بەیانی باش هەرچەندە لە دوو وشەوە پێک هاتووە، بەڵام هەڵگری ماناو مەغزایەکی یەجگار قوڵ و بەهادارە. لە رووی کۆمەڵایەتیەوە وشەیەکی نایابە وکاریگەریەکی بەرچاوی سایکۆلۆژیشی لە سەر باری دەروونی مرۆڤەکانەوە هەیە.
لەگەڵ وتنی وشەی بەیانی باشەوە مرۆڤ هەست بە زیندوێتی لە ناو فەزایەکی کۆمەڵایەتی و پڕلە چالاکی و جوڵە دەکات و دەخزێتە نێو کەشوهەوایەکی دۆستانە و خۆمانە، دوور لە خۆپەرەستی و خۆبەزل زانین و بەکەم سەیر کردنی دەورووبەرەوە.  
وشەی " بەیانی باش" هەرچەندە کردەیەکی رووکەشی زمانەوانیە، بەڵام لەهەمان کاتیشدا ئاماژەیەکە بۆ چوونە نێو کەشێکی کۆمەڵایەتی و گەڵاڵە کردنی پلاتفۆرمێکی بەهێز بۆ رۆژێکی باش، هەفتەیەکی باش و داهاتوویەکی باشەوە.
 ئەداکردنی ئەم وشەیە پەیامێکی بەهێزە بۆ دەورووبەر، بەوەی ئەوانیتریش مافی بوون و ئامادەییان هەیە لەنێو ئەو فەزا کۆمەڵایەتیە گشتیەدا. لەمەش زیاتر ئەم دەستەواژەیە ئاماژەیەکە بە نرخاندنی بوونی ئەوانی ترو بەخشینی جۆرێک لە بەهای ئینسانی و داوەتکردنیان بۆ هاتنە نێو ئەو کەشە گشتیە کۆمەڵایەتیەی خۆمانی تێدا دەبینینەوە. 
" بەیانی باش" مێتۆدو میکانیزمێکە بۆ نرخاندنی ئەوانی تر و بەهادارکردنیان و بەخشیننی هێزی بڕواو متمانە بەخۆبوون و دوور کەوتنەوە لە دابەشکاری کۆمەڵایەتی و رێگری کردن لە دڕدۆنگیەوە. لەپاڵ ئەمەشدا "بەیانی باش" جۆرێکە لە نەریتی کۆمەڵایەتی و نرخاندنی ئەوانی تر و نواندنی رێز بەرامبەریان.
هاوکات لەگەڵ وەڵامدانەوەی بەیانی باش بە " بەیانی باش"  لە لایەن ئێمەوە، ئەو کەشە کۆمەڵایەتیە ئیداریەی ئێمە لە ناویداین، جوانترو دۆستانەتر و سەرنجراکێشتر دەردەکەوێ و پایەکانی بەهێزتر دەبن. 
وەڵامدانەوەی ئێمە بە " بەیانی باش" یا " بەیانی باشتر" رەزامەندی نواندنمانە بەرامبەر پەیوەندی گرێدان و نرخاندنمان لە لایەن ئەو کەسەی بەیانی باشەکەی لێ کردووین.
 وەڵام دانەوەی ئێمە کاردانەوەمانە بەرامبەر بە کارلێکێکی دەرەکی و ئەگەریش وەڵام نەدراینەوە، بە دڵنیاییەوە هەست بە پەراوێز کەوتن و تووڕەییەوە دەکەین و ئەو بڕوایە لامان دروست دەبێ، کەسانی دەورووبەر حەز لە بوونمان ناکەن و دڵگرانن پێمانەوە.

بەهاکان لە گۆڕانکاریدان
پێشبینیەکان پێمان دەڵێن داهاوتووی ژیانی مرۆڤ و کۆی گشتی پرۆسەی ژیانی لوکس و پڕلە رەفاهیەت و خۆشگوزەرانی گۆرانکاری گەورەی بەسەردا دێت.  
