نەوشیروان مستەفا بۆچی و کەی لە بەشداریکردنی کابینەی هەشت پەشیمان بوەوە؟ (٢- ١٠/ ب٦)

مەحمو رەزا ئەمین
  2020-12-16     1956

کاک نەوشیروان بڕوای بە تێگەیشتنی دیالەکتیکی‌ی جوڵە: بزوتن (حرکة) هەبو. پێ‌ی وا بو هەر شتێ لە جوڵە کەوت ئەمرێ. ئەو ئەی وت، ئاوی مەنگ و وەستاو بۆگەن ئەکا و ئەبێ بە زەلکاو، بەڵام ئاوی جوڵاو ناگەنێ.
لە سەردەمی خەباتی چەکداریا بە وردی ئەم تێگەیشتنەی لە تەشکیلاتی پێشمەرگایەتیا پراکتیکە ئە کرد.
ئەندامانی سەرکردایەتی و کادرە پێشکەوتوەکانی یەکێتی، ئەوانەی لە کاک نەوشیروان نزیک بون، ئاگادارن کە لە دوای کارەساتی هەرکاری‌یەوە، هەر ئەو تەشکیلاتی پێشمەرگایەتی یەکێتی داناوە و دەسکاری کردوە.
سەرەتا ناوی نابون مەفرەزە و قوەت و هەرێم، دواتر مەفرەزە و کەرت و تیپ و مەڵبەند، دوای ئەنفالەکان‌یش هەتا راپەڕین، رەتڵ و بەتالیۆن و لەشکر.
ئەو لە ناونانی هێزەکان و ناوچەکانی چالاکی‌ی پێشمەرگانەدا هەردو لایەنی بابەتی و دەرونی رەچاو ئەکرد.
لایەنە بابەتی‌یەکە پێوەندی‌ی بە زیادکردن و کەمکردنی ژمارە و توانای شۆڕش و پێشمەرگە و فراوانبون و تەسکبونەوەی ناوچەی ئازادکراوەوە هەبو.
لایەنە دەرونی‌یەکەش پێوەندی بە لایەنی دەرونی‌ی تاکی پێشمەرگە و کادرەکانەوە هەبو.
ئەو پێ‌ی وا بو، بۆ ئەوەی پێشمەرگە توشی مەلەل نە بێ لە ناوی هێزەکەی و ناوچەی چالاکی‌ی پێکهاتە عەسکەری‌یەکەی، پێویستە زو زو هەم ناوی تەشکیلەکە بگۆڕدرێ و هەم ناوچەی چالاکی هێزەکان دەسکاری بکرێ.
بە مانایەکی تر، ئەو هەوڵی ئەدا لە توانا و هەبوە دیاریکراوەکانی بەردەستی، هەمیشە جوڵەیەک دروست بکا.
کە بزوتنەوەی گۆڕان‌یشی دروست کرد، باشتر و زانستیانە تر ئامرازە هەبو و سنوردارەکانی بەردەستی، بەکار ئە هێنا.

جارێکیان، کە تازە دو ساڵ بەسەر تەمەنی بزوتنەوەی گۆڕانا تێپەڕی بو، کاک رێبین هەردی و بەندە، لە ماڵەکەی گردی عەلی ناجی، لەگەڵی دانیشت بوین، قسەی بۆ ئە کردین، وتی:
"بە هەمو تەمەنی سیاسی‌ی خۆم بەقەدەر ئەم ٢ ساڵەی ناو بزوتنەوەی گۆڕان قسەم بۆ خەڵک نە کردوە و بەقەدەر ئەم ٢ ساڵە گوێم لە ئامۆژگاری خەڵک نە گرتوە و بەقەدەر ئەم ٢ ساڵە موجامەلەی خەڵکم نە کردوە و بە قەدەر ئەم ٢ ساڵە هیلاک نە بوم و بەقەدەر ئەم ٢ ساڵەش سیاسەتم وەک زانست بەکار نە هێناوە، کە پسپۆڕی‌ی خۆمە".

