تورکیاو پارتی‌و پەکەکە ٥- ٦

مەحمو رەزا ئەمین
  2021-07-02     504

ئەردۆگان: داگیر ئەکەم و دیمۆگرافیا ئەگۆڕم!
ئەردۆگان بە بەرچاوی دنیاوە تاوانی گۆڕینی دیمۆگرافیای لە عەفرین جێبەجێ کردوە و بەردەوامیشە/ (1).
رێژەی دانیشتوانی کورد لە ناو شاری عەفرین و دەوروبەری، پێش داگیرکردنی لە لایەن سپای داگیرکەری تورک و جاشەکانیەوە، لە 98- 100% بو.
لە ماوەی کەمتر لە ساڵێکا، رژێمی فاشی‌ی تورکیا ئەم رێژەیەی دا بەزاند بۆ 30- 35%. دوای گۆڕینی دیمۆگرافی‌ی شارەکە و دەوروبەری، دەزگا ئیداری‌یەکانی ناوچەکە کەوتونەتە دەس هاوردەکان و پلانەکەی ئەردۆگان چوە بواری جێبەجێکردن:
هێنراوەکان (مستوطنون) ناویان لە تۆماری شارەوانی‌دا بە دانیشتوی رەسەن تۆمار ئەکرێ؛
تۆمارە کۆنەکان ئەشاردرێنەوە؛
مڵک و ماڵی کوردە دەرکراوەکان ئەکرێن بە ناوی هێنراوەکانەوە.

ئەردۆگانی فاشست بۆ هەڵخەڵەتاندنی عەرەبی ساویلکە، لە فەلەستین بە زارەکی دژی بیناکردنی (مستوطنات)ـی ئیسرائیلی‌یە، کەچی خۆی لە عەفرین بە پەلە خەریکی دروستکردنی (مستوطنات)ە بۆ (مستوطنون)ەکانی سەر بە خۆی.
رژێمی فاشی‌ی تورکیا بە تەنیا لە رۆژاوا و باشور سەرقاڵی گۆڕینی دیمۆگرافی نیە، بەڵکو پلانێکی گشتگیری داناوە بۆ خاڵیکردنی رۆژاوای روباری فورات چ لە ناو تورکیا و چ سوریا، لە کورد. تا ئێستا لە ناو تورکیا توانیوێتی زۆربەی گوندەکانی سەر بە غازی عەنتاب و ئورفە و سیواس، کە هەمویان پوخت کوردنشین بون، رێژەی کوردیان تیا دابەزێنێ بۆ 20- 35%/ (2)

ئەردۆگان بە بێ پەردە، بێ سڵەمینەوە لە کاردانەوەی ناوچەیی و ناودەوڵەتی، زۆر جار بە دەنگ و رەنگ نیاز و مەرامی خۆی لە لەشکرکێشی‌یەکانی بۆ دەرەوەی سنوری تورکیا بەیان ئەکا. کەچی ئەوانەی ئەردۆگان و رژێمەکەی کردونیان بە بەشێک لە ماکینەی جەنگی و پرۆپاگەندەیی دەوڵەتی تورک، بۆ پەردەپۆشکردنی تاوانەکەیان، شەووڕۆژ ئەڵێن و ئەیڵێنەوە: "تورکیا بۆیە لە هەرێمە، چونکە پەکەکە هەیە". کەچی ئەردۆگان بە دەمی خۆی شتێکی کە ئەڵێ.

ئەو لە کۆڕە تایبەتەکانیا ناڵێ سپا ئەنێرم بۆ باکوری عیراق تا پەکەکە لەناو بەرم. بەڵکو ئەڵێ:
"... ئێمە لەوێین بۆ ئەوەی بە سەربازەکانمان ناوچەکە بخەینە ژێر دەستی تورکمانەکانەوە..."
ناوەرۆکی ئەو رستەیە بە کورتی و کرمانجی و رۆشنی، بریتی‌یە لەمە: "گۆڕینی دیمۆگرافیا‌ی باکوری عیراق" کە ئەردۆگان دەمی نای هێنێ بڵێ: "کوردستانی عیراق".

