسلیم بونی تەواوی کۆماری ئیسلامی ئێرانە بە مەرجە قورسەکانی(ئەمەریکا و ئیسرائیل)، لەم ڕێگایەوە بتوانن ئێران دەستەمۆ بکەن و وەک بوکەڵەیە بە خواستی خۆیان یاری پێبکەن‌و بەکاریبهێنن بۆ گەیشتن بە ئامانجە ستراتیژیەکان. [ئایا ڕابەرانی کۆماری ئیسلامی ئەم مەرجانە لە (شەیتانی عوزما)و هاو بەشەکەی قبوڵ دەکەن..؟!]
٢/ دووەم ئامانجی ستراتیژی (ئەمەریکاو ئیسرائیل) بەدەستهێنان و پاوانکردنی خاکی تەواوی ئێرانە، کە خاوەنی خاکێکی پڕ لە داهات و سامانی سروشتی و بازارێکی گەورەو شوێنێک ناوەندی جیهانی و ستراتیژیە.
٣/ ئیسرائیل‌و ئەمەریکا هەڵگری هەمان ستراتیژی سیاسین، کە دەیانەوێت لە رێگای بچوک کردنەوەی هەیمەنەی هەموو دەوڵەتانی ڕۆژەهەڵاتی ناوەڕاست، کۆسپ‌و ئاڵەنگاریە گەورەکانی سەر ڕێگای بە هەیمەنەکردنی خۆیان تێکبشکێنن و بڕوخێنن،(ئێران و تورکیاش ویستیان هەمان پڕۆسە ئەنجام بدەن، بەڵام شکستیان هێنا).
٤/ئەمەریکا دەیەوێت لە ساتێکی نزیكدا لە ڕێگای لاوازکردن و زەلیلکردنی ئەم دەوڵەتانەوە هەر لەسەرەتای باکوری ئەفەریقاوە تا کۆتایی ڕۆژهەڵاتی ئاسیا بە ئازادی تەراتێن بکات و سەرچاوەی سامانە سروشتیەکان و بازاڕەکانی ئەم ناوچەیە لە دەوڵەتی چین حەرام بکات.
دووەم/ ستراتیژی بێ پلان:
ستراتیژی بێ پلان جۆرێکە لە ململانێی سیاسی کە بەپێی دیفاکۆتۆو بەدیهاتی هەل و مەرج‌و پێشهاتی نوێ‌و چاوەڕوان نەکراو سەرۆکی دەوڵەت بڕیار دەدات، ئەمە خاسیەتێکی شازو تایبەتی هەندێ جەنڕاڵ و سەرۆکە.
ئەم خاسیەتە کت‌ومت لەگەڵ خاسیەتی مەزاجی‌و خاوەن بڕیاری کتوپڕی (دۆناڵد ترەمپ)هاوتاو گونجاوە، کە زۆربە شاهیدی گۆڕین و بڕیاری نوێ‌ی ترەمپین لەسەر پێشهات و گۆڕانکاریە سیاسیەکانی جیهان‌و ڕۆژهەڵاتی ناوەڕاست و جەنگی نێوان ئێستای ئێران و ئیسرائیل.
سەرەتا ترەمپ رازی نەبوە بە هێرشکردنە سەر کۆماری ئیسلامی و دەیەویست لە ڕێگای دانوسانەوە بە مەهامەکانی بگات، بەڵام لە کۆتایی هاتنی ماوەی گفتگۆی دومانگیەکەی لەگەڵ ئێران، ئیسرائیل تاک لایەنە هێرش کردە سەر ئێران و توانی بە ئاسانی کۆمەڵێ سەرکردەی کۆماری ئیسلامی بکوژێت و کۆماری ئیسلامی بلەرزێنێت.
ئەم هێرشەی ئیسرائیل ترەمپی توشی شۆک کرد، زانی کە هێرشکردنە سەر دەوڵەتی ئێران و روخانی کۆماری ئیسلامی زۆر ئاسانترە لەوەی بیری لێدەکردەوە، ئێستا ترەمپ بڕیارەکانی توندترو مەرجەکانی قورستر و قورستر دەکات، بە مەبەستی گەرمتربونی زیاتری ئەم جەنگە تا لە خەونی داگیرکردنی سەرتاسەری خاکی ئێران زیاتر نزیک ببێتەوە..!!
ئەگەر ترەمپ بتوانێت بەم ئامانجە بگات، ئەوا لەم ڕیگایەوە دەتوانێت زەبرێکی گەورەی ئابوری و سیاسی لە هەردوو دەوڵەتی(چین و ڕوسیا) بدات و ڕەوتی گەشەو پێشکەوتنی ئەم دوو دەوڵەتە بەرتەسک بکاتەوەو سنوردار بکات.
بەڵام ئەگەر هاوپەیمانە گەورەکانی وەک دەوڵەتی (روسیا و چین) بەم هەڵوێستەی ترەمپ توڕە ببن‌و ڕازی نەبن کە ئێران بەو هەموو داهات‌و سامانە سروشتیەو بازاڕە گەورەیەوە بکەوێتە ژێردەستی نەیارەکەیان کە(ئەمەریکا)یە، ئەوا لە خولی سێهەمی ئەم جەنگە نزیک دەبینەوە..!!