ئەو لە سەرەتاوە ئەی زانی تواناکانی بزوتنەوەی گۆڕان بە تەنیا، دەرەقەتی گۆڕینی سیستمی حوکمڕانی نایەن. بۆیە بەردەوام لە حاڵەتی بیرکردنەوە و راگۆڕینەوەدا بو، بەردەوام بە هەر چوارلادا ئە جوڵا و لە هەوڵا بو ئامرازەکانی بەردەست بە مەبەستی شڵەقاندنی گۆمەکە و گۆڕین، بجوڵێنێ:
# سەرەتا، هاوپەیمانی‌ی نە نوسراوی لەگەڵ کۆمەڵی ئیسلامی و یەکگرتوی ئیسلامی پێکهێنا و چەن ساڵێک پێکەوە کاریان کرد و پرۆژەی چاکسازی‌یان دا بە دەسەڵات و زۆریان هەوڵ دا، هەردو حیزبی دەسەڵاتدار بە گوێ‌یان نە کردن.
# هاوزەمان، هەمو رۆژانێکی هەفتە، بێجگە لە رۆژانی هەینی، لەگەڵ میدیاکارەکانی گۆڕان بە جیا و لەگەڵ هەڵسوڕاوە دیارەکانی گۆڕان کۆ ئەبوەوە و پرسی رۆژیان مناقەشە ئەکرد و بەرنامەی سیاسی و میدیایی رۆژیان دەسنیشان ئەکرد. هەر کاتێک‌یش پێویستی بکردایە کۆبونەوەی فراوانی رێک ئەخست.
# هاوزەمان، هەمو رۆژانێکی هەینی لەگەڵ رۆژنامەنوسەکانی میدیای ئەهلی، لە ماڵەکەی خۆی کۆ ئەبوەوە و هەر بابەتێ مەبەستی بوایە، ئەی وروژاند بۆ گفتوگۆ.
# هاوزەمان، چ رۆژ چ شەو، هەتا نزیک نیوەشەو، لە ماڵەکەی خۆیا پێشوازی لە هاووڵاتیان: کاسبکار، جوتیار، پیاو ماقوڵ، کەسانی خاوەنی رەئی، نوخبەی عیلمی و سیاسی، دۆست و هاوڕێکانی ئەکرد. گوێ‌ی لە پێشنیار و رەخنەی هەمویان ئە گرت و لێیانەوە فێر ئە بو.
# لە رێگەی وتار و نوسین و چاوپێکەوتن و بەرنامە سیاسی‌یە میدیایی‌یەکانیەوە، رەخنەی وردی ئاراستەی جومگەکانی دەسەڵات ئە کرد و بەرچاوی خەڵکی رۆشن ئە کردەوە و ورەی پێ ئە بەخشین.
# پارلەمانی کوردستانی بەکار ئە هێنا بۆ هەراسانکردنی حیزبەکانی دەسەڵات، بە مەبەستی خاوکردنەوەی رەوڕەوەی گەندەڵی و زوڵم و بێدادی.
# سودی لە ناڕەزایەتی‌یەکانی خەڵک و خۆپیشاندانەکان وەر ئەگرت، بۆ گوشاری زیاتر بۆسەر حیزبەکانی دەسەڵات بۆ چاکسازی. بڕیارەکانی ١ و ٢ی ساڵی ٢٠١١ی پارلەمانی کوردستان بە نمونە.
# پەنای ئەبرد بۆ مامۆستایانی ئاینی‌ی کوردستان و داوای لێ کردن، ئەرکی سەرشانیان جێبەجێ بکەن و بە گژ گەندەڵی و زوڵم و ستەمی دەسەڵاتا بچنەوە. سەردانەکەی مزگەوتی گەورە (٢٧ی ٨ی ٢٠٠٩) بۆ لای مامۆستایانی ئاینی بە نمونە.
# لە رێگەی باڵوێز و کونسوڵەکانی ئەمریکا و ئەوروپا و کەسایەتی‌یە جیهانی‌یەکانەوە، فشاری لە حیزبەکانی دەسەڵات ئە کرد.
# لە دوا قۆناغا، پێش ئەوەی ئیتر لە روی فیزیکی‌یەوە لە جوڵەی سیاسی بکەوێ، هەوڵی دا لە رێگەی بەشداریکردن لە حوکمەت و هاوپەیمانیکردن، جارێک لەگەڵ یەکێتی و جارێک لەگەڵ پارتی، تەرازوی هێز بە قازانجی خەڵکی کوردستان بگۆڕێ. کردیان بە کردەی رەنجەڕۆ.
# نەوشیروان مستەفا هەتا نەخۆشی توانای جەستەیی سنوردار نە کرد، ئاخر کەس بو ئە نوست؛ یەکەم کەس بو بێدار ئە بوەوە و یەکەم کەس‌یش بو ئەگەیشتە گردەکە. ئەو بە سەعات، پێش هەموان ئە کەوت بۆ دەسکردن بە چالاکی‌ی رۆژانە.
# ئەو لە هەڵبژاردنی کاتی گونجاوا بۆ جوڵەی سیاسی‌ی گەورە، پسپۆڕ بو. لە فنجانێکا گەردەلولێکی ئەخولقاند، کەی بیویستایە بە چەن رستەیەک روداوێکی دروست ئە کرد. هەمو دەرکەوتنێکی دەسەڵاتی گەندەڵ و زاڵمی هەرێمی ئە لەرزاند.
لەم وڵاتەی ئێمەیا هەر ئەو ئامرازانە هەبون و بەردەست بون، کە ئەو پەنای بۆ ئە بردن. کورد ئەڵێ: "لەو قوڕە، هەر ئەو تۆزە هەڵەستا".
مەخابن، لە بەدبەختی خەڵکی کوردستان، نەخۆشی زو زەفەری پێ برد و نەی هێشت "پرۆژەی تەمەن"ـی، کە پرۆژەکەی گۆڕان بو، بگەیەنێتە مەنزڵ.
ئەوانەشی جێگەیان گرتەوە، بە کردەوە بۆیان سەلماندین کە، هیچی لێ فێر نە بون. رەنجی فەرهادی نەوشیروان‌یان دا بە با. هەمو ئەو تاکتیک و شێوازی کارکردنەی ئەویان خستە پشتی سەریان و پرۆژەکەیان کردە قوربانی تەماح و بڕێ پۆست و ئیمتیاز. گۆڕان‌یان لە بزوتنەوەیەکی سیاسی- کۆمەڵایەتی‌ی ئەکتیڤ و بزۆزەوە، کردە حیزبێکی پاسیڤی تەقلیدی‌ی بێ کاریگەر و بێ ئیرادە.
ئەو، لە فنجانێکا گەردەلولێکی ئە خولقاند. ئەمان، گەردەلولەکانی ژیانی کۆمەڵی کوردستان ئەهێننەوە ناو فنجانەکە.


