نوتقێکی حەیدەر عەبادی‌و خۆپشاندانەکانی نەوەی نوێ!

مەلا بەختیار
  2022-08-07     782

نەوەی نوێ، دوای چەندین رۆژ بانگەوازی بۆ خۆپشاندان، دوێنێ ئەنجامیاندا. کاریگەری بانگەوازەکەیان و ئامادەیی خەڵك.. با راپرسی لەسەر بکرێ. لەسەر ئەم خۆپشاندانە سێ کاردانەوە سەرنجی ڕاکێشام:

یەکەمیان: ئامادەیی زۆری ئاسایش و پۆلیس و گرتنی دەیان کەس.. لە ناویاندا، پەرلەمانتارانیش.

دوەمیان: کاردانەوەی کونسوڵگەریەکانی بەریتانیا و ئەڵمانیا و لۆمەی گرتنەکانیان کرد.

سێهەمیشیان: رەخنەی حەیدەر عەبادییە بۆ بەرگریکردن لە ئازادی خۆپشاندەران!

بەکورتی.. دانە دانە، ئەم هەواڵ و روداوە شەن و کەو دەکەین. پێشەکی دەڵێم:
بێگومان خۆپشاندانی مەدەنی، مافی مەدەنیانەی هەموو حیزبێك و رێخراوێك و گروپێکە.. تەنانەت هی کەس و کەسایەتیەکانیشە. دیارە، خۆپشاندان تا خۆپشاندان هەیە؛ هی پیشەیی، مەدەنی، فیمینیستی حیزبی، چینایەتی و نیشتیمانیش، هەریەکە لەو خۆپشاندانانە، شوێن و کات و ئامانجگەلی خۆیان هەیە، تێکەڵکردنی شێواز و شوێن و ئامانجەکانی ئەو خۆپشاندانە، زیان بە خەباتی سیاسی- مەدەنی- کۆمەڵایەتی دەگەیەنێ.

ئەگەر نەوەی نوێ ئامانجێتی، ریفۆرمی سیاسی و ئابوری و سیستەمسازی بکات، پێویستبوو لە بەیاننامەیەکدا رونی بکاتەوە و رەزامەندیشی لە حکومەت، لەسەر وەربگرێ. لەبەرامبەر خەباتی مەدەنی وادا، کە ئامانجەکەی پێش وەخت دیاری کرابێ، حکومەت پێویسەتە بە ئاسایی و مافی مەدەنی قبوڵی بکات.

خۆ ئەگەر، نەوەی نوێ دەیەوێ، گوڕانکاری لە حکومەتدا بکرێ، دەبێ ئەمەشیان بە دیاریکراوی باسبکات و تەم و مژ لای خەڵك و حکومەت نەهێڵێ.

بەڵام.. ئەگەر مەبەستیانە، حکەمەت لە رێی خۆپشاندان و فشاری جەماوەریەوە سەراپا بگۆڕن.. یان بروخێنن، لەمەیاندا ئیتر دەبنە ئۆپۆزسیۆنی شۆڕشگێڕ و لە روانگەی حکومەتیشەوە، لە باشترین حاڵەتدا، وەکو نەیاری روخێنەر سەیردەکرێن. نەك وەك ریفرۆمخواز، یان رەخنەگر.. یان چاکساز! دیارە لە بەرامبەر سیاسەت و بڕیاری وادا، حکومەت دەستەو ئەژنۆ دانانیشێت و چاوەڕوانی روخانی خۆی لە سەردەستی دژەکانی ناکات. رێگای پاراستنی دەسەڵات تا رادەی توندوتیژیش، دەگرێتەبەر. دەپرسم: ئایە نەوەی نوێ، ئەو جۆرە خەبات و مافە مەدەنیەکانی پۆلێن کردبوو؟

ئەوەی لام سەیرە، بەرێز شاسوار عەبدول واحید، ئەمڕۆ فەرمویەتی: سلێمانی دەگۆڕین، پاشان هەولێر و شارەکانیتر. ئەگەر ئەمە ئاخاوتنی بەڕێزیانبێ.. هەم هەڵەی تەکنیکی و هەم هەڵەی ستراتیژییە. ئەم چەشنە کەرت کەرت کردنەی بەدی هێنانی ئامانجە جەماوەریەکان، کە گوایە دوای رزگارکردنی شارێك پاشان شارەکانی دیکە، رزگاردەکرێ.. رێك ئەم بۆچونە بە درێژایی مێژوو زەمینەی شکستی خۆپشاندان و سەرکەوتنی حکومەتەکانە .

جگە لەو راستیانە، هاوکاتی خۆپشاندانەکان لەگەڵ خرۆشانی سەدریەکان، هەڵەیەکی کوشندەبوو.

