تەنها و تەنها جارێک، شاندێک، یاخود کۆمەڵێک لە مامۆستایی ئاینی بەئەزموون، کۆمەڵێک لە ڕیش سپی و کەسایەتی کۆمەڵایەتی و خاوەندیوەخان، کۆمەڵێک کەسانی خاوەنپێگەی کۆمەڵایەتی و ئاینی، بچنە لای سەید سیستانی و لەگەڵ ناوبراو دا دۆخی خەڵک و موچەخۆران باسبکەن، یان لانی کەم سەردانی هەندێک لەو ئایەتوڵایانە بکەن کە خاوەنپێگەی گەورەیی ئاینین و گوێیان لێدەگیرێت، بە دڵنیاییەوە ڕەسیدی وەفدێکی لەو جۆرە و دانیشتینیان لەگەڵ مەرجەعی باڵای شیعەکان، دە بار و سەد بار، باشتر و کاریگەرتر دەبێت لەو جۆرە وەفد و شاندانەی کە وەک جەنگاوەرێکی دۆڕاو دەچنە سەر مێز.

بە دڵنیاییەوە وەفدێکی لەو جۆرە، دەتوانێت راستەوخۆ نوێنەرایەتی خەڵک و گرفتەکانی خەڵک بکات و لەڕێگەی مەرجەعێکی لەو شێوەیەوە، کاریگەری لەسەر بڕیارە سیاسیەکان و هەڵوێستە سیاسیەکانی بەرپرسانی بەغدا دروست بکات بەرانبەر بە هەرێمی کوردستان، یان لانی کەم بەرانبەر بە موچەخۆرانی هەرێم کە ڕۆژ لەدوای ڕۆژ دۆخیان خراپتر دەبێت، چونکە ناوبرا مەرجەعێکی باڵا و کاریگەرە و هیچ کەسێک ناتوانێت پاپەندی بڕیارەکانی نەبێت.

لەڕابردووشدا سەردانی لەو جۆرەی دوور لە سیاسەت بۆ لای ناوبراو هەبووە و زۆر خۆشحاڵ بووە بە دیدار و گفتوگۆی لەگەڵ کۆمەڵێک مامۆستایی ئاینی کورد زمان و کۆمەڵێک کەسایەتی دیکەدا..

ساڵانێکی زۆرە کۆمەڵێک دەمووچاوی دووبارە و سواو لە بەرپرسی حیزبی و حکومی، دەچنە بەغدا و دەبێتە هەواڵی بەپەلەی میدیاکان و دەوترێت بۆ پرسی موچە و چارەسەرکردنی کێشەکانی هەرێم و بەغدا لەوێن، بەڵام ڕۆژ لەدوای ڕۆژ و وا زیاتر لە دە ساڵە نە کێشەی موچە چارەسەرکرا و نە کێشەکانی نێوان هەرێم و بەغداش، بە پێچەوانەوە کێشەکان قوڵتردەبنەوە و ژیانی هاوڵاتیان و موچەخۆرانیش گەیشتۆتە ئەو دۆخەی کە هەموومان ڕۆژانە دەیبینین.

بێگومان مەرجەعیەتی ئاینی لای شیعەکان، وەک دەسەڵاتێکی ڕۆحی، لەسەر و هەموو دەسەڵات و بڕیارێکی دیکەوە دەبیندرێت و بڕیارەکانیان قابیلی مناقەشە و ڕەدکردنە وە نیە، بۆیە ئەم جارە دەکرێت لەبری بەغدا، شاندێکی لەو جۆرە سەردانی نەجەف بکات و بزانین لێکەوتە و دەستکەوتەکانی چی دەبێت بۆ ئەو خەڵکەی، زیاتر لە دە ساڵە چاوەڕێی لوتفی دوو حکومەتە.