جەواڵدڕەکان
عەبدولرەزاق شەریف
2020-11-23 1075
ئەوەی ئێستا لە پارێزگاکانی سلێمانی و هەڵەبجە ئەگوزەرێ ، دەسەڵاتێکی رەهای بنەماڵە و کەسایەتیە سیاسیەکانی هەر سێ حیزبی حوکمڕانە، لە روی دارایی و ئابورییەوە کۆمەڵێ کۆمپانیای بواری جیاجیای پارە پەیاکردنی ناشەرعی و ناقانونی پێیانەوە هەڵواسراو و گرێدراون، ئاوێتەیەکن هاوڵاتی نازانێ و ناتوانێ پیاوی پارەدار، لە سیاسی و حاکم، حوکمدارێتی لە بازرگان و هەموشیان لە مناڵی بنەماڵە سیاسییەکان هاوێر بکات .
لەڕوی هێزی چەکدارەوە، بۆ پارێزگاریکردنی خۆیان و هەڕەشە و خۆ سەپاندن، دەیان دەستە و تاقم و گروپی سەر بەخۆیانیان لە دەزگاکانی هەرێم ( وەزارەتەکانی پێشمەرگە، ناوخۆ، نەوت و دارایی، سەرۆکایەتی هەرێم و ئەنجومەنی وەزیران و ئەنجومەنی ئاسایش )دا هەیە، لە عێراقیش لە ( سەرۆکایەتی کۆمار ، ئەنجومەنی وەزیران ، وەزارەتی دیفاع، وەزارەتی داخلی و مەجلیسی ئەمنی وەتەنی ) لە مەفرەزەی حیمایەوە بۆ فەوج و لیوا هەیانە، سەرباری هەمو ئەوانەش کۆمپانیاکانی پڕچەکی سیکیوریتی تایبەت بە نەوەکانیان داناوە، تێکەڵەیەکن کەس نیە بتوانێ ناوی تفەنگچیەکان و سەردارەکانیان و تەنانەت جلوبەرگەکانیشیان لێکجیابکاتەوە .
لە ڕوی دەسەڵاتەکانی ( قەزایی ، تەنفیزی و تەشریعی )، دەیان ساڵە و بە کاوەخۆ هەمو جومگەکانیان لە کارگوزارێکی قوتابخانەیەکەوە بۆ بەرێوەبەرایەتییەکان، راوێژکار، وەزیر، حاکم و پەرلەمانتارەکان، تۆڕێکی دەربار و خوازەڵۆک و دەسندەخۆریان چنیوە، تەونێکن هێندە ئاڵۆز، قورسە لە ناو ماڵەکانیشیاندا، ئاشپەز و دەرگاوان بە گفت و رەفتار لە حاکم و وەزیر و پەرلەمانتارەکە جیا بکرێنەوە و بناسرێنەوە .
لە روی بوارەکانی ژیانی فەرهەنگی ( میدیا، ئەدەب و هونەر، وەرزش و ...هتد )، دەیان (کەناڵ و دامەزراوە، سەدان رێکخراو، یانە و تیپ ...هتد ) یان بۆ تێکدان و شێواندن و سوکایەتی بە مێژو، شکۆ و شوهرەتی ئێستا ورابردومان لە گەڕدایە، بە شێوەیەک مرۆڤی کورد، گومان لە رابردوی باوباپیرانی خۆی ئەکات و پرسیاری هەقیقەتی رەگەزی ناودارەکانی کۆمەڵی کوردەواری بۆ وەڵام نادرێتەوە .
هەمو ئەو دارودەستەو دەسەڵاتە رەهایانە، کەس و بنەماڵە سیاسیانەی هەرێمی کوردستان قۆرخیان کردوە و بە هێشویی لەگەڵ تۆڕە لێکچوەکان پیادەی ئەکەن، بێ دەزگای لێپرسینەوە و بێ پابەندبونی بەرپرسیارێتی دەستوری و یاساییە، بێ بەرپرسیارێتی شەرعی و ئەخلاقیە .
لە هیچ شوێنێکی سەر تۆپی ئەم زەوییەدا، نە ئێستا و نە لە رابردودا، دەسەڵاتی هاوشێوە بە بێ بەرپرسیارێتی نەبوە و نیە . گەلۆ ئێمە بە تەماو تەمەنا و بە نیازی چی لەگەڵ ئەمانەدا بژین ؟ تا کەی و بۆ کوێ دێوجامەی سەرچۆپی ئەم شین و شاییە بە دەست جەواڵدڕەکانەوە بشەکێتەوە !؟