یەکڕیزی، چەمکێکە لەژێر هەژمونی گوتاری حیزبە دەسەڵاتدارەکانی هەرێمی کوردستانا بەجۆرێک وێنادەکرێت و شێوێندراوە، راستەوخۆ بە کۆبونەوە و رێکەوتنی (پارتی و یەکێتی) یەوە گرێدەدرێت، تەنانەت حیزبەکانیتریش کەباس لەیەکریزی و رێکخستنەوەی ماڵی کورد ...هتد دەکەن، توانج و خەتایەک لەناتەبایی ( پارتی و یەکێتی) دەگرن .
پێچەوانەی زۆر خوێندەواری کورد کە پێیان وایە "هەرکات ئەو دوو حیزبە رێککەوتبن دەستکەوتی گەورە بۆ هەرێمی کوردستان بەدیهاتوە" ، ئەزمونی رێکەوتنەکانیان هەتا بەوەش دەگات کە بەستراتیجی ناویانبرد، سەرەنوێلکی میکرۆبی هەمو ئەو نەخۆشیانە بوە کە تەونی کۆمەڵگە و جەستەی هەرێمەکەیان داغانکردوە .
- نەبونی دەستوری هەرێمی کوردستان .
- بەحیزبی کردنی دەزگای قەزائی و دانانی دادوەرەکان لەرێگەی لق و مەڵبەندەکانەوە .
- سیاسەتی ئابوری سەربەخۆ .
- دابەشکردنی پارەی شیرینی نەوت و داهاتەکەی لەنێوان حیزب و بنەماڵەکانیاندا .
- تێپەڕاندنی یاسای وەبەرهێنان (بەجۆرێک رێگەی بۆ گەندەەڵی گەورە و دەوڵەمەندکردنی ناسروشتی کۆمپانیاکانی حیزب و مەسولەکان) خۆشبکات .
- داگیرکردن و فرۆشتنی هەمو موڵک و ماڵی گشتی خەڵکی هەرێمی کوردستان .
- بەش و دابەشکردنی پێشمەرگە و دەزگاکانی ئاسایش و پۆلیس .
- قۆرخکردنی پەیوەندیەکانی خەڵکی هەرێم بەعێراق و دنیای دەرەوە، لەخزمەتی حیزب و بنەماڵەکانیاندا .
هەمو ئەوانە و زۆر دەردی تریش بەهۆی رێکەوتنی نێوان (پارتی و یەکێتی) یەوە رویداوە .
لەئەنجامدا :
+ توێژێکی فراوانی مەسول و دەسەنەخۆری سەرمایەداری گەندەڵی نانیشتیمانی هەڵتۆقی و پێگەیشت .
+ هەردوو حیزب و هەندێ لە حیزبی حاشیە " کەبانگەشەی یەکریزی و پێکەوەیی " یان بۆ دەکەن گەندەڵ و دەوڵەمەند بون .
+ پارە و داهاتی زۆروزەوەندی خەڵک، وەک سەروەتێکی نیشتیمانی بەڕەش ئاودیوی هەرێمی کوردستانکرا .
+ تیرۆر و تۆقاندن پەرەیسەند و ئازادی نوسین و قسەکردنیش نەما .
+ دەزگاکانی دەوڵەتداری ( قەزا، سەرۆکایەتی پەرلەمان، هەرێم، حکومەت، پێشمەرگە، پۆلیس و ئاسایش )، متمانەیان لای هاوڵاتیان نەما .
+ مێژوی کورد و قوربانیەکانیان لەناوخۆ و دەرەوە خستە ژێر پرسیار و نرخیان بۆنەهێشتەوە " لەگەلێکی کۆڵنەدەر، مافخوراو ، قوربانیدەر و خاوەن مەسەلەیەکی رەوا " لەبیر و بەرچاوی دنیا، بوین بە " گەلێکی مردو، تەمەڵ، شڕەخۆر و بێ قەزاوقەزیە " .
نوسین بیرەوەری ئەجوڵێنێ ....
سەرەتای خۆپیشاندانەکانی هەڤدەی شوبات و گەیشتنی مەترسیدا، وەفدێکی مەکتەبی سیاسی پارتی بەسەرۆکایەتی فازیل میرانی و لای ئێمەش مەلابەختیار لەسلێمانی کۆبونەوە .
( زۆرمان پێوتن و بەقسەتان نەکردین دەبوایە وەک ئێمەتان بکردایە ) .
فازیل میرانی بەم رستەیە کۆبونەوەکەی کردەوە .
مەلا بەختیار لەدەمی وەرگرت و وتی :
ئەوەی رۆیشت رۆی، ئێستا ئێوە بۆ بێدەنگکردنی خەڵکی هەولێر و دهۆک چیتانکرد پێمانبڵێ بابیکەین .
( ئێمە هەرکەس رەخنەبگرێت و قسەمان پێبڵێ دەچینە لای، پێی دەڵێین بۆچی وامانپێدەکەیت، چیت پێویستە پێمانبڵێ بۆت بکەین . بەراستی بۆی دەکەین خۆئەگەر هیچیشی نەویست و بەردەوامی پێدا جاری دوەم دەچینەوە لای و ئینزاری دەکەین کەنابێت بنوسێ و بڵێ گەر هەر نەوەستا سێهەمینجار فیشەکێ دەنێین بەدەمیەوە ) .
خواهەڵناگرێ مەلابەختیار وتی :
هەنگاوی یەکەم و دوهەم ئەتوانین بەڵام بەخوا سێهەم بەئێمە ناکرێت .
بۆیە هەڵەیەکی گەورەیە پێمانوابێت پێکەوەیی و رێکەوتنی ئەم حیزبە دەسەڵاتدارانە ئاشتی و ئاسایش و خۆشگوزەرانی دەهێنێت ! جەوهەری یەکریزی، پێکەوەیی و بڵانسی حوکمداری متمانەی هاوڵاتیە بە دەزگاکانی دەوڵەتداری، دروستکردنەوەی ئەو متمانەیە بەو حیزب و بنەماڵانە ناکرێت کە خۆیان تێکیانداوە، چارەسەری بنەڕەتی راوەستان و یاخیبونێکی گشتیە " عصیان مدنی " بەرامبەر پارتی و یەکێتی، دەکرێت ئەو یاخیبونە کاری بۆ بکرێت، لەرۆژی دەنگدان و هەڵبژاردنی پەرلەمانی کوردستانا وەک کەرنەڤاڵێکی گەورە، پێکەوە هەمو خەڵکی هەرێمی کوردستان بەدەنگی خۆیان ئەم حیزبە حوکمدارانە رەتبکەنەوە و جارێکیتر یەکریزی، پێکەوەیی و بەهێزی کۆمەڵگە بەرجەستە بکەنەوە، یانەخۆ بڵێین :
شەیتان ناوبژیکەریان بێت .