ئەو هەڵمەتەی چەن ساڵە ئەردۆگان بە بەشداری‌ کردارەکی‌ی بنەماڵەی بەرزانی و چەکدارەکانی و جاسوسەکانی لە بادینان دەستی پێ کردوە، وەکو:
قڕکردنی دارستانەکان؛
لەناوبردنی سەرچاوەی ژیانی گوندنشینەکانی نزیک سنوری کوردستانی باکور؛
خۆشکردنی زەمینەی کۆچی بە کۆمەڵی گوندنشینانی ناوچە سنوری‌یەکان؛
دەرکردنی هێزی چەکداری پەکەکە لەو دەڤەرە،
هەر هەموی بۆ ئەوەیە، لە قۆناغی یەکەما ژیان بە یەکجاری لە ناوچەکە ببڕێ. لە قۆناغی دوەما، پشتێنەیەکی تورکماننشین لە نێوان سنوری هەر سێ پارچەی کوردستان: باکور، باشور و رۆژاوا دروست بکا و لێک‌یان دا ببڕێ. ئەو پرۆژەیەی دەمێکە ئەردۆگان خەونی پێوە ئەبینێ و ویستی لە نێوان پارچەکانی باکور و رۆژاوا بە درێژایی زیاتر لە 500 کم دروستی بکا و ئەمریکا و یەکێتی‌ی ئەوروپا و روسیا رێگەیان نە دا، ئەوا ئێستا بە هاوکاری پوازێکی خۆماڵی، لە باشور سەرقاڵی جێبەجێکردنێتی.

کێ ئەڵێ ئەو بۆچونەی سەرەوە خەیاڵ و فەنتازیای نوسەرێکە، بانگی ئەکەم لە دەمی ئەردۆگان خۆیەوە مەرامی لەشکرکێشی‌یەکەی بۆ سەر هەرێمی کوردستان، ببیستێ:
لە سەرەتای مانگی تەموزی 2021 دا، دەیان گەنجی تورکمانی‌ کەرکوک، لە کچ و کوڕ، چون بۆ لای ئەردۆگان. ئەردۆگان قسەی بۆ کردون. قسەکانی بە دەنگ و رەنگەوە بڵاو کرانەوە.
لە خوارەوە، ئەوەنەی پێوەندی بە نیازی ئەردۆگانەوە هەبێ سەبارەت بە مەرام لە وجودی سپاکەی لە هەرێم و عیراق، لەو دانیشتەنە دا بۆ ئەو گەنجەکانەی  کردون، بۆ ئێرە را ئەگوێزم/ (3):  
لە سەرەتاوە گەنجێکی تورکمانی ئەکەوێتە قسە. پێی ئەڵێ: "چاوەڕوانتین بێیت بۆ زیارەتی کەرکوک و موسڵ".
ئەردۆگان‌یش بەم جۆرە یەتە قسە:
"... ھاوكاریمان بۆ توركمانەكان زۆر كەس ناڕەحەت ئەكا. پێیان خۆش بێ یان ناخۆش تا ئێستا و بەردەوام ھەمو ھاوكاری‌یەكی مادی و مەعنەوی توركمانەكان ئە كەین. ئەوە مەعلومە چۆن بە ھەمو شێوەیەكی مادی و مەعنەوی ھاوكاری توركمانەكانین و پێویست ناكا بیڵێم، چونکە برایانی بەڕێوەبەری توركمانەکان ئەوە باش ئەزانن...
"ئۆپۆزسیۆنەكانی ناوخۆی توركیا لەو بارەوە چی ئەڵێن گرنگ نیە. ئەوەی بۆ من گرنگە بەر لەوەی ئێمە بێینە دەسەڵات ھیچ كەس لە توركیا وەھا ھاوكاری‌ی فەلەستینی‌یەکان و توركمانەكانی عیراقی نە كردوە. ئێمە كردمان و بەردەوام‌یش ھاوكاری‌یان ئەكەین...
"تەماشاكەن لە باكوری عیراق ئێمە لە بەعشیقە كەمپی سەربازیمان ھەیە. بۆچی لەوێ كەمپمان كردۆتەوە؟ بۆ ئەوەی كۆتایی بەو زوڵمەی ئەوێ بێنین. كەمپی جیاوازمان ھەیە بۆ ئەوەی ناوچەكە بخەینە ژێر دەستی توركمانەكانەوە، ئەو زوڵمەی لەوێ ئەكرێ بە سەربازەكانمان كۆتایی پێ ئە هێنین. تێكۆشانمان لەوێ بەردەوام ئە كەین..
"... بۆ ئێمە توركیا پێك نە ھاتوە تەنیا لە 780 كم٢، بەڵكو لای ئێمە ھەمو شوێنێك توركیایە(*). بۆیە ھەموو ھەنگاوەكانمان لە فەلەستین و قبرس و باكوری عیراق و ئاكدەنیز ھەموی بۆ ئەو مەبەستەیە...".
ئێستا رۆشنە ژمارەی سەربازگەکانی سپای داگیرکەری تورک بۆچی لە سنوری پارێزگاکانی دهۆک و هەولێر و نەینەوا، رۆژ لە دوای رۆژ، لە زیاد بونە؟
چەن ساڵێک لەمەوبەر قوللە و سەربازگەکانی سپای داگیرکەری تورک لە سنوری پارێزگای دهۆک ژمارەیان لە 20 کەمتر بو، لە ماوەی کەمتر لە 2 ساڵی رابردوا، لە سنوری پارێزگاکانی دهۆک و هەولێر و نەینەوا، گەیشتونەتە زیاتر لە 70!
ئەردۆگان ئەگەر ئەم پیلانەی بۆ بچێتە سەر، ئەو کاتە، هاوکارەکانی لە باشور بەو دەردە ئەچن کە سوڵتان عەبدولمەجیدی یەکەم، لە باکور، بە ئەزدیشێری خائینی شۆڕشی بەدرخان ـی چەشت و کردی بە مەیتەر یان وەکو مستەفا کەمال ئەتاتورک بە خائینانی شۆڕشی شێخ سەعیدی پیرانی کرد، بۆینباخەکەی ستۆلیبین ئەکاتە ملیان.