کەی لە بەشداریکردنی حوکمەت پەشیمان بوەوە؟
من ٢ جار لەبارەی کابینەی هەشتەمەوە گفتوگۆی دوقۆڵیم لەگەڵی هەبوە:
جاری یەکەم:
پێش پێکهێنانی کابینەکە بو.
لە خانوەکەی گردی عەلی ناجی، لەبارەی چۆنێتی دیاریکردنی وەزیرەکانەوە سەری قسەم لەگەڵ دامەزراند.
پێشنیارم کرد بزوتنەوەی گۆڕان شێوازی پارتی و یەکێتی تێپەڕێنێ و وەزیرەکانی، کەسانی پسپۆڕ و پاک و نیشتمانپەروەری مەسلەکی بن، تەجروبەی بەڕێوەبردنی داوودەزگای فەرمانڕەوایی‌یان هەبێ.
بەم شێوەیە وەڵامی دامەوە:
وتی: "من ئاوات بە رۆژێکی وا ئەخوازم بتوانین بەو شێوەیەی تۆ ئەی ڵێ‌ی، وەزیرەکان دەسنیشان کەین. بەڵام ئەبێ بزانین گیرۆدەی چ رۆژگارێکین!...
وتی: "پارتی و یەکێتی مێژویەکی دورودرێژیان هەیە و چەک و پارە و پێوەندی و هەمو داوودەزگاکانی حوکمڕانی بە دەس ئەوانەوەن. ئەوان کادری حیزبی ئەکەن بە وەزیر و لەناو حوکمەتا بەرگری لە بەرژەوەندی‌ی تایبەتی‌ی خۆیان و حیزبەکانیان ئەکەن...
ئێمەش لەم قۆناغا ناچارین "وەلا" پێش پسپۆڕی بخەین. چونکە ئەگەر وەزیرەکان لەوانە بن تۆ ئەی ڵێ‌ی، ئەوان هەر لەسەرەتاوە ئەچنە بنکڵێشەیان؛ لێیان هەڵەپێچن و رێگەی ئیشکردنیان لێ ئەگرن. جا یان بێزاریان ئەکەن و واز ئەهێنن، چونکە تاقەتی ململانێ‌ی حیزبیان نیە و خۆیان بە مەجبور نازانن ئەو شەڕە سیاسی‌یە بکەن، یاخود بە رێگەی تەرغیب و تەرهیب لە خشتەیان ئەبەن...
وتی: "حوکمەت بوە بە دەسکەلای حیزب و حیزب هەمو جومگەکانی دەسەڵاتی کۆنترۆڵ کردوە. لە هەلومەرجێکی وا و لەناو حوکمەتێکی وایا، کەسی وەلادار نەبێ بەرگەی گوشاری خراپکردن، نا گرێ. بەڵام بۆ پڕکردنەوەی نوقسانی‌ی شارەزایی وەزیرەکان، خۆمان پرۆژەی چاکسازیمان بۆ ئامادە کردون و هەوڵەدەین لەناو وەزارەتەکانیانا جێدەست‌یان دەر خەن...".
ئەو بۆچونە، رەنگە لە لای هەنێ کەس رەواجدار و لە لای هەنێ کەسی کە، بێ رەواج بێ. هەرکامیان بێ، ئەوە جۆری بیرکردنەوەی ئەو کاتەی کاک نەوشیروان بو.
مەخابن، درەختی هەمیشە سەوزی ژیان دەری خست کە، "وەلادار"ـیش خۆی ئە فرۆشێ.
لە کوردستان، "پترۆدۆلار" و "گومرگدۆلار"ـی دەسی بنەماڵە ئۆلیگارشی‌یەکان، کارێکیان کردوە، مەگەر هەر ئەو "وەلائی"ـیانە بەرگە بگرن کە "پەروەردەی خێزانی"ـی تەندروست، "کەرامەت"ـی بۆ کردون بە سەرمایە. ئەگینا سیاسەت بوە بە کاڵایەک لە کاڵاکانی بازرگانیکردن و خۆ دەوڵەمەن کردن.

