من تەنیا گفتوگۆ گەرمو گوڕەکانی سەر شەقامە ساردوسرو چۆڵ و زەمەنی سەهۆڵبەندام بیر ماوە.
هەموو شتی ئێستام، ئەوسام بیر دەخاتەوە و ئەو شتگەلەی لە ناخمدا پەنگیان خواردبووەوەو رێگەی درکاندنم پێیان نەدەدا، ئێستا دێنە گۆ و دەمدوێنن.
هەندێکیان بەدەم گلەیی و پرتەو بۆڵە بۆڵ و گازندەوە دادگاییم دەکەن و منیش بێ بەرگری، گوێیان بۆ هەڵدەخەم.
ئەم گوێ هەڵخستنە مرۆڤ دەبات بۆ قوڵایی بوونێکی نامەلموس، بەڵام هەست پێکراوی خۆیەوە. ئامادەیی ئەم قووڵاییە لە فۆڕم گرتنێکی ناوەکیدا، بەرهەمهێنەری ئەو شوناسەیە، مرۆڤ پێی دەناسرێتەوەو لە پانتای کۆمەڵگادا دەبینرێت و لە هەڵسوکەوتەکانیدا رەنگ دەداتەوەو دواتر دەبێ بە شوناسیەوە.
گەڕانەوە بۆ خود، گەڕانەوەیە بۆ سەرجەم ئەو شتانەی لە دوو توێی کۆمەڵێک تایبەتمەندی رەفتاری و ئاکاری کۆمەڵایەتی و قسەکردن و جووڵەی کۆمەڵایەتیدا، دەبن بەو شوناسەی تاکی پێ دەناسرێتەوە.
مرۆڤ بوونەوەرێکی کۆمەڵایەتی و پڕ لە جووڵەو نواندنی چالاکیە لە فەزایەکی پڕلە جووڵەی کۆمەڵایەتیدا. هەموو ئەم چالاکی و جووڵانە لە رووبەری کۆمەڵگادا بە تەنیا ناتوانن مرۆڤێک بەرهەم بهێنن، بتوانێ بە تەنیا دونیایەک دروست بکات پڕ بێت لە بەختەوەری و کامەرانی و هەماهەنگی و خاڵی لە هەر کێشەو گرفت و نایەکسانی و تەنگوچەڵەمەیەکەوە.
گەڕانەوە بۆ خود، گەڕانەوەیە بۆ حەقیقەتی بوونێکی دەست لێنەدراوو خاوو سروشتی و رەوشت و ئەدەب و باشیەکان. گەڕانەوەیە بۆ سەرلەبەری ئەو شتانەی لە ناو ستراکتۆری “ خود “دا، تاکی پێ دەناسرێتەوە. گەڕانەوەیە بۆ ئەسڵ و تۆرهەڵدانی هەموو ئەو ئایدیاو بیروبۆچوونانەی لە پانتای کۆمەڵگا و فەزای کایەی ژیاندا، سایکۆلۆلۆژیای تاکی گەمارۆداوەو کردوویەتی بە رۆبۆتێکی بێ زمان و بێ فکر و ئەدەب و بکەرێکی دەستوقاچ بەستراوی بێ ماف و بێ ئیرادەو بێ روئیاو دونیابینیەوە.
گەڕانەوە بۆ خود، یەکەم هەنگاوی داماڵینی سەرجەمی ئەو دیدگاو روانگانەیە، تاک بە ناچاری یا لە رووی بەرژەوەندی و خۆلیابوون بۆ هێزو دەسەڵات و پێگەو جێگەو رێگە و مسۆگەرکردنی ئاییندە، پەنای بۆ بردوون و بێ سڵەمینەوە لە دەرەنجامەکان، خۆی ڕادەستی حەزوئارەزووە ڕاگوزەرەکانەوە کردووە.
گەڕانەوە بۆ خودی حەقیقی، گەڕانەوەیە بۆ سەرەتا و پاک بوونەوە لە چەوتی و ناڕێکیەکان. پاک بوونەوەیە لە درۆکردن لەگەڵ خود و دەورووبەر. پاک بوونەوەیە لە چەواشەکاری و دەمشڕی و بەسالار و سەردار کردنی درۆ و مەکینەی درۆسازی و هەلپەرستی و ئۆزکردنی دۆخی کۆمەڵگاو ناشرین کردنی ژیان. پاک بوونەوەیە لە دووفاقی و دووروویی و خۆپەرەستی و بێ باکی، بەرامبەر کۆمەڵگاو تاکەکانیەوە. پاک بوونەوەیە لە ئافاتی گرێی دەروونی و پەتای ئێرەیی و ڤایرۆسی خۆبەزل زانین و کەڵەگایی و حیساب نەکردن بۆ کۆمەڵگاو تێکدانی ژیانی دەستەجەمعی و پێکەوەیی و نانەوەی فیتنەو ئاشوب و شارچێتی و ناوچەگەرێتیەوە.
