" ٨ "
بەیانی ئەو شەوەی مامجەلال جەڵدەی مێشک لێیدا، زۆری سەرکردەکانی یەکێتی، لەمەکتەبی سیاسی و لەژورەکەی حاکم قادر کۆبونەوە . هێرۆخان و ئەوانەی لەبەغدا نزیکی ئەو بون وەڵامی هیچ پەیوەندییەکیان نەئەدایەوە، ئەمانەی سلێمانیش، کەسیان نەیاندەزانی چی رویداوە، بۆ هەر هەواڵێک وەک هەموان، گوێبیستی راگەیاندنەکان بون .
هەر ئەو بەیانیە، لەناکاو هەواڵەکە و مەترسی و باری دەرونی هەندێکیان وایکردبو، بیری گەڕانەوەی نەوشیروان مستەفا بۆ جڵەوگرتنی یەکێتی بێتە باسوخواسی ئەو بارە ناهەموارە، بەو مەبەستەش پەیوەندیان پێوەکرد سەردانی مەکتەبی سیاسی بکات . سەرەتا پێی باش بو بەڵام نەهات ! وەک بیستمان چاوەڕوانی گەڕانەوەی هێرۆ خانە چونکە بۆ هەواڵپرسینی مامجەلال و بۆ ئەو پێشنیازەش هەر لەگەڵ ئەو قسەیکردبو .
دوو مانگ دواتر و هەمان بیری گەڕانەوەی نەوشیروان مستەفا باسکرایەوە بەڵام ئەمجارە لەلایەن خودی هێرۆخانەوە .
ئێوارەی نۆزدەی مانگی سێی دووهەزاروسیانزە، بۆ یەکەمجار لەتەلەفۆنا گوێم لەدەنگی خانمی یەکەمی ئەوسای عێراق بو ...
پێی وتم :
- کوڕم سبەینێ نیوەڕۆ کاک نەوشیروان لەمەکتەبی سیاسی میوانی ئێمەیە، ئەو حەزی لەیاپراخە، بۆی دروستبکەن، دوای نانخواردن هەمومان پێکەوە دەستی یەکتری دەگرین، شەقامی سالم دائەخەین و بەناو خەڵکەکەیا بەپێ تاشەقامی مەولەوی ئەڕۆین، نامەوێ هیچ راگەیاندنێک بەوانەی خۆشمانەوە بیزانن، تەنیا کامێراکەی لای خۆتان بێنە دواقسەش وتیەوە، یاپراخەکەتان بیرنەچێ .
من نازانم بۆچی ئەم راسپاردانەی بەمن وت ! لەکاتێکدا، جگە لەکامێراکە هیچ ئەرکێ لەوانەیتر، کاری من نەبون .
ئێوارەی هەمان رۆژ، لەماڵەکەی خۆی و بۆ هەواڵ، سەردانی کۆسرەت رەسوڵ، جێگری سکرتێری گشتیم کرد، ئاگاداری میوانداریەکەبو، لەبارەیەوە قسەماندەکرد، زەنگی تەلەفۆنەکەی لێیدا، چەند هەناسەیەکی کەم و دایخستەوە .
- ئەوە مستەفای سەید قادر بو ... دەڵێت سەردانەکەی سبەینێ ناکرێت و لای ئێوەوە تێکدراوە، بزانین کێ تێکیداوە ؟
وای وت و داوایکرد مەلابەختیاری بۆ وەرگرن ...
- مەلابەختیاریش ئاگادار نیە، دیارە هێرۆ خۆی تێکیداوە !
ئەم قسەیەی دوای داخستنەوەی تەلەفۆنەکە کرد .
بەو پەیوەندیەی مستەفادا، زانیم کەنەوشیروان مستەفا گومانی لەکۆسرەت رەسوڵ هەیە، ئەشمزانی کەگومانەکەی لەجێگەی خۆیدا نیە ! بەپێچەوانەوە ئەو گرنگی بەمیوانداریەکەدا، وەک من زۆریش شادمان بو .
پەیوەندیەکان و رێکخستنی مەراسیم و بەرنامەی کۆبونەوەکە لەجوغزێکی نهێنی بچوکدا بون بەڵام گومانەکان گەورە بون . هەمو ئەوانەی بەم تەدارەکی سەردانەیان ئەزانی، لەژمارەی پەنجەکانی دەست زیاتر نەبون .
چەند رۆژێکی کەم و وێنەکە باشتر رون بۆوە، زانیمان پارتی و شەخسی مەسعود بارزانی لەو کۆبونەوەیە ئاگادار کرابونەوە، هەر ئەوانیش نەیانهێشتبو، روبدات .
چۆن ؟ ئەی بۆچی ؟
( ماوەیەکی کەم و دوای گواستنەوەی مامجەلال بۆ ئەڵەمانیا، مەسعود بارزانی هاتە سلێمانی و لەکۆبونەوەی هاوبەشی وەفدی هەردولادا، وتی :
- یەکێتی نیشتیمانی کوردستان ئامانەتی مامجەلالە لای من ! پێویستە هەموتان ئەوە باش بزانن .