ئەو تایبەتمەندیانەی لەم قۆناغەی ژیانی مرۆڤ لە رووی دەروونیەوە هەستی بەختەوەری و بەهاداری پێ دەبەخشن، خۆی لە سەروەت و سامان کۆ کردنەوەو تێری و پڕیدا دەبینێتەوەو وای کردووە کۆمەڵگەی مرۆڤایەتی لە جیاتی هەوڵدان بۆ بەهێز کردنی لایەنە مەعنەوی و رۆحی و فکری و دەروونیەکانەوە، هەموو هەوڵ و کۆششی بێوچانی خۆی بۆ گەیشتن بە سەرچاوەو ئامرازەکانی دەوڵەمەند بوون و ژیانی ماتریالیستی تەرخان بکات و لە زۆر بواریشدا تەڤی سنوور و لەمپەرە مۆراڵی و کۆمەڵایەتی و ئایینی و کۆمەڵایەتیەکان ببەزێنێ و چوارچێوەکان بپچڕێنێ و رەچاوی هیچ بەهاو یاسا و عورفێک نەکات.
بە گوێرەی پێشبینی توێژەرانی بواری کۆمەڵگە و  رەفاهی کۆمەڵایەتیەوە، ژیانی پڕلە خۆشگوزەرانی لە داهاتوودا گۆڕانکاری بەرچاوی بەسەردا دێت و ئەم پێوەرانە  دەبن بە پێناسەی رەفاهیەت:
نزیکایەتی و یەکپارچەیی کۆمەڵایەتی یا خێزانی، پێکەوە بوون، هاودەردی و دڵسۆزی، ڕاستی و دروستی و ڕاستگۆیی، تەرخان کردنی کات بۆ یەکتری، توانست باری دەروونی و فکری، پەیوەندیەکان و تێفکرین و ورد بوونەوە لە دەرووبەر و دارشتنی پلان و بەربامەی تۆکمە بۆ رێگری کردن لە هەڵنەوەشانەوەی خێزان و تێکنەچوونی شیرازەی خێزان. 
مرۆڤ لە داهاتووی ژیانی کۆمەڵایەتیدا پێویستی زیاتری بەم تایبەتمەندیانەوە دەبێ تا سەروەت و سامان و تایبەتمەندیە ماتریالیەکان: 
تۆرەکانی کۆمەڵایەتی، ئابوری فریلانس یا سەربەخۆ، کێ بڕکێ، بازارە چڕەکانی ساغ کردنەوەی کاڵا، شارستانیەت و شارنشینی، گۆرانکاری لە ستراکتۆری ژیانی شارنشینی و جیهانگەرایی و هتد. 
واخەریکە ئەم جیهانەی ئێمە لەم قۆناغەدا تێیدا دەژین، لە رووی پەیوەندیە کۆمەڵایەتیەکان و پێکەوە بوون و تۆرەکانی پەیوەندی و نزیکایەتی و پێکەوە دوان و بەسەر کردنەوەی یەکتر، رووەو قۆناغێکی نادیار و هەژار لە رووی کۆمەڵایەتیەوە هەنگاو دەنێ و هەموو کونج و کەلەبەرەکانی ژیانمانی گرتۆتەوە. 
داهاتوو، مژدەی خەمهێنەری هەیە لەم بارەیەوە، بەوەی مرۆڤ لە ئاییندەدا زیاتر خەون بە گفتوگۆو دواندنی یەکتر و ئاخاوتن و یەکتر بینین و لایەنە گەرمو گوڕەکانی کۆمەڵایەتیەوە دەبینێ تا تێکۆشان و ڕاکردن لە پێناوی کۆکردنەوەو وەسەریەک نانی سەروەت و سامان و فەراهەم کردنی ئامرازە ماتریالیستیەکانەوە.  
