لە ئێستادا دۆخی ھەرێمی کوردستان لەبەردەم دێوێکی گەورە بوودایە کە ناوی شیعەی عێراقە. دەسەڵاتی شیعەکان جەستەی بەھێزو گەورە بووە، کورد ناتوانێت ھەمان سیاسەتی پێشوو لە عێراق پراکتیزە بکات، شیعەکان سەبارەت بە کێشەی کورد بوونەتە دیوێکی گەورە بەم رەگەزانەی خوارەوە:
یەکەم: داعش تێکشکا، حەشدی شەعبی شیعە چوونە ناو شاری موێڵ کە رەگەزی بەھێزی سوننەیە، ناوچە سونە نشینەکان کەوتونەتە دەست ئەمنیەتی چەکداری شیعە. گەورەترین مەترسیان لەسەر دەسەڵاتی خۆیان تێپەڕاند.
دووەم: کەرکوک و شەنگال و خانەقین و مەندەلی، کەوتنە دەست حەشدی شەعبی شیعەو بەکەمترین زیانی گیانی و ماددی و ماندووبون ئاڵایان لە کەرکوک ھەڵداو لە ٥١% خاکی کوردستانیان کەوتە دەست.
سێیەم: توانیان سەرۆکایەتی وەزیران و دروستکردنی چوارچێوەی ھەماھەنگی نێوان ھێزەکانی خۆیان دروست بکەن و ئیدارەی ناکۆکی ناوماڵی خۆیان بدەن.
چوارەم: شەڕی روسیاو ئۆکرانیا نرخی نەوتی زۆر بەرزکردەوە، عێراق لەروی ئابوریەوە زۆر بەھێزبوو. ملیارەھا دۆلاری لە فرۆشی نەوت دەستدەکەوێت.
پێنجەم: لەشەڕی ئیسرائیل و ئێران و ناوچەکەدا، نەکەوتە ناو شەڕەوەو ئارامی لێ تێک نەچوو. ئەمەش زیاتر سەرنجی ئەمریکاو ئەوروپای راکێشا بۆ ئەوەی پشتیوانی بن.
شەشەم: دادگای پاریس لە قازانجی ئەو بڕیاری داو نەوتی ھەرێمی کوردستانی نەک ھەر راگرت، بەڵکو بڕیاری دا خاوەنداریەتی بەغداد بیکات.
حەوتەم: شکستی ریفراندۆم لە ھەرێمی کوردستان، ریفراندۆم نەک ھەر فشاری لە دەوڵەتی عێراق نەکرد، بەڵکو پشتیوانی بۆ دروستکرد کە زۆر بەھێزەوە پەلاماری ھەرێمی کوردستان بدات، وە ناکۆکی مێژوویی ناو باڵە سیاسیەکانی کوردستانی عێراقی زیندوو کردەوە!.
ھەشتەم: تێکشکانی ھێزی سونە، ئێستا ھیچ حیزب و سەرکردەو بزوتنەوەیەک نیە لەناو سونەکان کە شیعەکان لێی بترسن.
نۆیەم: کە ئیسرائیل پەلاماری ئێرانی دا، پێشبینی دەکرا رژێمی ئێران بڕوخێ و شیعەکانی عێراقیش بکەون، بەڵام کە ئێران نەڕوخا؟ ئیدی کەوتنە خۆیان بۆ ئەوەی بە حساباتی خۆیان بچنەوەو موحاسەبەی ئەوانە بکەن کە پێشبینیەکی وەھایان کردبوو؟؟.
دەیەم: ناردنی نوێنەرو بەرپرسی لاواز بۆ بەغداد، کە خاوەنی ستراتیژو ھێزو بڕیار نین. تەیعەن مەبەستم زۆرینەیە، نەک ھەموی.
ئیدی شیعەکان بونەتە دێوی دەسەڵاتداریەتی عێراق, کێشە گەورەکە ئەوەیە ئەم دێوە دۆستی کورد نیە، بڕوای بە مەرکەزیەت و ناوەندگیری مەزھەبی توند ھەیە، لە قسەو باسی فیدڕاڵی و دەستورو ماددەی ١٤٠ و دیموکراسی و ئەمانە نەک ھەر پەشیمان بوونەتەوە، بەڵکو زۆریش توند دژایەتی ئەم چەمکانە دەکەن.