ئەو رۆژە، پێش گەیشتنی بارزانی بۆ مەکتەبی سیاسی، روخسەتم لەمەلا بەختیار وەرگرتبو کە مێز و کورسیەکانی هۆڵەکە بەجۆرێک رێکبخەم وەک کۆبونەوەیەکی هاوسەنگی نێوان دوو حیزبی جیاواز دەربکەوین، کورسەکەی مامجەلالم لەگۆشەی هۆڵەکەدا لادابو، دوو کورسی هاوشێوەم بەرامبەری یەکتری بۆ سەرۆکی پارتی و جێگری سکرتێری گشتی دانابو بەڵام لەهاتنەژورەوەی بارزانیدا و لەفەرموکردنی هاوڕێکانی خۆماندا، خستیانە سەرەوە، ئەو کورسیەکەی مامجەلالیشیان بۆ راکێشا کەپێشتر و لەسوچێکی هۆڵەکەدا بەتاکی دامنابوو .
دواتر وێنەکان وادەرکەوتن کە مەسعود بارزانی سەرپەرشتی کۆبونەوەی هاوبەشی هەردوو حیزب دەکات .
هەرلەوێشدا، داوایان لەبارزانی کرد لەکۆنگرەیەکی رۆژنامەوانیدا، قسە بکات .
بارزانی لەو داوایە دودڵ بوو ! نەک لەکۆنگرەی رۆژنامەوانیەکە بەڵکو لەوەی کێ لەهاوڕێکانی ئێمە لەتەنیشت خۆیەوە بوەستێنێت !
دواجار کەداوایانلێکردەوە وتی :
- باشە بەڵام بەتەنیا دەبم .
خۆی و مەلابەختیاریش ئاماژە و قسەیەکی وایانکرد کە من کۆنگرەکە رێکبخەم و بۆ جێگەی رۆژنامەنوسەکانیش هاوەڵی بکەم .
کۆنگرەکەی کرد و بەتەنیا من لەتەنیشتیەوە راوەستام ) .
چەند رۆژێک بەسەر شکستی کۆبونەوە و مەراسیمی ئێوارەی نەورۆزدا، تێپەڕی .
دڵنیابوم لەرێگەی ناوخۆی خۆمانەوە بەراسپاردەی بارزانی تێکدراوە ! بێ دودڵی و بێ پرسی هیچ کەسێک پەیوەندیم بە "ئەحمەد میرە " هاوڕێی رۆژنامەنوس و خاوەنی گۆڤاری لڤینەوە کرد . لەگەڵ ئەواندا، راپۆرتێکی رۆژنامەوانیم لەسەر کۆی هەوڵەکانی کۆبونەوەکە، تێکدان وگومانەکان نوسی و بڵاومانکردەوە بەڵام بەشێوازێک لەلایەک خەڵکی کوردستان بزانن چی روئەدا و لەلایەکیتر تەنیا ئەو کەسانەی ناو جوغزە بچوکەکەی هەردوو لایەن، لەکۆدەکان و نێوانی دێڕەکان تێبگەن .
هیچ کەسێکیش لەناو یەکێتی و گۆڕاندا، زانیاریەکانی ناو راپۆرتە رۆژنامەوانیەکەیان رەتنەکردەوە .
ساڵان رۆیشت و کاری میدیای گۆڕانم کەوتە ئەستۆ .
بەهاری دووهەزاروپانزە پێش مەراسیمی شاری جوان، جارێکیتر هەوڵەکانی بارزانی بۆ شکستپێهێنانی رێکەوتنە بیستوپێنج خاڵیەکەی نێوان ( ب گ ، ی ن ک )، لەناوخۆی یەکێتیەوە کەوتەوە گەڕ .
بەفرسەتم زانی لەنزیکەوە روو لەنەوشیروان مستەفا بڵێم :
+ تۆ دوو ساڵ پێش ئێستا، پێتوابو کۆبونەوەی نەورۆز، کۆسرەت رەسوڵ و بەرهەم ساڵح تێکیانداوە ! من ئەوکاتیش ئەمزانی کەوانیە ! ئێستا ئەوانە کێن کاک مەسعود ئەتوانێ هانیانبدات، رێککەوتنێکی وەها گرنگمان لێ تێکبدات ؟
- ئێستاش هەر بڕوام وایە کۆسرەت و جەماعەتەکەی کۆسرەتن .
بەم وەڵامە تێگەیشتم هەمان بڕوای ساڵانی پێشوی هەیە بەڵام رۆژی دواتر، کۆمەڵێک بەڵگەمان سەبارەت بەهەوڵەکانی تێکدانی رێککەوتنەکە دەستکەوت، لەبەشی ئایندەیا باسیان دەکەم .