ساتژمێرو حەقیقەت

شۆرش خالید ئاژگەیی
  2019-12-31     465
ھەروەک جاران ساڵێکی تەواو لەچاوەڕوانی ساڵی نوێدابووین.
ساڵێكیتری پڕ لەروداوو ھەورازو نشێوو ھەڵبەزو دابەز خرایە سەر خەرمانەی تەمەنمانەوە.

ساڵێکی تری تێپەڕی پڕ لەساتەوەختی خۆش و ناخۆش و وانەو ئەزمون و پەندو ئامۆژگاری، بێ ویستی خۆمان و بێ ئەوەی لەناویدا بتوێینەوەو ببین بە بەشێک لە ماھیەتی بوونیەوە، بەسەرماندا تێپەری...ساڵێکیتر بوو بە بەشێک لە بیرەوەریەکانمان.

لەو ساڵەی تێپەڕی،  گوڵە گەنمەکان بازرگانیان بە گوڵەکانی ترەوە کرد...دڵسۆزی و راستگۆیی و حەقبێژی، لە نێو گۆمی مەنگی ئاوە گەنیوەکەی  ئەوبەر شار خنکان...شەرم نەما...حەیا تکا...روو شکا.

باوکە ھەژارەکان دەست لەکار کێشانەوەی خۆیان لە پۆستی داسەپاوی باوکایەتی راگەیاند...دایکە شەھیدێکی زامدار ی ئەنفال لەوپەڕی تەنیایی و بێدەرەتانیدا، لە گۆشەیەکی تاریک وساردوسری ژووری کەلاوە قورینە بێ ئاووکارەباکەیدا سەری نایەوەو لە گۆرستانی بێ کەسیدا نێژرا...منداڵێك لەبەر روناکی لامپاو فانۆسەکەیدا کتێبی ئەزمونی ژیان و مێژووی ئینسان بوون و کوردبوونی تا دوالاپەڕە خوێندەوە...بەڵام ھیچی دەست نەکەوت و ھیچی لێوە فێر نەبوو.

ساڵی رۆیشت، مەغریفەو زانست، ھۆشیاری و ئاگایی، برایەتی، ھاورێیەتی راستەقینە، خزمایەتی و ھاوخوێنی و دۆستایەتی لە جاران کاڵتر بوونەوەو دەسکەوتە مادیەکان تۆختر و بە تەوژمتر لە جاران خزانە نێو رووبەری شێواوی زھنیەتی مرۆڤەکانەوە.

ئەوساڵەی تێپەڕی دونیاو دۆخی شۆڕشگێڕانی جاران دیسان لەرووی شکڵی و رواڵەتەوەگۆڕانکاری بەسەرداھات و چەمکی کوردایەتی راستەقینە  و قوربانیدان و راستگۆیی،  ئاراستە و ماھیەتێکی تری وەرگرت و کەوتە دۆخێکی ترەوە...حزب و ئینتیمای سیاسی و ئایدیۆلۆژی لە جیاتی ئامراز, بوون بە شوناس، ستراتیژی بوو بە ئامانج،  ناوچەگەرێتی و شارچێتی بوون بە پێناس و سەرمایەداری بوو بە ئایدیۆلۆژیا، بێباکی بوو بە نەریت و دەسپاکیش بوو بە گریمانە و حەقیقەتە شاراوەکانیش ھەر بە شاراوەی مانەوە.

ئالبێرت ئەنیشتاین  پەیوەست بە حەقیقەت دەڵێ:
" حەقیقەت نانووسرێتەوە...حەقیقەت ئەو شتەیە  بەردەوام بە مەبەست و ئەنقەستەوە ھەوڵ بۆ داپۆشین و شاردنەوەی دەدرێت..."

ئانتوان چێخۆفی نووسەروپزیشک دەڵێ:
" خەتەرناکترین و پڕ مەترسیترینی مرۆڤەکان ئەوانەن، ئاستی تێگەیشتنیان یەکجارلە خوارەوەیەو بیروبروای (چەوتیان) بەھێزە"

نەوتراوەکان دەکرێ بوترێن و بورووژێنرێن، بەڵام ئەستەمە شتە وتراوەکان و نھێنیە درکێنراوەکان بۆ شوێنی خۆیان بگەرێندرێنەوەو بخرێنەوە دۆخی دەست لێنەدراوی و باری نھێنی و سرووشتیەوە.

چ گۆزە بە بەرددا بکێشی و چ بەرد بە گۆزەدا بکێشی، دواجار شکان و لەناوچوون ھەر بۆ گۆزەیە.

بەھیوای ساڵێکی جیاوازو دۆخێکی باشتر و ئاسوودەتر بۆ ھەموو لایەک.

زۆرترین بینراو
© 2020 Awene Online, Inc. All Rights Reserved.
×