لە کاتێکدا کەشی دەسپێکی رۆژێکی نوێ و رۆژانی بەیانی رەنگە هەموو ئەندامانی ماڵەوە لەسەر یەک سفرە کۆبکاتەوە،  لەهەمان کاتیشدا دەرفەتێکی گونجاوە بۆ بەهێز کردنی لایەنە سایکۆلۆژیەکەی پێکەوە بوون و بەیانی باش لە یەکتر کردن و دوور کەوتنەوە لە پەرتەوازەیی خێزانی و  بەهێز کردنی لایەنە کۆمەڵایەتیەکەی ژیان. بە واتایەکی تر ئەم پێکەوە بوونە لە دەسپێکی رۆژێکی تازە، دەبێتە هۆکاری بەهێز بوونی پەیوەندیە کۆمەڵایەتیەکان و دەرکەوتنی لایەنی سۆزداری و بیر خستنەوەی بوونی هەموو ئەندامانی بنەماڵە لە یەکەیەکی جڤاکیی بەهێز بە ناوی خێزانەوە.  
هەمان حاڵەت لە کاتی چوونە سەرکاریش تەواو راستە. لە یەکەم دەرکەوتن و بینینی هاوکارەکانی سەر کار و بەیانی باش لە یەکتری کردن و پیشان دانی رووەکی خۆش و بزەیەکی سەر لێو بەرامبەر ئەوانی ترەوە، کە شێکی وا دەخولقێنین هەموو هاوکارانمان هەست بە بوونی خۆیان و بەهای کارەکەیان بکەن و لە هەست کردن بە دڵەرواکێ و دڕدۆنگی( قەلەقی) دوور کەونەوەو ئەرکەکان بە ڕێكی ببەن بە ڕێوە. 
بەیانی هەموو رۆژێک دەکرێ وەک توخمێکی بەهێز سەیر بکرێت بۆ جۆشدانی پەیوەندیەکان و هێنانە کایەی دۆخێکی پر لە سەقامگیری دەروونی و جێگرکردنی کەشی کۆمەڵایەتی و لادان و نەهێشتنی لەمپەرە سایکۆلۆژی و پەستانە دەروونیەکان، کە رەنگە بە هۆکار و هۆی نادیاری وەک لێک تێنەگیشتن و ئاستی چاوەڕوانیەکانمان لە یەکتریەوە،  دروست ببن.  
ڕۆژانی " بەیانی"  دەکرێ وەک ساتەوەختی پێکەوە گەیشتنمان سەیر بکرێ، بەڵام بەو مەرجەی گشت ئامێر و ئامرازەکانی تێکنۆلۆژی و ئەلەکترۆنی لە خۆمان دوور خەینەوەو بەکار هێنانیان لەخۆمان و دەورووبەرمان قەدەغە بکەین و بۆ چەند ساتێکیش بێ لە دۆخی پڕ لە فشار و پاڵەپەستۆی تێکنۆلۆژیای گەیاندن و  تۆڕە کۆمەڵایەتیە جۆراوجۆرەکان و سەرچاوەکانی هەواڵ و زانیاری و فەزا و رووبەری فراوانی بێ هەست و نەستی مەجازی دابڕێین و رووەو ئاسودەیی دەروونیەوە، تەنانەت ئەگەر بۆ چەند ساتێکیش بێ،  هەنگاو بنێین. 
تێکنۆلۆژیا بە  گشت لق و پۆپەکانیەوە دۆخێکی پڕ لە فشاری دەروونی بۆ ژیانی ئەم سەردەمەی مرۆڤ دروست کردووە. ئێمە لە رووی دەروونیەوە زیاتر پێویستیمان بە پێکەوەیی و یەکتر دواندن و ئاخفتنە تا دابڕان و گۆشەگیری و نوقم بوون لە نێو جیهانی بێ چێژی مەجازی و دوور کەوتنەوە لە ژیانی کۆمەڵایەتیەوە. 