جاری دوەم:
دوای تێپەڕینی زیاد لە ساڵێک بو بەسەر، بەشداری‌ی گۆڕان لە کابینەی هەشتەما.
عەسرێک، لە ژوری کتێبخانە تایبەتەکەی خۆی لە گردی عەلی ناجی، سەبارەت بە ئەدای حوکمەت و وەزیرەکانی گۆڕان و هەلومەرجی ئەودەمی کوردستان، سەری باسم لەگەڵ کردەوە.
من باسی نمونەیەکی حیزبی سۆسیال دیمۆکراتی هۆڵندا (PvdA)ـم کرد.
وتم، چەن ساڵێک لەمەوبەر وەزیری یەکێک لە وەزارەتەکانی ئەم حیزبە (ئێستا ناوی وەزیر و وەزارەتەکەم بیر نە ماوە)، دوای تێپەڕینی دوساڵ بەسەر دەسبەکاربونیا، رێژەیەکی کەمتری لەو بەرنامەیە جێبەجێ کرد بو کە، حیزبەکەی بۆی دیاری کرد بو. لەسەر ئەوە وەزیرەکەیان گۆڕی... پێ‌یان وت، کەمتەرخەمی‌ی تۆ زەرەر بە حیزب ئە گەیەنێ.
وتم، هەقە بزوتنەوەی گۆڕان‌یش شتێکی وا بکا. چاودێری‌ی وەزیرەکان بکا، ئەگەر بە رێژەی مەعقول، بەرنامەی چاکسازی‌ی گۆڕان جێبەجێ نە کەن، بگۆڕدرێن. ئەگەر ٢ ساڵمان لە ناو حوکمەتا بردە سەر و جێدەسمان دیار نە بو، ئەبێ بیر لە دەرچون لە حوکمەت بکەینەوە، ئەگینا راستگۆیی لەدەس ئەدەین و بۆ هەڵبژاردنی ئایندە زەربەی قورس ئە خۆین.

