٣١ی ئاب!

جه‌عفه‌ر عه‌لی
  2021-08-31     547
نەریتە مێژوویی و باوەکەی حیزبی کوردی، حیزب هەرچی بیکات راستە، ڤایرۆسە ترسناک و کوشندەکەی ناو جەستەی ئەندامی حیزبی، سەرۆک و کەسی یەکەمی حیزب، هەرچی لە زاری بێتەدەر، هاوشانی دەقی سورەتێکی قورئانی دەبێ پیرۆز سەیر بکرێ و پیرۆزیش مامەڵە بکرێت. 
   کاتێک مرۆڤ دەچێتە ناو ئەم سیستەمی کۆنتڕۆڵ و داگیرکردنەوە، ئیدی چەند ئاساییە کادیری حیزبی رەش بە سپی و سپی بە رەش ببینێت، هێندەش نائاساییە تۆ کە لە دەرەوەی سنورەکانی ئەم سیستەمی کۆنتڕۆڵەدا وەستاوی، چاوەڕوانی ئەوە بیت، کادیر و ئەندامانی حیزب، وەک تاک، وەک بوونێکی ئازاد، قسە لە جیاوازی هێڵەکانی نێوان نیشتیمانپەروەری و خیانەت بکەن. کاتێک دیوەخانی خێڵی سیاسی لە سەرەوە بڕیار دەدات (ئەلیف) نیشتیمانپەروەر و (بێ) خیانەتکار، کاری (س) نیشتیمانی و هی (ص) خیانەتە، ئیدی پێویست ناکات تۆ لە قسە و رەفتار و لێدوانی ئەندام و حەشاماتە کۆنتڕۆڵکراوەکەی خوارەوەدا بۆ هەڵوێست و بڕیارێکی جیاواز بگەڕێیت. بڕیار و هەڵوێستەکانی حیزبی کوردی، بڕیاری ئامادەکراوی پاکەتین بە هەندێ مەوادی حافیزەوە دەخرێنە سەر رەفەی مارکێتەکان (بارەگاکان)ی حیزب و دواتریش دەکرێتە ناو خوێن و مێشکی کادیر و ئەندامانییەوە. بۆیە بۆ هەر هەڵوێست و بڕیارێکی سیاسی، بۆ زانینی هێڵی بیرکردنەوە و سیاسەتی فەرمی، هێڵی جیاکردنەوەی کاری نیشتیمانی لە خیانەت و پێناسەکردن و لێکدانەوە بۆ ئەم چەمک و مانایانە، سەیری دیوەخانی سەرەوە بکە و خۆت بە شاقەلی ئەو کادیر و ئەندامانەوە هەڵمەواسە، کە جگە لە ساغکردنەوەی بڕیارە پاکەتییەکانی سەر رەفەی مارکێتەکانی حیزب لە شار و ناوچە جیا جیاکانی ناوەوە و دەرەوەی کوردستان، نە کارێکی دیکە دەزانن، نە کارێکی دیکەیشیان پێدەکرێت. 
   پارتی و سەرکردایەتییە سیاسییەکەی، وەک هەر کەسێکی دەرەوەی خۆیان، باش دەزانن ٣١ی ئاب خیانەت بوو، خیانەتی نیشتیمانی، دەبێ ئەوەش باش بزانن کە ئەوان وەک حیزب ئەم مێژووە چۆن دەنوسنەوە و چۆن پێناسەی دەکەن، ئازادن، بەڵام هەرگیز ناتوانن دیدی خۆیان بگۆڕن بۆ پێناسە لە مێژووی گشتیدا، چونکە مێژووی سەرۆک و بنەماڵە و حیزبەکان شتێکە و مێژووی گشتی نەتەوە و نیشتیمان، شتێکی دی. 
   پارتی لەگەڵ یەکێتی لە شەڕی ناوخۆدا بووە، دەتوانێ بەپێی پرەنسیپە نائەخلاقییەکانی شەڕیش لێکدانەوەی خۆی بۆ ٣١ی ئاب و هەر رووداوێکی دیکەش هەبێت، دەکرێ پاساو و بیانووش بۆ ئەنجامدان و دەعوەتی لەشکری بەعس بۆ هەولێر بهێنێتەوە، کە ئەگەر لە شوێنی پارتییەوە سەیری بکەین، دۆخەکە وەک هەڕەشە و مەترسی جددی بۆ سەر ژیانی پارتی و دەسەڵاتی سیاسی بنەماڵەی بارزانی