تێکنۆلۆژیا خەریکە سەرلەبەری ژیانی مرۆڤ دەخاتە ژێر کاریگەری نەرێنی خۆیەوەو توانست و تواناکانمان دەەخاتە ژێر گۆرانکاری جۆرایەتی و چەندایەتیەوە.  ئەم تێکنۆلۆژیایە وێڕای لایەنە باش و ئەرێنیەکانی، لێ کۆمەڵێک لایەنی خراپ و نەرێنیشی بۆمان بە دیاری هێناوە. لەوانە: 
ڕوداوو حاڵەتە پێشبینی نەکراوەکان، دڕدۆنگی، دڵەراوکێ، بێ متمانەیی، بڕوا بە خۆ نەبوون، ترس لە داهاتوو و لەوەی رەنگە رووبدات، زۆری وبۆری سەرچاوەکانی زانیاری و رۆتێنیاتی هەواڵ و  کەمی سەرچاوە راست و دروست و بروا پێکراوەکانی جیهانی مەجازی و کەشی پڕ لە نامتمانەیی و بێ خەوی و ترس لە داهاتوو.
ئێمە لە جیهانێکدا ژیان دەکەین پرە لە هۆکارەکانی ناسەقامگیری و تژیە لە زانیاری جۆراوجۆر و هەمەرەنگ و نەبوونی دڵنیایی لە راستی و دروستی ئەوەی دەیبینین و دەیبیستین.
ئێمەی ئەندامانی کۆمەڵگە ئەم چاخە، لەم قۆناغەی ئێستای ژیانی پڕ لە جەنجاڵیماندا زیاتر لە کۆمەڵێک مناڵی گرێدراوی کات و زەمەن و ساتەوەختە پر لە هەستەوەریەکەی ئێستا ئەچین، نەک کاراکتەرە کۆمەڵایەتیە پڕ لە جوڵە و چالاک و ئامانجدار و بەرهەمداری رابردوو.

نەوەی ئێستا
 نەوەی ئێستا، نەوەی کات و گرێدراوی ئەو زەمەنەن تیایدا دەژین و لە رابردوویان دابڕاون و لە داهاتوویان دڵنیا نین.
 نکۆڵی ناکرێ لەوەی ئەم نەوەیە لە رابردووی ژیانی و هەڵبەزو دابەزەکانی تەواو دابڕاوەو هیچ رویایەکی دیاریکراو یا خەونێکی ئەرخەوانی بۆ داهاتوویەوە نیە و هەشیبێ دۆخی سیاسی و کۆمەڵایەتی و ئابوری کوردستان هیچ ئاسانکاریەکی وای بۆ ناکات بگات بە خەونەکانیەوە، بەڵکو زیاتر سەرقاڵ کراوە بە گەمە و ململانێ سیاسیەکانەوە. ئەم نەوەیە لە کاتی هەڵبژاردنەکاندا زیاتر رەنگ و روخسار و ناوەرۆکی کاراکتەری کۆمەڵایەتی و ئاستی هزرو بیرو پێگەیشتوویی و تێگەیشتوویی سیاسی و بەرپرسیارەتی دەر ئەکەوێ و لە زۆر حاڵەتدا هەڵسوکەوت و رەفتارو لێدوان و چالاکیە مەجازیەکانی لە تۆڕە کۆمەڵایەتیەکان ( من ناوم ناوە کاروانسەرای بێ دەرگاو پەنجەرە)،  دەرخەری ئاستی خراپی رۆشنبیری و هۆشیاری سیاسی و کۆمەڵایەتی بەرپرسیارەتیەکانیەتی. 
