یەک ھەرێم، یەک حکومەت، یەک پەرلەمان و یەک ھێزی پێشمەرگە ... ئەو چوار پرەنسیپەن کەسەرۆکی پارتی دیموکراتی کوردستانی خاوەن زۆرینەی پەرلەمانی، بۆ حوکمداری کابینەی نوێ رایگەیاند .
ھەرچواریان، چوار چاڵی شێرپەنجەیی موزمینی چارەکە سەدەیەک ژیان و تەمەنی حوکمڕانی ھەرێمی کوردستانە، بەویست و بەرنامە و دەستومەچەکی (پارتی خۆی و ھاوپەیمانەکانی) چێکراون و ھەڵکەندراون، خەڵکوخوای کوردستانیش لەچاوەڕوانی چارەسەردابون، نەکرا و بێچارە ماونەتەوە .
پارتی و یەکێتی، ھەمیشە رێککەوتن، پێکھاتن، ئاشتی و تەنانەت شەڕی نێوانیشیان بەویست و داوا و نێوەندگیری بێگانە بوە ! ئەو چوار خانە شێرپەنجەییەش ھەر دەستکرد و دڵخوازی ئەوان بوە ! جارێکیتر چەندبارە حوکمداری ھاوشێوە بۆ کابینەی ئایندە ( ھەمان تاس و حەمام ) پرەنسیپەکانی بارزانی ئەکاتە بڵقی سەرئاو، زامنێکیش نیە فەوت و فەنابونیشی بەدوایا نەیەت .
لەکۆبونەوەکانی گفتوگۆی پێکھاتن و بەشکردنی پۆستەکانی سەرۆکایەتی پەرلەمان، ھەرێم و ئەنجومەنی وەزیراندا، ھەمیشە پۆستی سەرۆکایەتی عێراقیش ئامادەیە، وەک عورفێکی سیاسی بۆ شاری سلێمانی و یەکێتی نیشتیمانی ئەو سەرۆکایەتیە یەکلا بۆتەوە، بۆیە گەر بەشدار و ھاوبەش یان برابەشیش بن ! یەکێتی ھەر دوانی لەو چوارە پێدەبڕێت، ھەر چوار پرەنسیپەکەی باڤڵی سەرۆکیش ( ھاوسەنگی، راستکردنەوەی حوکمڕانی، فەوتی دەسەڵاتی خۆسەپێن و ناروونی داھاتی ھەرێم ) وەک چارەنوسی چوار پرەنسیپەکەی سەرۆکی پارتی بەسەردێت و فەوت و فەنابونیش ئایندەیەکی ئامادەتر ئەبێت .
قورسترین ئەرک و ھەوڵەکانی پارتی و یەکێتی بۆ جێبەجێکردنی بەڵێن و پرەنسیپەکانیان (بۆ یەکێتی زیاتر لەپارتی) بەجیا کۆکردنەوەی " یەک و نیوەیە " لەم حاڵەتەیا (نەوەی نوێ) سەنگ و قورسایی راگرتنی تەرازوی ھاوکێشەکەیە . ئەگەر بەراستی ! بۆ یەکەمجار بەدڵسۆزی خاوەنی بەڵێنی خۆیانن ؟ نەم بەتەنگ ژیان و مانەوەی خەڵک و خاکی کوردستانەوەن !؟ پێویستە ھەریەک لای خۆیەوە لەھەوڵی جێبەجێکردنی ئەو ئەرکە قورس و گرانەدا بێت و ئەویتریش قەبوڵی ھاوبەشی و کەمبەشی دەرئەنجامەکانی بکات .
ئاشکرایە (نەوەی نوێ) بەستونی و ئاسۆیی، لەھیچ جومگەیەکی دەسەڵاتی جێبەجێکردنا نەبون و نین، ھەر دوو چوار ئامانجەکەی دوو سەرۆکی پارتی و یەکێتیان وەک پرەنسیپ، لەرێککەوتنێکی کۆنکرێتیا، بەچاودێری زۆرینەی پەرلەمانی قەبوڵە، مەرجی ئەوەڵ و ئەخیریشیان وەرگرتنی دەسەڵاتی یەکەمی جێبەجێکردنی ھەرێمی کوردستانە .!
بە پێی شوناس و ناسینی پارتی و یەکێتی، لای خۆیان و خەڵکی کوردستان، رادەستکردنی پۆستی سەرۆکی ئەنجومەنی وەزیران بۆ نەوەی نوێ، خەیاڵ و کاری نەکردەیە بەڵام لەدنیای حوکمڕانی و پەرۆشی بۆ نیشتیمان و پرۆسەی دروستی حوکمڕانی ( لەپێکنەھاتن و قەبوڵنەکردن ) ی دوو ھێزی یەکەمدا، ئاسانترین رێگە پەنابردنە بۆ ھێزی سێیەم و تەنانەت چوارەم و پێنجەم و ھەتا کەسی تەکنۆکراتیش ... ئەزمونی حوکمڕانی پێشوی ئەوانیش سەلمێنەری ئەو راستیەیە کە بەھێزی سێیەم نەبێت بەخۆیان ناکرێت و تونێڵێکی تاریک رێی بەردەبازیانە ..!
کاتێک بەرنامەیەکی گشتویست و گشتگیری خزمەتکردن و مانەوەش مەرج و ئامانجی ھەموان بێت ! ئیتر عینادی و پاوانکردنی پۆست و دەسەڵات بۆ خزموخوێش سەرەخۆرەیە، جگە لەمانەوەی کیانی گیانێکی داڕزاوی لێواری سەرەمەرگ ھیچیتری لێ سەوز نابێت .
لەدنیادا، دەیان نمونەی لەمجۆرە بۆ پاراستن و دەربازکردنی قەوارەی سیاسی پیادە کراوە، سودانیەکەی سەرۆکی حکومەتی ئێستای عێراقی فیدراڵ، نزیکترین و زیندوترینیانە .