ڕووخانی بەشار ئەسەد و هەڵاتنی بۆ ڕووسیا لە مانگی کانوونی دووەمی ٢٠٢٤ بە خاڵی وەرچەرخان لە پێشهاتەکانی ڕۆژهەڵاتی ناوەڕاست دادەنرێت. سوریا، وەک یەکێک لە هاوپەیمانە ستراتیژییەکانی ئێران، ڕۆڵێکی گرنگی هەبوو لە دەستەبەرکردنی نفوزی تاران لە ناوچەکەدا. بە ڕووخانی ڕژێمی ئەسەد، ئێران یەکێک لە پردی پەیوەندییەکانی لەگەڵ دەریای ناوەڕاست و حیزبوڵڵای لوبنان لەدەستدا.
لەسەر ئاستی ناوچەیی ئەم پەرەسەندنە دەتوانێت گۆڕانکاری لە هاوسەنگی هێزدا بهێنێتە ئاراوە. هەروەها وڵاتانی وەک سعودیە، تورکیا و ئیسرائیل هەوڵی پڕکردنەوەی بۆشایی دەسەڵات لە سوریا دەدەن.
بۆ ئێران، لەدەستدانی سوریا بە واتای کەمکردنەوەی نفوز لە ناوچەکە. ئەم لەدەستدانە لەگەڵ تێچووی ئابووری و سەربازیی بۆ پشتیوانی لە ڕژێمی ئەسەد، فشاری زیاتر دەخاتە سەر تاران. هەروەها ستراتیژی ناوچەیی ئێران دەخاتە ژێر پرسیارەوە و زەمینە بۆ بەهێزکردنی ئۆپۆزیسیۆنی ناوخۆی ئێران زیاتر دەکات.
هەروەها زلهێزه جیهانییەکانی وەکو ئەمریکا و یەکێتی ئەوروپا ڕووخانی ئەسەد به دەرفەتێک بۆ کەمکردنەوەی نفوزی ئێران دەزانن. هاوکات ڕوسیا بە قبوڵکردنی ئەسەد و بنەماڵەکەی دیارە دەیەوێ کاریگەری خۆی لە سوریا بپارێزێت، تەنانەت لە ئەگەری گۆڕینی ڕژێمیشدا.
لەم هەلومەرجەدا و بۆ قەرەبووکردنەوەی ئەم پاشەکشەیە و درێژەدان بە سیاسەتی ڕووبەڕووبوونەوەی زیاتر دژی وڵاتانی کەنداو یان ئیسرائیل، ڕەنگە ئێران لە عێراق، یەمەن و لوبنان نفوزی خۆی بەهێزتر بکات. بەڵام ئەم پرۆسەیە دەشتوانێ هەنگاو بە هەنگاو بەرەو لاوازبوونی پێگەی ئایەتوڵڵا خامنەیی و ئێران ببات؛ ڕووخانی ئەسەد تەحەدایەکی جیددییە بۆ تاران و دەکرێ بشبێتە سەرەتای گۆڕانکاری زیاتر لە ڕۆژهەڵاتی ناوەڕاست.
پێشهاتەکانی ڕۆژهەڵاتی ناوەڕاست دەشبێتە هۆی نەمانی ئەو پشتێنە پارێزەرە یان هیلالەی کە سوپای قودس وەک هەڵبژاردەیەکی ستراتیجی بۆ پاراستنی دەسەڵات لە ئێران هەڵیبژاردبوو، ئەمەش تەحەدای جیددی بۆ دەسەڵاتداران لە ناوخۆی ئێراندا بەدوای خۆیدا دەهێنێت، هەرچەندە پێشتر بەرپرسانی حکوومەتی ئێران ڕایانگەیاندبوو کە ئەگەر شەڕ لە سوریا ڕووبدات و ئەگەر لوبنان و هتد لەدەست بدەن، پێویستە خۆیان لە تاران مەحکەم بکەن و شەڕ بکەن.