بەم دو رستەیە وەڵامی دامەوە:
وتی: "بڕوا ناکەم بتوانین ساڵ و نیوێک لە ناو ئەم حوکمەتا بمێنینەوە... رێگە نادەن هیچ چاکسازی‌یەک بکەین. ئەگەر ماینەوە، بە دڵنیایی‌یەوە ئەو تەقییمە ئەکەین بۆ وەزیرەکانمان".
پێشبینی‌یەکەی کاک نەوشیروان هاتە دی. پێش ئەوەی تەمەنی کابینەی هەشت بگاتە ساڵێک و چوار مانگ (١٨ی ٦ی ٢٠١٤- ١٥ی ١٠ی ٢٠١٥)، مەسعود بەرزانی دەرگای پەرلەمانی داخست و وەزیرەکانی گۆڕان دەر کران.
کە دەرگای پارلەمان‌یان داخست و وەزیرەکانی گۆڕان‌یان دەر کرد (١٥ی ١٠ی ٢٠١٥)، کاک نەوشیروان ١ مانگ و ٢ هەفتە بو (٣ی ٩ی ٢٠١٥)، بۆ عیلاج، سلێمانی‌ بەجێ هێشت بو، چو بو بۆ لەندەن. دوری‌ و خراپی‌ی باری تەندروستی ئەو، لەو کاتە دا، کودەتاکەی بە قازانجی پارتی چەسپاند.
دوای کودەتاکەی، پارتی بەسەر شەرعیەتا کردی، لە بەرنامەیەکی تەلەفزیۆنیا وتم، ئەگەر گۆڕان باش ئەم روداوە بەکار بهێنێ، رێوی بە پیرمانەوە هاتوە.
دانی‌ بەیانی‌ی رۆژی کودەتاکەش، بە دوای یەکا، لەگەڵ دکتۆر یوسف بە تەلەفۆن و، لەگەڵ کاک عومەری سەی عەلی و مامۆستا جەلال روبەڕو، قسەم کرد. پلانێکم لەگەڵ باس کردن، ئەگەر جێبەجێ بکرایە، دەرسێکی وای پارتی‌مان دا ئەدا، هەرگیز بیر لە دوبارەکردنەوەی تاوانی وا نە کاتەوە.
دوای ساڵێک لە کودەتاکەی پارتی، وتارێکم بەم ناونیشانە (لە ساڵیادی کودەتاکەی پارتی‌دا... دو بیرۆکە و پێشنیارێکی مرێنراو) لە واڵەکەی خۆما بڵاو کردەوە. باسی هەوڵە بێ ئاکامەکانی ئەو رۆژانەی خۆمم تیا گێڕا بوەوە.


