بەپێی هەموو لێكدانەوەیەك ئەو تەقینەوەی (كرمان) لە ئێران كە لەسەر ئەمریكا حیسابكرا، لەوڵامی ئەو زنجیرە پەلامارانەبوو كە دەكرایە سەر بنكە سەربازیی و بەرژەوەندییەكانی ئەمریكا لەعیراق و سوریاو ناوچەكە . لێكەوتەی ئەو رووداوە لەوێوە ناوەستێت، بەڵكو لەدوێنێوە هەست بەجموجۆڵێكی نوێ لەعیراقیش دەكرێت.
دوای تەقینەوەكەی كرمان و كوشتنی فەرماندەیەكی دیاری حەشدی شەعبی لەبەغدا لەماوەی تەنها دوو رۆژ، ئێران فشار لەبەغدا دەكات تا داوای دەرچوونی هێزەكانی ئەمریكا لەسەر خاكەكەی بكات، بەتایبەتیش ئێستا دامەزراوە گرنگەكانی بڕیاردانی عیراق بەتەواوی كەوتۆتە ژێر كاریگەری و هەژموونی ئێران! هەر لەپەرلەمانەوە بگرە تا دەگاتە حكومەت و دامەزراوە ئەمنیەكان و تەنانەت دامەزراوەی دادوەریش. بۆیە لەدوێنێوە لێدوان و وتاری بەشێك لەبەرپرسانی عیراق بەرامبەر ئەمریكا توند بووەو وەك دەگوترێت خۆیان گیڤ دەكەنەوە. بۆیە دەبێ چاوەڕوانی رووداوی نوێ و پێشهاتی نوێ بین لەعیراق و ناوچەكە.
هەرچەندە دەرچوون یان رۆیشتنی ئەمریكا لەعیراق ئاسان نییە، چونكە هەم رێككەوتننامەیەكی ستراتیجیی لەنێوان هەردوولادا هەیەو هەمیش بەرژەوەندی ئەمریكاو زەرورەتی مانەوە رێنادات ئەمریكا لەعیراق بەمزوانە بڕوات، بەڵام گرنگە ئەو پرسیارە بكەین كە ئەگەر ئەمریكا لەعیراق كشایەوە چی روودەدات؟
بێگومان كشانەوەی ئەمریكا كاریگەری زۆر خراپی ئابوریی و ئەمنی لەعیراق دەبێت، بەتایبەتیش بۆ گەلی كوردستان و كەمینەكانی دیكە، چونكە هیچ پارێزبەندییەك نامێنێت و هەموو ئەگەرە خراپەكان كراوە دەبن، بۆیە ئەگەر رۆیشتنی ئەمریكا بۆ كورد رووداوێكی ئێجگار خراپ دەبێت.
جگە پرسی رۆیشتنی ئەمریكا، ماوەیەكە باس لەكشانەوەی بەرنامەی یۆنامی سەر بە نەتەوەیەكگرتوەكان لەعیراق دەكرێت! ئەمەش رووداوێكی دیكەی زۆر مەترسیدارە بۆ عیراق بەتایبەتیش بۆ هەرێمی كوردستان یان كەمینەكان، تەنانەت زۆر خراپە بۆ حوكمڕانی و بەیەكەوە ژیان لەم وڵاتە.
ماوەی ساڵێك دەبێت عیراق بەڕەسمیی داوای لەنەتەوەیەكگرتووەكان كردووە كۆتایی بەبەرنامەی یۆنامی لەعیراق بهێنێت چونكە پێویستیان بەبوونی بەرنامەكانی نەتەوەیەكگرتووەكان نەماوە. لەوبارەیەوە نەتەوەیەكگرتووەكان لیژنەیەكی هەڵسەنگاندنی پێكهێناوە بۆ نوسینی راپۆرتێك تابزانن درێژەدان بە مانەوەیان لەعیراق پێویستە یان نا، ئەو راپۆرتە پێشكەشی ئەنجومەنی ئاسایش دەكرێت و دواتر بڕیار لەوبارەیەوە دەدرێت. بەپێی سەرچاوەكان رەنگە لەچەند مانگی داهاتوو نەتەوەیەكگرتوەكان زۆربەی ئاژانسەكانی خۆی لەعیراق بكێشتەوە.
ئەگەر نەتەوەیەكگرتووەكان یان یۆنامی لەعیراق بكشێتەوە، دیسان كوردو كەمینەكان زیانێكی گەورەیان بەردەكەوێت، چونكە هیچ پارێزبەندی و رێگرییەك نامێنێت بۆ هەر ئەگەرێك دژ بەهەرێمی كوردستان و كەمینەكان لەعیراق.
لەهەردوو ئەگەردا، چ ئەمریكا هێزەكانی لەعیراق بكێشتەوە، یاخود نەتەوەیەكگرتووەكان كۆتایی بەكارەكانی (یۆنامی) بهێنێت لەعیراق، هەرێمی كوردستان دەكەوێتە دۆخێكی زۆر خراپ! بۆیە پێشهاتەكان دڵخۆشكەر نین، ئەو قسەیەی جینین پلاسخارتیش لەو زانیارییەوە سەرچاوەی گرتبوو كە چەند جارێك گوتی "مەرج نییە ئەم قەوارەیەی ھەتانە تا سەر بمێنێت بۆیە پێویستە یەکگرتووبن".