ئەم نەوەیە لە دونیایەکی بێ یاسا و رێساو پرەنسیپی تایبەت بە خۆیدا دەژی و بە بێ پلان و بەرنامەیەکی تۆکمەو دیراسەکراوی دیاریکراوەوە، ژیان بەرێ دەکات و رووبەرووی ئاڵنگاری و سەختیەکانی دەبێتەوەو لە هەمان کاتیشدا چاوەڕوانیەکی لە رادەبەدەری لە دەرووبەروو کاراکتەرە سیاسی و کۆمەڵایەتی و ئابوری و سیستەمی سیاسی  و حوکمرانی و پارتە سیاسیەکانەوە هەیە. جێگەی نیگەرانیشە ئەوەی تا کو ئێستاش بۆ پێگەیاندنی ئەم نەوەیە  کراوە لە ئاست چاوەروانی و پێداویستیە مادی و مەعنەوی و رۆحی و دروونی و مۆرالیەکاندا نەبووە.
لە ساڵانی حەفتاکان، هەشتاکان و نەوەدەکاندا مرۆڤ یا رووی لە فەردگەرایی ( تاک گەرایی) کردبوو یا کۆمەڵخواز و دژە فەردگەرا بوو. ئەمڕۆ ئێمە کۆمەڵێک تاکین بە جۆرەها حەزو ئاواتی جیاوازەوەو لە نێو یەک بۆتەی کۆمەڵایەتی بە ناوی جڤاکەوە تەوق دراوین. رەنگ و ناوچە و زۆنەکان وایان لێکردووین گەر بمانەوێ بێ کێشە ژیان بەڕی کەین، بە بێ دوو دڵیەوە ناچارین یەکڕەنگ و یەک هزر و یەک هەڵوێست و یەک بۆچوون بین. 

یەک بیرو یەک هەڵوێست
دۆخەکە وادەخوازێ جیاوازی بیر کردنەوە و هەڵوەستە کردن لەسەر پێشهات و ڕووداوەکانی دەورووبەرمان گەرەکە وەک ( هی هەمووان) بێت و بۆن و بەرامەی ( گشتی) لێ بێت.  ئەم دۆخە ناخۆش و ناجۆرە, جیاوازی بیرکردنەوە قەبوڵ ناکات و تەوژمی هێزو شەپۆل و تەنانەت کەشی کۆمەڵایەتیە باڵادەستەکانی تایبەت بە شارو شارۆچکە و ناوچەی بچوک بچوکیش زوو دەتخەنە پەراوێزەوە و مۆری ( نەیار یا هەڵگەراو) پێوە دەنێن.  
ئێمەی مرۆڤ بە سرووشت واین و لە رووی سایکۆلۆژیەوە بەردەوام بە دوای ئەو کۆمەڵ و یەکێتی و گرووپانەدا دەگەڕێین بەرژەوەندیە تایبەتی و شەخسی و شوناس و خواست و ئاواتەکانمان مسۆگەر دەکەن، لێ یەکسەر لەو گرووپانەش یاخی دەبین ئەگەر هاتو بەرژەوەندیەکانمانیان وەلا نا و خواستەکانمانیان خستە پەراوێزەوەو هیچ نرخێکیان بۆ بوون و ئامادەییمان لە ناو بۆتەی یەکە کۆمەڵایەتی یا سیاسیەکە دانەنا. 
رۆژانی بەیانی ( سپیدە) ئەو سەرەتا نەگۆر وسەقامگیرو گونجاوو جێگری ژیان و چالاکین، دەرفەتی ئەوەمان هەیە ژیان بە فۆرم و ناوەرۆکێکی مەعنەوی و نرخ دانان بۆ یەکتر و بەهابەخشین بە بوونی یەکترەوە دەست پێ بکەین، بە بێ ئەوەی چاوەروانی هیچ شتێکی تایبەتی و دەسکەوتی مادیمان هەبێ لە بەرامبەرەکەمانەوە.  
بەیانیتان باش، رستەیەکی کورت، بەڵام مانادار و بەهادار و کاریگەر و بێ باجە و وتنەکەشی هەڵگری کۆمەڵێک مانا و مەغزای بەهادار و رێزگرتنە لە بەرامبەر.