کایەی سیاسی لەھەرێمی کوردستان لەناو دوو تێڕوانین دا گیرۆدە بووە، ناتوانێت بەلایەکدا یەکلابێتەوە، ھەندێکجار لەناو خەڵک و نوخبەشدا گفتوگۆیەک دروست دەبێت، بەڵام ھێشتا نەبۆتە مشتومڕی راستەقینە. 
دوو تێڕوانین ھەیە، یەکەمیان پێی وایە ئەم نەتەوانەی لە قۆناغی رزگاری نیشتمانین‌و نەبوونەتە دەوڵەت، نابێت فرە حزبی بن و تەنھا حزبێکی بەھێزو پێشڕەوی دەوێت کە رابەرایەتی دۆزەکە بکات ھەتا دەگاتە کۆتایی قۆناغەکە، ئەوکاتە بۆ زیندوو ھێشتنەوەی پرۆسەی سیاسی حزب و لایەن و مینبەری سیاسی جیاواز دروست دەبێت و ئیدارەی جیاوازی و ناکۆکیەکانی ناو ھەناوی دەوڵەت و نەتەوە دەکات، نمونە کەمال ئەتاتورک، دەوڵەتی تورکیای دروست کرد ئینجا فرە حزبی دروست بوو. ئەم بۆچونە پێی وایە حزبی پێشڕەو دەتوانێت بە ئاسانی بڕیار دروست بکات، پەرلەمان و حکومەت و ھێزی لایەو پرۆسەی بڕیار بە باشی دەتوانێت گەڵاڵە بکات، نمونە ئەگەر یەک حزبی پێشڕەو ھەبوایە لە ریفراندۆم دەیتوانی ئیدارەی کەرکوک و ناوچەکانی دیکە بکات و حزبێکی تر نەبوو بێ پرسی ئەو رێککەوتن بکات و بڕیار لەسەر ئەم ناوچانە بدات. 
بۆچونی دووەم رێک پێچەوانەیە، بەرگری لەوە دەکات مۆدێلی حزبی پێشڕەو کۆتایی ھاتووە، ئەم جۆرە حزبانە نمونەی وەک بەعسی سوریاو عێراق دروست دەکات و لە جێگای خۆی بۆگەن دەکات، چونکە کەس نیە رکابەرایەتی بکات و مەترسی لەسەر پێگەی دروست بکات، دواجار ھەڵەی مەترسیدار دەکات کە دەیان ساڵی دەوێت ھەتا دێتەوە سەر رێچکەی خۆی، نمونە دەڵێن ئەگەر فرە حزبی و پەرلەمانێکی بەھێز ھەبوایە رێگای نەدەدا ریفراندۆم بکرێت و رایدەگرت و دۆخەکەی بەجۆرێکی تر ئاراستە دەکرد کە زیانی گەورەی لێ نەکەوێتەوە. 
کوردستان خاوەنی حزبی پێشڕەو نیە، بەڵکو خاوەنی حزبی دەسەڵاتدارە، خاوەنی فرە حزبی نیە، بەڵکو خاوەنی ناکۆکی حزبی و فەوزای حزبیە. بۆیە پێویستە ئەم بابەتە گفتوگۆیەکی گرنگی ناو کایەی سیاسی و خەڵک بێت، بۆ ئەوەی کوردستان لەم تونێلە سیاسیە دەرچێت و بەلایەکدا بکەوین.