لە رۆژەکانی بەفرو کڕێوەی شوباتی ٢٠٢٥، کەش و هەوا، چەند پلەیەک لە ژێر سفردابوو، مامۆستایان و فەرمانبەران و هاوڵاتیانی ناڕازیی، بە یەک دەنگ وبە یەک هەڵوێست، لە خۆپیشاندانێکی مەدەنیدا، لەخێمەیەکی نزیک جادەی عەربەت، بۆ رووبەرووبوونەوەی، کاروانی ئەو تەنکەرە نەوتە قاچاخانەی، ئاودیوویی سنوورەکانی دەکرێن، وەک شورایەکی پۆڵاین وەستانەتەوە .
دەنگی ناڕەزایی گەلیان، دەگەیاند بەتاڵانچییەکانی سامانی نەوتی نیشتمان.
دوور لەهەموو بەهاو پێوەرێکی خۆپیشاندان، چەند کەسێکیان بەجلی مەدەنییەوە، رژانە نزیک خێمەو سەرشەقامی مامۆستایان، لەسیناریۆیەکی توندو تیژییدا، بە بەرد، پەلاماری تەنکەرە نەوتە کانیان دا، جامی چەند تەنکەرێکیان شکاند، ئەم کردەوە نەشیاوە، هیچ پەیوەندیەکی بە مامۆستایان و فەرمانبەرانەوە نیە، ئەوەی ئەو سیناریۆو ئاژاوەیان دروست کرد، بۆ ئەوەی بوار بڕەخسێن، بۆ هێزێکی چەکدار، دەنگی ناڕەزایی وهەڵوێستی رەوای مامۆستایان وفەرمانبەران سەرکوت بکەن.
بە چ دەستوورو یاسایەک و رێسایەک، رەوایە ، مامۆستایان و فەرمانبەران و خانەنشینان و هاوڵاتیان ، لە بەر بێ موچەیی وبێ بازاڕیی ، دەبۆیەک نەوت لە ماڵەکا نیان نەبێ . رۆژانە دەیان وسەدان و هەزاران ، تەنکەری قاچاخ ، تاڵان و ئاودیوی سنوورەکان بکرێن؟ .
بە چ یاسا و رێسایەک، رەوایە؟، هێزێک هەڵبکوتنە سەر ئەو مامۆستاو رۆژنامەنووسانە ، بە زەبرو زەنگ و توندوتیژی ، دەست بە سەرکامێراوموبایل و کەلوپەلی میدیایی ، ئەو رۆژنامە نووسانەدا بگرن و ئازاریان بدەن ، چەند مامۆستایەک دەستگیرو دەست بە سەروسەرکوت بکەن ؟.
بۆ خۆپیشاندان و مانگرتن و ناڕەزایی وهەڵوێستی مامۆستایان و فەرمانبەران و هاوڵاتیان ، نا دەستووریی و نایاسایی و ئاژاوە بێت ؟
بۆ رەوایە ، رۆژانە دەیان، سەدان، هەزاران ، تەنکەرە نەوت ، بە تاڵانی و بە قاچاخی ئاودیوبکرێت .
بۆرەوایی بە هێزێکی چەکداردەدرێت ، بە توندوتیژیی و زەبروزەنگ و خۆسەپاندن ،ببن بە پاسەوانی ئەو تەنکەرە نەوتە قاچاخانە و بوا ری یاسایی تاڵانی نیشتمانیان پێ بدرێت؟
ئایا ئەم زەبروزەنگ و توندتیژییەی هێزە چەکدارەکانی حکومەتی هەرێم ، بەرامبەر بە مامۆستایان و فەرمانبەران ، لە( زۆنی سەوز) و(زۆنی زەرد) ، لە( دێگەڵە )ولە( عەربەت )، جینۆسایدی( فیزیکی و بەیالۆجی و ئابووریی ) مامۆستا و پەروەردە و نیشتمان ونەتەوە وکلتوورو زانست نییە؟
سرینەوەی ( یەکەم پیت ویەکەم وشەو یەکەم رستانەی ، وانەی ئەلف و بێ کەی مامۆستا ئەمین باڵداری وانەی مامۆستای کوردیی نییە؟.
لە هەر نیشتمانێکدا ،دەسەڵاتداران، بە سیناریۆی جیا جیا ، لە بەهاو شکۆی کەسێتی (مامۆستا وپەروەردەو خاک و نەتەوە و کلتور) کەم بکەنەوە و بیسڕنەوە ، ئەونەتەوە وکلتورە وئەو نیشتمانە ، لە جەنگەڵستانی پوچگەرایەتیدا ون دەکەن.