بۆچی نائومێد بو لە بەشداری‌ی حوکمەت؟
ساڵێک و چوار مانگ بەشداری‌ی گۆڕان لە کابینەی هەشتەما، هیچ گۆڕانکاری‌یەکی هەستپێکراوی لە لای خەڵک بە گشتی و لە لای دەنگدەرەکانی گۆڕان بە تایبەتی، پیشان نەدا.
ئەو ماوەیەی بەشداری گۆڕان لە حوکمەت و، ممارەسەی پارتی و یەکێتی لەناو حوکمەتا، گومانیان خستە دڵی کاک نەوشیروانەوە کە لە ئەسڵا تەجروبەی حوکمڕانی‌ی هەرێم و خەباتی پارلەمانی لە کوردستان، چ بایەخێکیان مابێ.

لەو بارەیەوە، دوای تێپەڕینی ساڵێک بەشداری‌ لە حوکمەتا، لەگەڵ هاوڕێکانی دەوروبەری کەوتە گفتوگۆ و، بۆ موناقەشەکردن، چەن پرسیارێکی روبەڕو کردنەوە:
# بزوتنەوەی گۆڕان لەم هەلومەرجەدا چی بکا؟
ئەتوانێ چی بکا؟
چی پێ ئە کرێ؟


هۆی چون بۆ ناو حوکمەت و پەشیمانبونەوە لە چون، لە زاری خۆیەوە:

جاری دوەم کە بۆ عیلاج چوەوە بۆ لەندەن (٤ی ٩ی ٢٠١٦- ١١ی ٥ی ٢٠١٧)، لە ٢٩ی ١٠ی ٢٠١٦ دا، بە تەندروستی‌یەکی خراپەوە، بە وتارێکی ئیرتیجالی دانیشتنی کۆنفرەنسی گۆشەی هەڵسوڕاوانی بریتانیای، کردەوە.

چونی بەو هیلاکی‌یەوە بۆ ئەوەی ئەو وتارە بدا، بەبۆچونی من تۆمارکردنی راستی‌یە بۆ مێژو، نەوەک هاوڕێکانی پاش دوای کۆچی خۆی بیشارنەوە.

