مرۆڤەکان هەمیشە چاوەڕوانن…لە چاوەروانیدا دەژین…چاوەروانیەکان هەرگیز کۆتاییان نایەت و ئێمە هەمیشە لەو بەر سنووری هزروخەیاڵدا بە پێی دۆخی ژیان و خواست و ئارەزووەکانمانەوە وێنایان دەکەین و هەوڵ ئەدەین پێیان بگەین .
چرکەساتەکانی چاوەڕوانی تاقەتپ روکێنن.
چاوەڕوانی هاتنی هاوڕێیەک، روودانی رووداوێک، وەرچەرخانێک، موعجیزەیەک، هەواڵێکی خۆش و موژدەیەکی دڵخۆشکەر، نوێ بوونەوەی هەناسەیەک یا گۆڕانکاریێکی ئەرێنی یا هاتنە کایەی دۆخێکی باشتر و بێ کێشەتر و دڵنیاتر لەوەی تیایدا ژیاوین و بووە بە واقعی ئێستامان.
داهاتوو لە کەسەوە دیار نیە. داهاتوو روخسارێکی رۆشن و دیارو دڵنیاکەرەوەی نیە. چرکەساتێکی نەهاتووەو لێبڕاوانە لە زهنیەتی ئێمەدا لە جووڵە دایە…رەنگە ئەو رووداوە هەرگیز روونەدات یا ئەو کەسە هەرگیز نەیەت و دۆخەکە هەر وەک خۆی بمێنێتەوەوهیچ گۆڕانکاریەکی ئەرێنی نەیەتە دی.
هەموو چاوەڕوانیەک لە فەزایەکی بەرتەسک و چوارچێوەیەکی دیاریکراوی خەیاڵدا دێت و دەڕوا. چاوەڕوانی هەمیشە هەڵگری کۆمەڵێک تایبەتمەندیە و گرێدراوی ئەو هەلومەرجانەیە، خودی ماهیەتی چاوڕوانی تیایدا لە دایک دەبێت و دواتر چەکەرە دەکات و پەنگ دەخواتەوە و دەبێ بە بەشێک لە کەسێتی ئێمە.
لە دۆخی چاوەڕوانیدا بە روونی هەست بە جۆرێک لە فشار دەکەین هەموو ساتێک لەگەڵمانە. ئەم فشارو پاڵەپەستۆ دەروونیانە جاری واهەیە سەردەکێشن بۆ نیگەرانی ، دڕدۆنگی و جۆرێک لە تووڕەیی ناوەکیەوە. تووڕەیی لەم حاڵەتەدا وێنای فشارێکی گەورەیە چاوەڕوانی لەگەڵ خۆیدا دەیهێنێ و پانتای زیهن داگیر دەکات.
هیواخواستن بەو شت و کەسایەتی و رووداوو دۆخانەی مرۆڤ پێی وایە پێویستی پێیانەوە هەیەو ئەشێ گۆڕانکاری لە هەلومەرجی ئێستایدا دروست بکەن، جۆرێکە لە ڕاکردن لە واقع و ئەو هەلومەرجانەی بوونەتە هۆکاری هاتنەکایەی “ ئێستا”ی.
هەژمونی خەیاڵ کردن بۆ بەدەست هێنان و دابین کردنی خواست و ئارەزووەکان، یەکێکە لەو فاکتەرو هۆکارانەی وا لە مرۆڤ دەکا لە “ ئێستا” دا داببڕێت و ئومێد بە دۆخێکەوە بخوازێ، مەیسەر نابێ و فەراهەم کردنی کردەیەکی نەکردەو هەوڵێکی نەزۆک و بێ ئەنجامە.
داهاتوو وابەستەی دونیابینی و دیدگاو زیهن و سەرجەمی ئەو ئومێدو ئارەزووانەیە ئێمەی بە درێژایی تەمەن کردووە بە دیلی دەست و پێ بەستراوی خۆیەوە.
ئارەزووی دەست خستن و ئومێد خواستن بە هەلومەرجێکی دڵخواز و گۆڕانکاری، وابەستەی کۆمەڵێک هەلومەرج و فاکتەری ترەوەیە. تا هەماهەنگی و هارمۆنیاو هاوسەنگی نەخەینە نێوان “ واقع” و هەژمونی “ خەیاڵ” و پاکێجی “ خواستەکانمان” ەوە، رەنگبێ نەتوانین فشارە دەروونیەکان لەسەر خۆمان کەم کەینەوەو بگەین بەو وێستگەیەی ئاسودەییمان بۆ بەرهەم دەهێنێ.
داهاتوو لە چەندین رەهەندێک پێک هاتووە:
رەهەندی فیزیکی، رەهەندی سایکۆلۆجی، رەهەندی سۆزوخۆشەویستی و وابەستەبوون و رەهەندی هێز.
بۆ گەیشتن بەهەر ئامانجێکی دیاریکراو، پێویستە ئەم چەند رەهەندە بە هەماهەنگی و هاوتەریب، بە ئاڕاستەیەکی دیاریکراوەوە هەنگاو بنێن و ئەولاو ئەملا نەکەن و نەکەونە ژێر کاریگەری فاکتەرو هێزی دەرەکی و ناوەکی ترەوە.
مرۆڤ لە چاوەڕوانیدا وەردە وردە ئاوێتەی ناخ و دۆخی دەروونی خۆیەوە دەبێت و دواجار خۆی لێ ون دەبێت و دڵۆپ دڵۆپ و زۆر لە سەرخۆ لە قووڵایی ناخی خۆیدا دەتوێتەوە.
توانەوە لە ناخی “ خود” و کۆی ئەو فشارە دەروونیانەی دەرەنجامی هیواو ئومێدو خواستە دوورەدەستەکانی ناخی مرۆڤن، بکەرو بوونەوەرێکی دابڕاوو پەراوێزکەوتوو و بگرە تووڕەو ڕقاوی و گۆشەگیری لێ بەرهەم دێت.
ئەم بکەرە تا دێت لە “ کۆ” دوور دەکەوێتەوەو لە رووبەری ئاڵۆزی خەیاڵدانی پەرش و بڵاوو ناسەقامگیریدا، بەدوای “ خود” و “خواستەکان” یدا، لە دۆخێکی ئاڵۆزی سەرگەردانیدا دەمێنێتەوەو ناتوانێ هەنگاو بەرەو داهاتوو بنێت و گۆڕانکاری لە “ ئێستا” یدا بکات و ریفۆڕمی عەمەلی و ریشەیی بێنێتە کایەوە.