دەبینرێت، بەڵام ئەوە تەنها دیدی پارتییە بۆ رووداوێک، کە جگە لەوەی یەکێتی لایەنە سەرەکییەکەی دیکەی شەڕ بووە، خەڵکی کوردستان و هێزەکانی دەرەوەی ئەو دوو لایەنەش بەشێکی گرنگی بینەری رووداوەکان بوون و سەرەنجامە سیاسی، کۆمەڵایەتی، ئابووری و سایکۆلۆژییەکانی شەڕ، راستەوخۆ بەسەر ژیانی تایبەتی و گشتی ئەوان و کۆمەڵگەشەوە کاریگەر بوون. بۆیە هەرگیز پێناسە و لێکدانەوەی پارتی و کادیرەکانی بۆ ٣١ی ئاب، نابێتە پێناسە و لێکدانەوەیەکی گشتی بۆ مێژوو و رووداوی مێژوویی، تەنها وەک پێناسەی حیزبێکی سیاسی کە لایەندارانە و نابابەتی لەسەر بنەمای بەرژەوەندی سیاسی، تەفسیری رووداو دەکات لە مێژوودا دەمێنێتەوە. 
   ٣١ی ئاب، لەوە شومترە مرۆڤ چیرۆکەکانی وەک شانازی بنوسێتەوە، لەوەش تراژیدی و گەورەترە مرۆڤ تەنها لە عەقڵ و دیدی سیاسی پارتییەوە بۆ پێناسەکەی بگەڕێت. پێناسەی پارتی بۆ ئەم رووداوە تراژیدییە نەتەوەییە، هێندە بچووکە جگە لە تەفسیرکردنی رووداو لەسەر بنەمای قینی مێژوویی هیچی دیکە نییە. پارتی رقێکی مێژوویی بەرامبەر یەکێتی هەیە، یەکێتیش لە دەرەوەی ئەم رقە مێژووییەوە ململانێی پارتی تا ئاستی شەڕی ناوخۆ بردووە. کاتێک رقی مێژوویی جوڵە سیاسییەکانمان ئاراستە دەکات، دەتوانێ هەر قسە و رەفتار و تەفسیرێکمان بۆ رووداو و مێژوو، بە رەنگی خۆی رەنگ بکات. بۆیە هەرچی پارتی، یان یەکێتی لەسەر ٣١ی ئابی ١٩٩٦، یان ١٦ی ئۆکتۆبەری ٢٠١٧ بیڵێن لەسەر بنەمای ئەو رقە لە دایک دەبێت و دەبێ لەسەر بنەمای ئەو رقەشەوە بخوێنرێتەوە. 
   ٣١ی ئاب، نە رۆژی دامەزراندنی پارتییە، نە لە دایک بوونی بارزانی باوک، نە رۆژی تۆمارکردنی داستانی مێژوویی وەک هەندرێن و خواکورکە، کە پارتی وەک رۆژی پیرۆز نرخیان پێدەدات، بەڵکو رۆژی سەرنەویکردنی ئەو سەرکردە مێژووییەی پارتی و بنەماڵەی بارزانییە، کە وەک خۆیان دەڵێن لە ١٥ ساڵییەوە چەکی پێشمەرگایەتی کردووەتە شان، لەبەردەم پەنجە خوێناوییەکانی بەعس و سەدام، هەمانکات تێکشکاندنی ئیرادە و هێزی ناوەکی نەتەوەیەکە، کە خەریکی هەستانەوە و مەشقی وەستان لەسەر پێکانی خۆیەتی. ئاخر ناشێت تۆ هەڵەی سیاسیت کردبێ، هەڵە سیاسییەکەشت تا ئاستی خیانەتی مەزن بە نەتەوە و پیرۆزییەکانی نیشتیمان رۆیشتبێ، کەچی هێشتا دیوەخانە سیاسییەکەت لە پیرۆزی و شانازیکردندا، خەتێکی جیاواز لە نێوان رۆژی لە دایک بوونی بارزانی باوک و ٣١ی ئابدا دانەنێت. سڕینەوەی هێڵە تۆخەکانی نێوان پیرۆزی و خیانەت، بەسن بۆ ئەوەی لە نوسینەوە و تەفسیرکردنی رووداو لەسەر بنەمای رقی مێژوویی تێبگەین.

وتاری زیاتر

زۆرترین بینراو
© 2021 Awene Online, Inc. All Rights Reserved.
×