فەرەنسا، لانكێكی هەرە كاریگەری شۆڕشی دیموكراسی؛ ئازادی؛ برایەتی؛ یەكسانییە. لەڕاستیشدا، لە هەشتاكانەوە، بەتایبەتی لە كیمیاباران كردنی كوردستانەوە، فەرەنسا لە وڵاتە یەكەمەكانی رۆژئاوا بوو، پشتیوانی كوردی كرد. بەتایبەتی لە حوكمڕانی سۆسیالیستەكاندا. سەرۆك میتران‌و خانمەكەی.. پێشەنگ بوون. روسیاو چین، لەدواوەی وڵاتانی جیهان بوون رەخنەیان لە تاوانی كیمیاباران گرت!!

لە پشتیوانی فیدراڵ‌و زیاتریش، فەرەنسا، رۆڵی هەبووە. لە شەڕی داعشیشدا هەروەها. لەگەمارۆی ئابوری سەپێنراوی سەر كوردستانیشدا، دوای ریفراندۆم، فەرەنسا یەكەمین وڵاتە دەرگای بۆ سەرۆكی حكومەتی كوردستان كردەوە. دوای فەرەنسا، وڵاتانی تریش دەرگایان كردەوەو ئەمەش كاریگەری زۆری بۆ هەڵگرتنی گەمارۆی سەر كوردستان هەبوو.

بەداخەوە، لەم وڵاتە جوانەی دیموكراسیدا، ئەمە دوەمین جارە، دڵسۆزانی كوردستان بە كاری تیرۆریستی شەهید دەكرێن. جاری یەكەم ساڵەها پێشتر ساكین‌و هاوڕێكانی.. ئێستاش ژنێك‌و دوو پیاوی بێ‌گوناح. بەم تاوانانە، پۆلیسی فەرەنسا كەوتۆتە ژێر پرسیارو گومان؟!

بۆچی لە پاریسی پایتەختی روناكی‌و جوانیدا، لەناو سەدان گەڕەك‌و هەزاران كۆڵان‌و بازاڕدا، خڕ خڕ رەگەزپەرستێك پەلاماری، كۆڵان‌و چایخانەیەكی كورد نشین دەدات؟

ئایا، ئەوەی بەسەر كورد دێ‌‌و لەهەموو مافێك بێبەش كراوە، بەس نییە، نۆرەی ئەوەمانە فاشیستە نوێكانیش پەلامارمان بدەن‌و زوخاوی ستەمكاری لە تاراوگەدا، دەرخواردمان بدەن؟!

حكومەتی فەرەنسا.. بەرپرسیارە، رەگ‌و ریشەی ئەم تاوانە، بەڕاشكاوی‌و بەڵگەوە رابگەیەنێ‌. ئەو بازاڕەش.. هەقە شارەوانی (10) بەناوی ئەم سێ‌ شەهیدەوە بنێت. هەتا وەكو رەمزی تاوانی فاشیەتی نوێ‌، لەمێژووداو لە یادەوەریدا بمێنێتەوە.