هەمیشە.. لاسای کردنەوە، چ هێ شۆڕشی چەکداریەکان و چ هی خۆپشاندان و راپەڕینەکان، دوچاری شکست بوون و دەبن.

ئەوەی سەدریەکانی بزواندووە، چەند راستیەکە.. ١- باوەڕی مەزهەبی ٢- نەمانی متمانە بە حیزبەکانی دەسەڵات ٣- دژایەتی گەندەڵی.. جگە لە راستیگەلی دیکەش.

کوردستان.. خەسڵەتی خۆی هەیە، کە لە عێراقی عەرەبی جیادەکاتەوە. لێرەدا، مەزهەبگەرایی نەبۆتە ستراتیژی سیاسی، واتا: مەزهەب داینەمۆی دەرونی  جەماوەریی کوردستان نییە. بێگومان لە کوردستانیشدا گەندەڵی هەیە و متمانەی خەڵکیش بە حکومەت لە پاشەکشەیەکی دژواردایە. بەڵام داینەمۆکە مەزهەبی یان هەر داینەمۆیەکی سیاسی- کۆمەلایەتی دیکە لە کوردستان نەبێ.. لاسایکردنەوەی عێڕاقی عەرەبی لە کوردستاندا، کۆپی کردنێکی سیاسی- جەماوەری نەگونجاوە، ئەنجامەکەش دەر کەوت..!!

وەکوتر.. بەو شێوەیە دابەزاندنەی ئاسایش و هێزی پۆلیس، هەروەها گرتنی ئەندامانی پەرلەمان و نوسەر و خۆپشاندەران، دەیسەلمێنێ حکومەت چەند وریای ئەم روداوانەیە.. چۆنیش لای مەبەستبوو، بۆیە زوو بە توندی دایمرکاندەوە، لە کۆتایدا دەڵێین:
نەوەی نوێ چاوەروانی خۆپشنادانی زۆر گەورەتری لە سەرانسەری کوردستاندا، بەتایبەتی لە سلێمانیدا دەکرد، وا دەرنەچوو.
حکومەتیش، وای چاوەڕوانکردووە، خۆپشاندانەکە گەورەتربێ لەوەی کرا، بۆیە هێزی زۆری بۆ دامرکاندنەوەی دابەزاند.. ئەمیش وادەرنەچوو.. واتا: هەردوو لا بەهەڵە چوون.

دەمێنێتەوە بۆچونی بەڕێز عەبادی بۆ پشتیوانی خۆپشاندانی کوردستان.
لە کاتێکدا پێمان خۆشە، عەبادی وای فەرموە. بەلام عەبادی کە بە درێژایی سەرۆکایەتیەکەی، مادەی (140)ی جێبەجێ نەکرد. چارەسەری کێشەی نەوت و گازی هەڵپەسارد. موچەو بودجەی خستە قورگی حوکمرانی مەزهەبگەراییەوە.. هەروەها لە 16/ی ئۆکتۆبەریش، لە بری چارەسەری سیاسی و دەستوری، هەنگاوی بۆ لەشکرکێشی بردوو دەیان پێشمەرگەی شەهید و بریندار کرد. دەیان هەزار کەسیشی ئاوارە کرد. گەمارۆی لە ئەرز و ئاسمان خستە سەر خەلک..
تەنانەت ماوەیەک رێی نەدا بە یەک فرۆکەش لە کوردستان دابەزێت، هەروەها لە سەردەمی خۆی دا ، لە عیراقی عەرەبیدا، یەک کێشەی بنچینەی ئابوری و سیاسی  و خزمەتگوزاری.. چارەسەر نەکرد.. ئەوە پاشماوەکەیەتی لە سێکتەری: کارەبا، سیستەمی تەندروستی، سیستەمی پەوەردە.. ڕێژەی هەژاری و بێکاری ..تاد
سەرۆک وەزیرانێکی ئاوها .. چۆن دەتوانێ لەگەڵ مافی مەدەنی خەلکی کوردستاندا، دیموکراسی بێ؟!

هەتا زووشە.. گیراوەکان ئازاد بکرێن.. بۆ پێگەی حکومەت باشترە.. تا درەنگیش ئازادیان بکەن.. حکومەت زیاتر زەرەر دەکات! بەتایبەتی لەم هەلومەرجەدا، لەسەر ئازادی بیر و ڕا، حکومەتی کوردستان لەرۆژئاوادا لەژێر فشاری سیاسیدایە!

وتاری زیاتر

زۆرترین بینراو
© 2024 Awene Online, Inc. All Rights Reserved.
×