گەڕانەوە بۆ خودی حەقیقی، گەڕانەوە نیە بۆ رابردوو یا بەرهەم هێنانەوەی رابردوو یا دروست کردنی کاراکتەرێکی بێ شوناس . گەڕانەوە نیە بۆ خۆلەقالبدان و گیرخواردن و چەقین لە فەزایەکی داخراوو لەقالب دراوی ئایدیۆلۆژیاو سیاسەت و کولتورو خورافات و کۆنەپەرەستی ئایدیۆلۆژیای ناسیۆنالیزم و بە شەیتان کردنی کۆمەڵگاو بە فریشتەکردنی خود.
بەڵکو بەخۆداچوونەوەو گەڕانەوەیە بۆ مەنزڵگای لۆژیک و کۆشکی عەقڵانیەت و ئازادکردنی تەلاری فکر لە کۆی ئەو ڤایرۆس و شێرپەنجە و شتانەی فکریان لە چوارچێوەی چواردیوارێکی بەرزو ئەستووری نەفامی و سەرگەردانی و گەمژەییدا قەتیس هێشتۆتەوە.
گەڕانەوە بۆ خود یەکسان نیە بە دەروونگەرایی و هەڵبژاردنی گۆشەگیری و دابڕان و خۆزانین بە فەیلەسوف و کارزان و کاردان و کاراکتەری بێ رکابەرەوە. یەکسان نیە بە پەراوێزکەوتن و کەنارکەوتنی خودێکی پەشۆکاوەوە. هەروەک بە واتای خۆپەرەستی و دەست گرتن بە شوناسێکی ئاڵۆزەوە نیە.
بەڵکو یەکسانە بە گەڕانەوە بۆ سەردەمی جوانیەکان و ئەو دۆخانەی هەڵگری جوانترین یاداوەری بوون لە پانتای جڤاک و زهنیەتی تاکدا.
گەڕانەوەی مرۆڤ بۆ خودی “ حەقیقی” کردەیەکی ئاسان نیە. پرۆسەیەکی پڕ لە پێچاوپێچ و هەڵکشان و داکشابە. ئەم پرۆسەیە بە رۆژێک و دووان ناگاتە ئامانج و رەنج و ماندووبوونێکی زۆری گەرەکە.
گەڕانەوە بۆ ناخێکی دەست لێنەدراو ئامانجی هەموو مرۆڤەکان نیە. هەمیشە بەشێک لە کۆمەڵگا هیچ کێشەیەکی بونیادی لەگەڵ شوناس و دۆخی وابەستەبوونێکی پڕلە کێشەوە نیە.
لەهەموو کۆمەڵگاکان کەسانێک هەن وەک کەرەستەیەک و کاڵا کڕین و فرۆشتنیان لە لایەن بکەرانی بەرژەوەندگەراوە پێدەکرێ و دۆخێک و کۆشکێک و دونیایەکی پێ جوان و میکیاج دەکرێ، بە بێ ئەوەی ئەم سەوداومامەڵەیە هیچ کاریگەری ئەرێنی لەسەر دۆخی کۆمەڵگاو ژیانی دەستەجەمعی بە جێ بهێڵێ و بە ئاڕاستەی چاکەی گشتیەوە هەنگاو بنێ.
گەڕانەوە بۆ خودی ڕاستەقینە، دروست کردنەوەی مۆدێلێکە لە کۆمەڵگا، هەمووان بە کردار هەست بە شکۆی خۆیانەوە بکەن.
گەڕانەوە بۆ خود، ڕاچڵەکینێکی گەورەو ریفۆڕمێکی رادیکاڵیە. وێران کردنی سەرلەبەری کۆشکی درز تێ کەوتووی زهنیەتێکی چەقبەستووی لەقالبدراوە بە مەیلی شەڕەنگێزی و شەڕەجنێوو درۆو چەواشەکاری و سەرگەرم کردن و بووکەشووشە بوونەوە.
هەڵتەکاندنی وەهم و خەیاڵ و خەیاڵ پڵاوو پەیمان و دروشمی زەق و بریقەدارو و بەڵێنە درۆیینەکانی هەڵسوڕێنەران و ئایکۆن و بکەرانی گوماناوی ناخی کۆمەڵگایە.
سەرەوژێرکردنی ئەو دونیا درۆیینەیە هەندێکمان لە پێناو بەرژەوەندیەکانمانەوە بۆ کۆمەڵێکی تر دروستمان کردووە و بێ پچڕان بەردەوامین لە گۆڕینی پەیام و ئاڕاستەو ماهیەتەکەیەوەو بە پێی بەرژەوەندی و خواست و ئارەزووەکانمانەوە گۆڕانکاریان تێدا دەکەین.
تا تاک بە ئیرادەیەکی پۆڵایینەوە نەبێ بە رێبواری رێڕەوی پڕ لە دڕک و داڵی گەڕانەوە بۆ “ خود”ی ڕاستەقینە، کۆمەڵگا هەر لە دۆخی چەقبەستوویدا دەمێنێتەوەو گەشە ناکات و فکر تیایدا دەبێ بە دێوەزمەیەکی رەزا قورس و بێزراوو تۆڕهەڵدراوەوە.