ئەم چەند رۆژەی رابردوو مشتومڕی توند لەسەر پرۆژە یاسای بودجە لە پەرلەمانی بەغداو لەناو سەركردایەتی سیاسی و گرووپ و كەسایەتییە سیاسیەكانیش جدی بوو.
ئێمە كە لایەك بۆ ئەو باسە دەكەینەوە، پێویستە بە مێشكێكی ساردەوە بیر بكەینەوەو رەفتاری لەگەڵدا بكەین، ئەگەر دڵیشمان گەرم بێت نابێتە كێشەكی زۆر گەورە بەڵام ئەگەر مێشكمان گەرم بێت، ئەوا ئاتاری بەسەر پاتارییەوە نامینێت(وەك ئێستا خەریكە كوردستانیش وا لێدەكەین).
لە بنەڕەتدا ئەو هەوڵەی بۆ مامەڵەكردنی بەغدا لەگەڵ سلێمانی بەشێوەیەكی راسەوخۆ درا، هیچ پەیوەندی بە پارتی دیموكراتی كوردستانەوە(وەك حیزب) نییە. بەڵكو پەیوەندی بە سەروەری هەرێمی كوردستان و ئەو حكومەتەی هەرێمی كوردستانە، كە ئەمڕۆ یارو نەیار دۆست و دوژمن لە بیست لاوە گازی لێ دەگرن و برینداری دەكەن، وەك ئێستا دەیبینین ئەم حكومەتە بەدەست چەند گرووپێك كە كوردن برینەكەی خوێناویترە، ئازارەكەشی زۆر لەو ئازارە قورسترە كە دوژمنانی كوردن و لە سەنگەری شۆڤینییەتیدا شەڕمان لەگەڵدا دەكەن و هەمیشە بۆ ئێمەی كوردستانی خۆیان لە كەمین ناوەو ئەوەی پێیان كراوە كردوویانە، چ لە رابردووی زیاتر لە سەد(100) ساڵەماندا، چ لە ئێستاماندا.
ئەو هەموو هەوڵەی یەكێتی نیشتمانی لە چەند رۆژی رابردوودا دای، كە لەكاتی هەر كێشەیەكدا بەغدا راستەوخۆ بودجە بۆ سلێمانی بنێرێت. وا پێدەچێت لە چەند مانگێكی كەمدا كە لەپەنجەی دەستێك تێناپەڕن، یەكێتی وەكوو جاران هاواری لێ هەڵدەستێت و ، داوا دەكات لە رێگای بەغداوە بودجەی پێویستی بۆ تەرخان بكرێت. بێگومان ئەوكات كۆمەڵێك پرسی دیكە دێنە پێشەوە، كە پێویستیان بە وەڵامی راستگۆیانە هەیە. بەڵام پێش ئەوەی ئەو پرسیارانە بێنینە پێشەوە، ئەو پرسیارەم لەلا گرنگە لەو بەڕێزانە(لە كاك بافل و كاك قوبادەوە تا هەموو موریدەكانیان) ی بكەم كە ئێستا ئەوەی لە پەرلەمان روویدا بە سەركەوتن بۆ خۆیانی دەزانن؟!.
سلێمانی لە دوای راپەڕینی بەهاری 1991 لە پێشكەوتنی ئەدەب(بە شیعرو چیرۆك و زمان و...هتد )و هونەر(مۆسیقاو شانۆو ئۆركستراو شێوەكاری و..هتد) بە تەواوی وەستاوە، ئێستاش سلێمانی لەسەر ئەو پێشكەوتنە ئەدەبی و هونەرییە دەژی كە لە ساڵانی حەفتاكان و هەشتاكان بەرهەمیانهێنابوو. یەك ساڵە ئەو دوو برایە(كاك بافل و كاك قوباد) باس لە مەغدووری و فەرامۆشكردنی سلێمانی دەكەن، بەڵام ئەی ئەو 31 ساڵەی پێشوو؟! چیتان بۆ سلێمانی و خەڵكی ئەو دەڤەرە كردووە؟ ئایا رێگاكانی دەربەندیخان و كەلار لەماوەی یەك ساڵدا بوو بە رێگای مەرگ، یان سی(30) ساڵە دارێكتان نەخستە سەر بەردێك بۆیە هەموو رێگاكان تێكوپێك چوون. سلێمانی شەقامەكانی هی ساڵانی پێش راپەڕینە یان نا؟ شەقامەكانی تووی مەلیك و سالم و مەولەوی و...هتد چیان بۆ كراوە؟ ئەی ئەو ماوەیەی حكومەتێك لە سلێمانی هەبوو، كاتێك لە ساڵی 2005 تێكەڵ بە حكومەتی هەولێر بووەوە، چەند ملیار دیناری سویسری قەرزار بوون؟ ئەو پارە بە چی درابوو؟!. ئەی ئەمانە خەتای كێ بوو؟. بن دیوار كەی بە سیستەم كرا؟ لە سەردەمی دوو حكومەتی نەبوو؟! خەڵكی هەولێرتەنیا سەری مانگەكان دەچوون لە كۆیە مووچەكانیان وەردەگرت و دەگەڕانەوە. پرسیارەكان زۆرن و ناشمەوێ زیاتر بچمە ناو زۆر بابەتی دیكە. بەڵام ئەوەی ئێستا گرنگە بیورووژێنین پرسیارێكی زۆر جدییە، پێویستە پێش هەموو كەس كاك بافل و كاك قوباد لێیبكۆڵنەوە، ئەویش ئەوەیە: گریمان دوای چەند مانگێكی دیكە داوای ئەو بەشە بودجەیە دەكەن كە شایستەی سلێمانییە، باشە ئەوكات كاك قوباد كە جێگری سەرۆكی حكومەتی هەرێمی كوردستانە، وەزیفەكەی چی لێ دێت؟ ئایا ئەوكات لە ناو حكومەتدا دەمێنێتەوە؟ ئەگەر مایەوە، چ مانایەك بۆ مانەوەكەی دەمینێتەوە؟ قابیلە ئەوكات بڵێ من جێگری سەرۆكی حكومەتی هەرێمم بۆ ئەوەی خزمەتی شیلادزێ و دێرەلووك و ئامێدی بكەم؟!!. قابیلە بڵێ دەمەوێ لە هەولێرەوە خزمەتی پێنجوین و شارەزوور بكەم ؟! لە كاتێكدا بودجەیە لای حكومەتی هەرێم نەبێت!!. ئێ باشە ئەوكات كاك قوبادو وەزیرو بریكارو تەواوی بەرپرسەكانی یەكێتی لە حكومەت دەكشێنەوە؟ یان دەمێننەوە؟!
