داهاتەکەی بۆ دانا غازو شەڕەکەی بۆ ئێمە
هونەر تۆفیق
2020-02-02
ساڵی ٢٠٠٧، حکومەتی هەرێم و داناغازی ئیماراتی کۆمپانیای غازی کوردستانیان دامەزراند. بەپێی ئەو ڕێکەوتنەی نێوانیان، ئاشتی هەورامی‌و نێچیرڤان بارزانی مافی حەصریان داوە بەداناغاز لەهەردوو کێڵگەی کورمورو چەمچەماڵدا گەڕان‌و دەرهێنان و فرۆشتنی غاز بگەڕێتەوە بۆ داناغاز.
ڕۆژانە ٤٠٠ ملیۆن پێ سێجا وەک سەرەتا و ساڵی ٢٠٢٠ ئەو ئاستە دەگاتە ٦٥٠ ملیۆن پێ سێجا غاز لەو کێڵگانەوە داناغاز دەریدەهێنێت و ٧٠٠ تەنیشی بەنرخی داشکاو بەکورد خۆی دەفرۆشێتەوە.
لەپاش ناکۆکی نێوان تورکیا و ئیمارات لەسەر جیاوازی مەزهەبی لەنێوان ئیخوانی و وەهابیدا ، ناکۆکیش دەکەوێتە نێوان هەولێرو داناغازی ئیماراتیەوە.دادگا کێشەی نێوان هەولێر و داناغازی بەسزای ٣ ملیارد دۆلاری هەرێم شکاندەوە لەقازانجی داناغاز. هەرێمیان ناچارکرد هەم پارەی غەرامەکە بدەن‌و هەم داناغاز دەست بەکارەکانی بکاتەوە. ئێستاش مانگانە لەموچەی فەرمانبەرانی هەرێم قەرزی سزاکەی داناغاز دەدرێتەوە.
وەک بەشێک لەپاکێجی ئەو چاکسازیەی حکومەتی نوێ ی هەرێم بڕیارە ئەنجامی بدات، کڕینی ٧٠٠ تەن غازەکەی هەرێم لەداناغاز بۆ ساڵی ٢٠٢٠ خراوەتە تەندەرەوە. برایەکی براگەورە تەندەرەکەی بۆ دەرچووە. ئەمەش بۆتە مایەی ناکۆکی لەنێوان سلێمانی و هەرێمدا.
سلێمانی پێیوایە لەزەمینەکەی ئەودا نەوت‌و غازو کارەبا بەرهەمدەهێنرێت، بەڵام داهاتەکەی دەچێتە خەزێنەی حکومەتەکەی پارتیەوەو دانەوەی قەرزەکانی داناغازیش دەخرێتە سەرشانی فەرمانبەران‌و خەڵکی ئەو ناوچانەوە کە نەوت‌و غازو کارەباکەی لێ بەرهەمدەهێنرێت.
داناغازیش سەیری دیمەنی ناکۆکیەکەی نێوان سلێمانی و هەرێم دەکات . لەلایەکەوە پارەی غەرامەکەی وەردەگرێت و لەلاکەی تریشەوە غازەکەی کورد دەفرۆشێت و شەڕ و ئەزمەی غازەکەش بۆ خەڵکەکەی جێدەهێڵێت!