هەندێک کەس پێی وایە ئەگەر سیاسەتت کردو جنێوو بێڕێزیشیان بەرامبەر کردیت نابێ قسەبکەیت. ئەم جۆرە کەسانە زۆر بەهەڵە لە مەنتیقی دیپلۆماسی گەیشتون و، دیارە لایان ئاساییە هێرش بکرێتە سەر کەرامەتی نەتەوەیی و نیشتیمانیت و تۆش بێدەنگی لێ بکەیت. ئەو کەسانەی خاوەن ئەم جۆرە لە بیرکردنەوەن، هەر هیچ لە سیاسەت نازانن، ئەوەی فێربون من ناوی دەنێم (سیاسەتی تەشریفات). سیاسەت بەتەنیا کۆمپرۆمایس نییە، بەڵکو بەرەوڕوبونەوەشە.

بەپێی ئەو زانیاریانەی لەڕێی ڕاگەیەندنەکانەوە لەبەر داست دان، دەوڵەت باخچەلی سەرۆکی حیزبی شۆڤێنیستی تورکی (مەهەپە) لە تویتێکدا گوتویەتی نەخشەی کوردستان دەخەینە ژێر پێڵاوەکانمانەوە. بەهەرلایەکدا ئەم قسەیە لێکبدەینەوە لە دو حاڵەت بەدەر نییە، یان ئەوە تا ئەم بەشەرە گێل و نەزانەو عەقڵی خۆی لەدەستداوە، کە بەم جۆرەو ڕاشکاوانە ئیهانەی گەورەترین میللەتی بێ دەوڵەت لەسەر گۆی زەوی دەکات، یانیش شیری باپیرەگەورەکەی (ئاتاتورک) سەدلەسەد پێ حەڵاڵەو لەڕێبازی شۆڤێنیستی و فاشیستیی ئەو لای نەداوە. دەبێت کەسێک چەندە کۆیلەیەکی ڕقاویبێت، کە تەنانەت خەونیش بە میللەتێکی مەزڵوم ڕەوا نەبینێت. چونکە کێشانی نەخشەی سنورە پیرۆزەکانی کوردستان لەسەر پولێک وەک دیارییەک بۆ پاپا، خۆ ڕاگەیاندنی دەوڵەتی سەربەخۆی کوردستان نییە، بەڵکو ئاماژەیە بۆ خەونێک. هیچ میللەتێکی سەردەست و خاوەن دەوڵەت ئازاد نییە، هەتا ئازادی بە میللەتانی بندە ست ڕەوا نەبینێت.

لێرەدا پێویست بە گوتاری دورو درێژو بەڵگە هێنانەوە ناکات. چونکە مافێک خوای گەورە بە ئینسانی هەدیە کردبێت، بەڵگەنەویستە. خاکی پیرۆزی کوردستان ماف و دیاری خوای گەورەیە بۆ دانیشتوانی و، ماڵی هەمیشەیی میللەتی کوردو هەمو ئەو کەمە نەتەوەو ئایینانەیە کە تێیدا دەژین و، هەزاران ساڵە چارەنوسیان بەم خاکە پیرۆزەوە گرێ دراوە. منیش نیشتیمان، ئاڵا و سەرتاپای مێژوی ئەو کەسەی کە نەخشەی کوردستان دەخاتە ژێر پێڵاوەکانییەوە، نەک هەر دەخەمە ژێر پێم، بەڵکو فڕێشی دەدەمە ناو ئاوەڕۆی مێژوەوە.

تێبینی:
ئەم نوسینە تەعبیر لە بۆچونی شەخسی خۆم دەکات، هەمو کەسێک ئازادە لەگەڵی بێت یان دژی.