ئەگەر كشانەوە، لە ناو پەرلەمان دەبنە ئۆپۆزیسیۆن؟ یان ناكشێنەوەو وەك ئێستا دەمێننەوە، لەكاتێكدا بودجەی دەڤەرەكەیان لە رێگای پارێزگارەوە خەرج دەكرێت؟!
لە هەموو دۆخێكدا، ئەم هەوڵانەی لەم ماوەیە بە دژایەتیكردنی پێگەی حكومەتی هەرێم دەدرێت، زۆر مەترسیدارن، لەبەر ئەوە نا كە پارتی پێی خۆشە یان نا، لەبەر ئەوەش نا ئەمڕۆ یەكێتی چ مەبەستێكی لەو دیوی ئەو بانگەشەو ئەو پلانانە هەیە كە گرتوویەتییە بەر، بەڵكو لەبەر ئەوەی ئێستا كورد لە ئاستی هەموو دنیا شەرمەزارە، كە تاكە نەتەوەیە هێشتا نەبۆتە دەوڵەت، ئینجا ئەمەش كارو كردەوەكانمانە. لەوەش خراپتر دوای چەند مانگێكی دیكەیە كە یەكێتی داوای بودجەی راستەوخۆی لە بەغدا دەكات. ئەو كات پلان و هەنگاوی دیكە دێنە پێشەوە كە كورد دەكەوێتە ئیحراجییەكی زۆرەوە. حكومەتی هەرێم پێگەی لاواز دەبێت. ئاخر راستە ئەمڕۆ سەرۆكی حكومەت لە پشكی پارتی دیموكراتی كوردستانە، بەڵام وەك لە رابردوودا وا بووە، خۆ ئەمە مێژوویەكی نەگۆڕ نییە، سندووقەكانی هەڵبژاردن بڕیار دەدەن كام حیزب سەرۆكایەتی حكومەت دەگرێتە دەست، وەك چۆن لە رابردوودا (فوئاد مەعسوم، كۆسرەت رەسوڵ، بەرهەم ساڵح) لە پشكی یەكێتی بوون و سەرۆكی حكومەتیش بوون. بە داخەوە كارێكی زۆر خراپ بوو كە خۆمان بە خۆمانمان كرد، لەوەش خراپتر ئەو كوردانەن كە بەردەوام رێگای بەغدا دەكوتنەوە، بۆ ئەوەی دژی حكومەتی هەرێم دەنگی خۆیان بە خەزعەلی و ئەوانیتر بگەیەنن. بە راستی ئەمە پەیوەندی بە ئاسایشی نیشتمانییەوە هەیە، پێویستە حكومەتی هەرێم لەمەودوا سنوورێك بۆ ئەم كارە دابنێت، چونكە ئەوە سیخوڕیكردنە لەسەر حكومەتی هەرێم. ناكرێت عەرەبێكی (پێ پەتی بەدوو )مان پێ لە خۆمان باشتر بێت، ئەمە لە رووی ئەخلاقیشەوە كارەساتە.كێشەی دریفوس( Alfred Dreyfus )هەر لەسەر بابەتێكی وەها هەستیار بوو بە قەزیەیەكی جیهانی، گوایا ئەو ئەفسەرە فەرەنسییە زانیاری سەربازی بۆ ئەڵمانیای دوژمنی تەقلیدی فەرەنسای بردووە.
ئێمەی كورد مێژوویەكی تاڵمان لە خۆ خۆری و دووبەرەكی هەیە ، لەسەردەمی پێش ئیماراتەكانەوە تا ئێستا بەردەوامە، بەڵام خەریكە ئێستا زیاتر رەنگڕێژی بۆ دەكرێت و زیانی گەورەتر بەخۆمان دەگەیەنین.