ئەم دێوە دەیەوێت ھەرێمی کوردستان قوت بدات، گرفتە گەورەکە ئەوەیە حوکمڕانیەتی ھەرێمی کوردستان زەمینەی چاکی بۆ دروست کردووە, چونکە حوکمڕانیەتی ھەرێمی کوردستان لە دیموکراسی و ئازادی را دەربڕین و ئازادی ناوخۆیی پاشەکشەی زۆر کوشندەی کردووە، لەیەکگرتنەوەی ھەرێمی کوردستان خراپتر بووە باش نەبووە، پێشمەرگەو ئابوری و ئیدارە وەک خۆی حیزبی و تەقیلیدیە، بەکورتی ھەرێمی کوردستان وەک ساڵی ١٩٩٢ خەریکی حوکمڕانیەتیە، بەڵام شیعەکان وەک ٢٠٢٥ خەریکی ستراتیژی خۆیانن. بەڵگەش بۆ قسەکانی من ھەر ئەمڕۆ ١/٨/٢٠٢٥ ئەمریکا راپۆرتێکی بڵاوکردەوەو دەڵێ: حیزبایەتی کێشەی گەورەی بەردەم یەکگرتنەوەو بەھێزبوون و بەنیشتمانی بونی ھێزی پێشمەرگەی کوردستانە. ئەمە قسەی فەرمی ئەمریکایە نەک من؟. پێشوتریش پلاسخارت نوێنەری نەتەوەیەکگرتوەکان لە عێراق بەرەوڕووی خۆتان راستگۆیانەو دڵسۆزانە ئاگاداری کردنەوە.
چارەسەر چیە؟
ئەگەر کورد بە دروشم و ھوتاف و بەڵێنی ئەملاو ئەولا، بە فۆڕمی حیزبایەتی بەرتەسک، بە سیاسەتی شکستخواردوی رابردوو، بیەوێت لەگەڵ ئەم دێوە مامەڵە بکات، ئاسان نیە بەرگەی بگرێت. بۆیە گرنگە کورد: دیراسەی تازەی پەیوەندی خۆی و شیعەکان بکات، گرنگە کورد لەگەڵ شیعە زنجیرەیەک گفتوگۆو دانیشتن و دانوسانی تازە دەست پێ بکاتەوە. لەناوخۆی ھەرێمدا رێزو حورمەت بۆ فرە حیزبی راستەقینە، دیموکراسی، ئازادی رادەربڕین، مافی مرۆڤ، کاراکردنەوەو حورمەت گرتنی پەرلەمانی کوردستان, کابینەیەکی نیشتمانی حکومەتی یەکگرتوو. دەستبەرداربوون لەم عەقلیەتەی ئیدارەی پێشمەرگەو ھێز. بەکورتی کورد پێویستی بە سیاسەتێکی تازەی عێراقی ھەیە بەرامبەر سونەو شیعە. کورد بەمجۆرەی ئێستا بەردەوام بێت وردە وردە دێوەکە قوتی دەدات بەڵگەی قسەکانیشم ئەوەیە موچەکەت ئەگەر ئەو نەبێت خۆت ناتوانیت بیدەی؟. کەواتە بەخۆداچونەوەیەکی قوڵی کوردیمان دەوێت لەعێراق دا. ئایا ئەمە لە وزەی پارتی و یەکێتی دا ھەیە؟ یان ھێزو جوڵەو بەرەو کەسایەتی دیکە دێنە بوارەکە؟. ئەمەیان دیوی دیکەی ناوخۆی ھەرێمەو قسەی جیاوازی دیکەی دەوێت. بەڵام راستیەکە ئەوەیە پارتی و یەکێتی و ھەموو بەرەو لایەن و کەسایەتیەکانی دەرەوەی ئەم دوو لایەنە حوکمڕانە، ھەمویان لەبەردەم مەترسی دێوەکەن.