(هەر کەس باس لە ئیحتیاجی خۆی ئەکا، برسی باس لە خواردن ئەکا، لات باس لە پارە ئەکا، دەسەڵات باس لە ئەخلاق وكەرامەت ئەکا..)
" فرۆید "
قسەی وا هەیە ئەتوانین بەراوردی بکەین بە دیاردەیەکی سروشتیی و بیبەستینەوە بە ئینسانەوە، لەم دواییەدا لەگەڵ نەبونی موچە زۆر باس لە " كەرامەت" ئەکرێ وەک بەدیلێک یان ئەڵتارناتیڤێک بۆ موچەو بژێوی خەڵک، هەر بۆیە لەوانەیە لەپڕ دو سەعاتێ لە جیاتی باران کەرامەت ببارێ و برسییەک لە کوردستان نەمێنێ، بەڵام ئاخۆ چ جۆرە کەرامەتێک ئەبارێ و گوزارش لە كام مێژو ئەکات؟ لەوانەیە کەرامەتێک ببارێ تێکەڵ بە تەرزەی "ئاش بە تاڵ" بو بێ و هەورەکەش لە کۆشکی "نیاوران"ی شای ئێرانەوە هاتبێ و میوانە کوردەکانیش چەتریان لەبیرچوبێ...و وشکەساڵی چواردە ساڵییان پێ تەڕکرد!! یان دور نییە سی و شەش سەعات کەرامەت ببارێ وەک شانازییەک بۆ سی و یەکی ئاب و لەگەڵ گەڕانەوەی حەرەسی بۆ بەغا کەرامەتی ئەو بارانە خرابێتە مۆزەخانەی "ناچەمینەوە"!!
داهێنەرانی نوکتەی کەرامەت باش لەوە تێ(نە)یشتون کە دەسەڵات ئەبێ باس لە شتێک بکا کە مەعلوماتی لەسەر هەبێ و هیچ نەبێ گەر لە مەکتەبی و بە زمانی "تورکی"يش بێ شتێکی لەسەر خوێندبێ، هەرچەنە دە جار ئیمتیحان بەن هەر"ڕاسیب" ئەبن... كەی خیانەت بو بە نیشتمانپەروەری ئەوا کەرامەتیش سور ئەکرێتەوەو ئەبێ بە ناوساجی... یان لیستی موچە بە سپێتی بنێرنە بەغاو بە خوشکە طەیف"سێبەر" بڵێن کەرامەتی خۆمان بۆ خۆمان و موچەی خۆتان بۆ خۆتان!! و بڕيارێک دەرچێ هەمو بەیانییەک بە گیرفانی بەتاڵەوە بە یەکتر بڵێن: كەرامەتت باش.
هەڕەشەکانی دەسەڵاتدارنی هەرێم بە حیوارەکەی چەخماخە جواب ئەدرێتەوە کە ئەڵێ:
"...ئەوا تەقانیشت بۆ کوێ ئەچیت..."