سەرچاوەو پەراوێز:
1. بۆ ئەوەی بزانی ئەردۆگانی فاشست چی بە سەر عەفرینی داگیرکراو هێناوە، ئەم سەرچاوانە بخوێنەرەوە:
التغییر الدیمغرافي في عفرین بین الصمت الدولي المریب والمأساة التي لا یتخللها بصیص من الامل، بواسطة المرصد السوري، ٣٠ مایو ٢٠٢١
اسیل سلیمان، في اخطر خطوة من نوعها بعد الاجتیاح.. التغییر الیموغرافي في عفرین علی قدم وساق، ترکیا تسجل قیود النازحین علی المدینة رسمیا، باسنیوز، ١٤/١/٢٠١٩
نازحو عفرین بین الحرمان من العودة ومخاطر التغییر الدیموغرافي لمنطقتم، رووداو، ٢٢/٥/٢٠١٨
المحامي عماد الدین شیخ حسن، عین علی التغییر الدیموغرافي في عفرین، لیکولین للدراسات والابحاث القانونیة، المانیا، نیسان ٢٠١٨
آرام حسین، عفرین المحتلة انتهاکات بالجملة وسنوات من التغییر الدیموغرافي، ANFNEWS، الخمیس، ٢٢ ابریل ٢٠٢١
جانو شاکر، المساعدة الانسانیة و"الصدقات" باب لتمویل التغییر الدیموغرافي في عفرین، الحل نیت، ١٤ مایو ٢٠٢١
عفرین تحت الاحتلال (١٤٢) خاص: تغییر دیموغرافي ممنهج یرتقي الی مستوی التطهیر العرقي بحق الکرد (ارقام وحقائق عن التوطین)، خبر ٢٤، ٢٩ ابریل ٢٠٢١
2. تکشف عنە: بالارقام .. هذا ما خلفە التغییر الدیموغرافي الممنهج في عفرین، صوت العراق
3. ئەم ڤدیۆیە و وەرگێڕدراوە کوردی‌یەکەی لە ئەکاونتی فەیسبوکی (Karzan Ali Osman) وەر گیراوە. لە ٥ی تەموزی ٢٠٢١ دا بڵاوی کردۆتەوە.


(*) ئەو دەربڕینە ئاماژەی راستەوخۆیە بۆ خەونی فراوانخوازانە‌ی ئەردۆگان. ئاوەزی نەخۆشی ئەردۆگان هەمو کوردستان بە مڵکی تاپۆی تورک ئەزانێ.


وتاری زیاتر

زۆرترین بینراو
© 2021 Awene Online, Inc. All Rights Reserved.
×