شەڕی مافەکانی سلێمانی بەوشێوەیە ناکرێت

دییە عەلی
  2022-04-24     286

 

ساڵێک و دوومانگ لەمەوبەر لەوتارێکدا بەناونیشانی (کراسێ لەکەرکوک دادورن) نوسیومە لە16ی ئۆکتۆبەردا، ئەگەر بەرگری بکرایە و بەسوک و ئاسانی شاری کەرکوک رادەستی حەشد و سوپای عێراق نەکرایە، کێ دەڵێت، ئێستا دەوڵەت نەبووین؟
کێ دەڵێت دوای چەند سەعاتێک بەرگریکردن، ئەمریکا نەدەهاتەسەرخەت و بۆ هەتاهەتایە کەرکوک دەبووە کوردستانی و ئاوا نەدەسپێدرا بەدوژمن و بەقەد، کەئێستا بۆ ئەوەی یادی نەورۆز بکەنەوە هەزار تەکلیف دەکەن هەتا چەند سەعاتێ بتوانن ئاهەنگ بگێڕن.

یەکێتی ئەوکاتەی کەنەوتی کەرکوک لەلایەن حکومەتی هەرێمەوە دەفرۆشرا، شەورۆژ کارییان بوبوو بەوەی پارتی نەوتی کەرکوک تاڵان دەکات و کەس نازانێ داهاتەکەی بۆکوێیە! ئەمە لەکاتێکدابوو، کە زۆرینەی کەرکوکییەکان شاهیدی ئەوە دەدەن کە ئەو زەمانەی خوالێخۆشبوو(نەجمەدین کەریم(.
پارێزگاری ئەو شارەبوو زۆرترین خزمەت بەو شارەکراوە، لانیکەم سەردەمی زێڕینی خزمەتگوزاری لەو شارەدا بووە.
ئەی ئێستا بۆ ناپرسن نەوتی کەرکوک بۆکوێ دەچێت و کێ دەیفرۆشێت؟ داهاتەکەی چی لێدێت؟
ئەمە دەردە کوشندەکەی کوردە کەهەمیشە دوژمن خۆیەتی و لەبەردەم ئەوانیتردا بێدەنگ و عاقڵ و دەست لەسەر سنگ رادەوەستێت.

ئێستاش دوای ململانێی نێوان پارتی و یەکێتی لەسەر پرسی سەرۆککۆمار، کەهەتا ئێرە شتێکی سروشتی و ئاساییە، بەڵام ئەوەی نائاساییە ئەوەیە جارێکی تر قەوانی دووئیدارەیی و رادەستکردنی سلێمانی بەبەغدا ببێتە ناو ناوەڕۆکی ئەم ململانێیە، کەهیچ گرەنتییەک نییە کە ئەگەر سلێمانیش بەخاک و خەڵک و سامانی سروشتی رادەستی بەغدا بکەیی، بەغدا شایستە داراییەکانی سلێمانی بنێرێت، بۆیە واباشترە ململانێکان نەگاتە ئاستێ کەقەوارەی هەرێم، کەبەخوێن و فرمێسکی رۆڵەکانی ئەم گەلە هاتووەتە بەرهەم هەروا بەسانایی بیخەیتە سات و سەودایەکی هەرزان و دۆڕاوەوە.

لەکۆتایدا دەبێت یەکێتی باشتر لەوە تێبگات، کە بەغدا سیاسەت دەکات و هێزە باڵا دەستەکانی بەغداش ئەگەر ناکۆکییەکانیان زۆر لەهێزە کوردییەکان زیاتر نەبێت ئەوە هیچی کەمتر نییە، بۆیە هیچ گرەنتییەک نییە ئەگەر تۆ هەرچەندە ئامادەی سازش بیت، بەڵام ئەوەی دەتەوێت بەدەستی بهێنیت.
چونکە ئەوە بۆ هەشت مانگ دەچێت هەڵبژاردنە پەرلەمانییەکەی عێراق بەڕێوەچووە، بەڵام دیار نییە کەی حکومەت پێک دێت! هیچ بەهایەکیان بۆ دەنگ و سەنگی هاوڵاتیان نەهێشتووەتەوە، بۆیە کاتێ دەتەوێت هەنگاو بۆ رێککەوتن هەڵبگری دەبێت بزانیت بەرامبەرەکەت چۆن مامەڵەت لەگەڵ دەکات.
ئەسڵەن هەر دیار نییە کێ لە عێراق باڵا دەستە و کێ شایەنی ئەوەیە ڕێککەوتنی لەگەڵدا بکرێت؟ ا
بۆیە ڕێگا دروستەکە ئەوەیە لەبری کارتی رادەستکردنی فشاری سلێمانی هەنگاوی واقیعی و عەقڵانی و نیشتیمانی بنێیت و بەوە هەم روسوری بەردەم خەڵک و خوداش دەبیت.

شوێنی ململانێی سروشتی ئێوە ئەنجومەنی وەزیران و پەرلەمانی کوردستانە، ئەگەر لەئەنجومەنی وەزیران و لە پەرلەمان نەتوانیت مافێک ئەگەر هەبێت و زەوتکرابێت لەسلێمانی وەریبگریتەوە، ئەوە دڵنیابە هەرگیز ناتوانی لە بەغدای وەربگریتەوە، بۆیە هەق نییە شکستی ئیداری سلێمانی خۆتان بکەنە قومار و خەڵکی سلێمانی بەبارمتە بگرن، هەقوایە پێش هەمووان داهاتی ناوخۆ بەباشی بگەڕێننەوە و قاچاخچیەتی لەسنورەکانی سلێمانییەوە بنەبڕبکەن، ئەوکات دەتوانن بەدەنگی دلێری شەڕی سلێمانی بکەن، بەڵام بەم هەمووە شکستە ئیدارییەوە هات و هاوار بۆ سلێمانی تەنیا و تەنیا چەواشەکردن و گەوجاندنی خەڵکە و خەڵکیش باش دەزانێ ئەم کارە ئەنجامێکی نییە.

زۆرترین بینراو
© 2022 Awene Online, Inc. All Rights Reserved.
×