رۆڵی سەرکردە  سیاسییەکانی کورد، لەئەزموونی  دیاریکراوی نێو حیزبەکان و پەرلەمان و حکومەتی ھەرێمی کوردستان، لە نێو  کایەو ئۆرگانە جیا جیاکانی دەسەڵات، رووبە رووی  دەیان  قەیرانی  چەق بەستووی ئالۆز بوونەتەوە.

ئەرکی پسپۆرەکانی بواری مێژوویی و کۆمەڵناسی و دەرونییە، لەھەموو ئەو بوارانەدا، بەدواداچوون و لێکۆڵینەوەو تویژینەوە ئەکادیمی وردو قوڵی لەسەر بکەن، بۆ ئەوەی سنوورێک  بۆ ئەو برینە موزمینە، تراژیدیانەی مێژووی دوورو نزیکی ئێستای سەرکردایەتی  کورد دابنرێن.

سەرکردەکانی کورد، بەھەموو بیرو بۆچونە جیا جیاکانی چەپ و راست و ئیسلامی سیاسیی، لەحیزبی کوردی و پەرلەمان وحکومەتی ھەرێم .

 ئەو روخسارانەن، بەپلان وبەرنامەی نەخشەی داڕێژراو، بۆ مانەوەی ھەتا ھەتاییان لەدەسەڵات، کۆنترۆڵی ھەموو کۆیلەکانی دەوروبەریان و ئۆرگانەکانی  حیزبیان کردووە، ھەموو کایەکانی  پەرلەمان و حکومەتی ھەرێمیان بەدەسەڵاتی نەرجسی و تاکڕەوانە یان ئیفلیج کردووە . 

لەسەردەمی شاخ و شۆڕش و پێشمەرگایەتیدا، چەند سەرکردەیەک، خاوەن بڕیار بوون، ئەوان چەندان گروپی دیاریکراویان وەک سێبەر، لەدەوری خۆیان دروست کرد بوو، ئەو گروپانە توتی ئاسا، ھەموو بڕیارەکانی ئەوانیان جێبەجێ دەکرد.

دوای راپەڕین و ھەڵبژاردنی پەرلەمان و حکومەتی ھەرێمی کوردستان، ئەو سەرکردەو روخسارانەی شاخ و ئینیھازی نێو شارەکان، بەھەمان ئەزمونی شاخ و بەعەقڵی دیاریکراوی مەزاجیانەی خۆیان، کۆکتێلی عەقڵی خێڵەکی و ئیسلامی سیاسیی، خۆیان لەھەمووکۆنگرەکاندا، خاوەنی دەنگی پێش ھەڵبژاردن بن، خاوەنی حیزب و خاوەنی دەنگی خەڵک و پەرلەمان و حکومەت و سامانی نیشتمان بن .

ئەو سەرکردانە، نیازیانە وەک ئەوساو ئێستا، دەستاو دەستی  دەسەڵات، بۆ کوڕو کچەکانیان بێت و ئامێری بەرژەوەندییەکانی داگیرکەرانی نیشتمان بن، دژ بەنەتەوەو نیشتمانەکەیان.
   
 ستراتیژی  ئەم سەرکردانە، بەعس ئاسا، گەر ھەر تاکێک، پەروەردەیەکی جوان و نمونەیی بێت، خاوەنی ئیرادەیەکی بەھێزو بە ھەڵوێست بێ، خاوەنی راوبۆچونی  لۆژیکانەی زانستی بێ، ئەوان ھەموو دەرگاو پەنجەرەکانی ئاسمان و زەوی ئەم نیشتمانەیان لێ دادەخەن، بواریان پێنادەن، رۆڵی خۆیان ببینن، پاشقولیان لێدەگرن و دەیانخەنە پەراوێزەوە.

ئەو سەرکردانە بەدرێژایی مێژوو تا ئێستا، بەدوای کەسێتی لاوازو توتی و کاسەلێس و ماستاوچی و پەڕپوتی ئاست نزمدا دەگەڕێن، زۆربەی  ئۆرگانەکانی  حیزب و کایەکانی پەرلەمان و  حکومەتیان  پێ پڕدەکەنەوە.

پلان و بەرنامەونەخشەکانیان،  بە جۆرێک  دارێژراوە، بوار نادەن، ھیچ  ئەلتەرناتیڤ وەک سەرکردە، لە ناو حیزب و ھیچ پسپۆرێکی  نمونەیی بەتوانا، لەپەرلەمان و  حکومەت، رۆڵیان  ھەبێت و بوونی  پسپۆڕی خۆیان  بسەلمێنێت.

ئەوسەرکردانە، دەبێ خۆیان و ئەندامانی خانەوادەو  بنەماڵەکانیان، سەرکردەی حیزبەکان و پەرلەمان و حکومەت بن،  نەخۆشی گرێ سایکۆلۆجی کورسی  دەسەڵات و تاڵانی  سامانی  نیشتمانن.

دەبێ ژیانی  ئەو سەرکردانە بە کوڕو کچ و خانەوادەو بنەماڵەنەکانیانەوە، لەو رۆژەوە لەدایکبوون،  تا ئەو ساتەی دەیانخەنە قەبرەوە، لە گەڵ ھاوڵاتیان  ئاسمان و رێسمان بێت، لەمردنیشدا تارمایی کۆشک و گۆڕەکانیان لەشوێنی  جیاوازو تایبەتی  بێت.