لە وتارەکەیا، کە پێم وایە ئەوە دوا وتاری بو، بۆ ئۆرگانێکی گۆڕانی دا بێ، بە رۆشنی نیازی چونە ناو حوکمەت و نائومێدی‌ی خۆی لە تەجروبەی کوردستان دەر بڕیوە.
لە خوارەوە بەشێک لە وتارەکەی، بە دەق ئە گێڕمەوە:
"... بزوتنەوەی گۆڕان لە سەرەتاوە کە دامەزرا، یەکێ لە ئامانجەکانی ئەوە بو، وە داوای ئەکرد، دەسەڵاتی حیزب لە دەسەڵاتی حکومەت جیا بکرێتەوە. بۆ ئەو مەبەستەش ستراتیجێکی دانابو کە، بریتی بو لەوەی چەک و پارە لە دەستی حیزبەکان وەر بگیرێن و تەسلیمی دەستی حکومەت بکرێن... ئێمە بۆ جێبەجێکردنی ئەم ستراتیجە... وەزارەتی پێشمەرگە و وەزارەتی دارایی‌مان وەر گرت...
"... کە باسی چەک و پارە ئەکەین، چەک مەبەستمان هەمو هێزە چەکدارەکانە. بە پێشمەرگە و پۆلیس و ئاسایش و دژەتیرۆر و غەیری ئەوانەوە کە (چەکەکانیان) لە دەسی سەرکردایەتی حیزب دەر بهێنرێ و تەسلیمی دەستی حکومەت بکرێ، حکومەتێک کە دەسەڵاتی حیزبی بەسەرەوە نە بێ...
"... پارەش، یانی هەمو داهات، بە داهاتی نەوتیشەوە شەفاف بێ و بەرەوڕوی وەزارەتی دارایی بکرێتەوە، ئەو سەرپەرشتی بکا...
"... بەڵام ئێستا کە تەجروبەی پارلەمانی لە کوردستانی عیراقا لە بەردەمی تاقیکردنەوەیەکی زۆر سەختایە، ئایا ئەکرێ درێژە بەم وەزعە.. بەم هەلومەرجە بدرێ؟...
"... لە کوردستانی عیراقا قەیرانی سیاسی هەیە، قەیرانی ئابوری هەیە، قەیرانی دارایی هەیە، هەتتا قەیرانی عەدالەت و قانون هەیە.. ئێمە کاتی خۆی ئومێدێکی زۆر گەورەمان بەوە بو کە، ئیتر قۆناغی یەکلاییکردنەوەی ناکۆکی‌یە سیاسی‌یەکان بە چەک کۆتایی هاتوە. لە باتی ئەوەی لە شاخەکانی کوردستان و لە سەر جادەکانی کوردستان بە چەک شەڕ بکەین، لە ناو داخڵی پارلەمانا بە قانون و مەنطق مناقەشە بکەین و ئەو ململانێ سیاسی‌یەی کە لەوەپێش بە چەک ئەکرا، بیهێنین لە ناو پارلەمانا بە قانون بیکەین...
"... # ئایا لە کوردستانی عیراقا پارلەمان ئەهەمیەتی ماوە؟
    # ئایا هەڵبژاردن ئەهەمیەتی ماوە؟
    # دەزگا قانونی‌یەکان و ئەنجومەنی دادوەری ئەهەمیەتیان ماوە؟
    # ئەنجومەنی وەزیران ئەهەمیەتی ماوە؟
بەشداریکردن لەمانا یاخود دەرهاتن لەمانە.. ئەو مەسەلانەن کە ئێستا بە گەرمی لە ناو هەڵسوڕاوەکانی گۆڕان و لە ناو رۆشنبیران و لە ناو خەڵکا مناقەشە ئە کرێن... ئەم گفتوگۆیە لە بەردەمی ئێوەشایە...
"... ئێمە ئومێدێکی گەورەمان بە تەجروبەی پارلەمانی هەبو. ئەمانویست لە رێگەی پارلەمانەوە، ئەو پارلەمانەی هەمانە، بەشێکی جێبەجێ بکەین، لە رێگەی بەشداریکردنەوە لە حکومەتا بەشێکی (تری) جێبەجێ بکەین...
"... پارتی بە قەرارێکی حیزبی پارلەمانی راوەستان، بە قەرارێکی حیزبی وەزیرەکان و کارمەندە پلە بەرزەکانی لە هەولێر دەر کرد. وە بەوە، قەیرانێکی سیاسی لە کوردستانی عیراقا دروست کرد و رۆژ بە رۆژ قوڵی کردەوە...".


ئێستا پرسیاری گرنگ ئەمەیە:
خەڵکی کوردستان بە گشتی و بزوتنەوەی گۆڕان بە تایبەتی چ قازانجێکیان لە تەجروبەی یەکەمی گۆڕان کرد، تا جێگرەوەکانی کاک نەوشیروان بەو حەماسەوە بمانبەنەوە بۆ ناو زەلکاوەکەی دەسەڵاتدارانی ئۆلیگارشی‌ی هەرێم؟

لە ئەڵقەی ئایندەدا هۆی، چونی دوەمجاری گۆڕان بۆ ناو حوکمەت، ئە خوێننەوە.






وتاری زیاتر

زۆرترین بینراو
© 2021 Awene Online, Inc. All Rights Reserved.
×