ڕووداوەکان و ناکۆکی و ململانێی کورد لە بەغدا کە هەندێک لە ڕاگەیاندنەکان ناویان ناوە (ناکۆکی کوردیی)، لەڕاستیدا لای من ناکۆکی و نەخۆشی و وشڕەفکری هەندێک گروپ و لایەنی کوردییە لەبەغدا. لەم بابەتەدا گەرەکمە قسە لەبارەی سێ شت بکەم (گوتار) و (هێزی کوردی) لەمەیەندا کورد دەرخەری هێزەکەیە و ئەوی دیکەش (کوردی بە هێزە)، واتە هێزەکە دیارخەری خودی کوردە دەبێت. لەکردەوەدا گومان لە هێز کوردیی و کوردی بەهێز و لەسەروی هەرتک شتیشەوە گومانێکی پشتڕاستکراوەم لە خودی گوتارەکەشیان هەیە.
سەرەتا دەمەوێت بێژم ئەوەی پەیڕەوی دەکەن (گوتار) نییە، بەڵکو ڕق و کاردانەوە و ددان لێکچیڕکردنەوەیە، بەشێکە لەنەخۆشی و دەردە کورد، ئەوانە بەناوی کورد دەئاخڤن لەکاتێکدا هیچ پێناسە و ناسنامەیەکی ڕەسەنی کوردیان بە گوتارەکەیان نەهێشتۆتەوە و بەئاشکرا لەتکردن و شکاندنی کورد بەشانازیی بۆ خۆیان وەسف دەکەن. لایەنە ئیسلامییەکان (کۆمەڵ و یەکگرتوو) (عەلی)ش لە سعودیەوە دەیانەوێت دەمارگیرانە بڵن ئیسلام سەڕاست و پاک و ویژدان ڕزاو نین و ئێمەی گەنج ئازاین، بوێرین، لەکاتێکدا گوتاری سیاسی پێویستی بە عەقڵ و لۆژیکە، نەک هەڵچوون و تووڕەیی و بەسادەیی خۆبەستنەوە بەوانی دیکە.
هێزی کورد لەبەغدا لەچییەوە سەرچاو ەدەگرێت؟ لەدابەشبوون و ململانێ و دژایەتی یەکتر، یان ڕێککەوتن؟. لە قسەکانی گروپەکەی (یەکگرتوو و کۆمەڵ و هەڵوێست ڕاستەوخۆ و بێ پەنادان و بە نیمچە شانازیی و پاکانەوە (عەلی) و (موسەنا) ڕایانگەیاند ئەوان هەر سێ گروپ کە داوایان لە (نەوەی نوێ)ش کردووە ئەوان ئامادە نەبوون، دژایەتی (پارتی و یەكێتی) لە بەغدا دەکەن، لە هەڵبژاردنی سەرۆکایەتی پەرلەمان بەئاشاکرا داژیەتی (پارتی دیموکراتی کوردستان)یان کرد، بەمەش نیشانیان دا، بەکردەوە نایانەوێت کورد یەکهێز بێت، یان هێزی کوردی لەبەغدا کاراو و یەکگرتوو بێت. سەرباری ئەوەش (پارتی و یەکێتی) بەهۆی لێکدووریان، یان گواستنەوەی کێشەکانی کوردستان و بەستنەوەیان بە بەغدا، دەرفەتێکی مەترسیداریان دروستکردووە، کە کورد لە بەغدا خاوەنی هێز نەبێت.
(عەلی حەمە ساڵح) و (موسەنا ئەمین) بەشانازییەوە ستاسیشی خۆیان وەکو پاڵەوانێکی سەرکەوتوو لە لەتکردن و پووکانەوەی هێزی کورد لە بەغدا ئاماژە پێ دەکەن. (عەلی) لەتەک هێرشێکی ڕاستەوخۆ دژی پارتی، یەکێتی شووشتەوە و ئاشکرای کرد لە گەڕی یەکەم و دووەم یەکێتی بێ ڕێککەوتنی پێشوەختە، وەکو کاردانە وە دژی پارتی دەنگی بە کاندێدەکانی ئەوان دژی کاندێدەکەی پارتی داوە، بەڵام لە گەڕی سێیەم یەکێتی دەنگی بە کاندێدی پارتی داوە، ئەمەشی وا وەسفکرد کە "یەکێتی بایداوەتەوە و بە جۆرێک لە سوکایەتی گوزارشتی لە هەڵوێستی یەکێتس کرد". کاتێک سیاسەت وەکو گەمەی منداڵانی لێ دێت و دەبێتە فشقیات و دامەکردن بە پشقل. ڕەوشەکە وای لێ دێت. لێدوانەکەی ئەم کەسانە نیشانی دەدات، (کۆمەڵ و یەکگرتوو و هەڵوێست) لەپێناو دابەشکردن و لێدانی پێگەی پارتی و یەكێتی هیچ سنوور و گومان و حەرامخواردنێکیان بۆ خۆیان نەهێشتۆتەوە، هیچ گومانی تێدا نییە، ناتوانن پارتی و یەکێتی تێکبشکێنن، بەڵام دەتوانن هێزی کوری لە بەغدا ناشیرن و لاواز و باڵکراو بکەن. ئەوان نایشارنەوە لاوازکردنی هێزە کوردییەکان بە سەرکەوتن دەزانن، دیارە ئەم سەرکەوتنە ڕیشەیەکی تووندی بە خۆبەستنەوە بە دوژمنە سەرسەختەکانی کورد لە بەغدا هەیە.
بڕوام وایە نە سیاسەت و تیۆری (کۆنترۆڵی پارتی) و نە (تیۆر و فکرەی ئاژاوەی دروستکراوەکانی یەکێتی) بیرۆکەی سەرکەوتوون بۆ ئیدارەدانی ململانێ و کێسشەکان گونجاون، پێویستە گریمانە بۆ ڕێگەیەکی دیکەی گونجاو بۆ داڕشتنەوەی پەیوەندییەکان و ئیدارەی ناکۆکییەکان بدۆزنەوە، کە هاوسەنگی و متمانە و هاوبەشی تێدا بێت.
کوردی بەهێز دەبێت کێ بێت؟ کورد لەچەند ڕێگەیەکەوە بەهێز بێت:
یەکەم: یەکدەنگی و یەکڕیزی و تەبایی و ڕێککەوتنی هەموو گروپە کوردییەکانە لە بەغدا، یان ئەوەی ئێستا کراوەتە بەسێک لەفەلسەفەی ءەم سێ گروپە و بەئاشکرا و بێ شاردنەوە دەبێژن "ئێمە نایەلین پارتی و یەکێتی هیچ شتێکیان لە بەغدا هەبێت".
دووەم: بەدەستهێنانی زۆرترین دەنگ و کورسیی لایەنێکی دیکەی ململانێی هەڵبژاردن و یاسایە، ئایا دەبێتە هۆکار بۆ بەهێزی کورد.
سێیەم: هاوپەیمانی و ڕێککەوتنە لەگەڵ لایەنە عەرەبییەکان لە بەغدا.
چوارەم: پابەندبوون بە بەرژەوەندییە نیشتمانییەکانی هەرێمی کوردستان، نەک خۆبەستنەوە بە وەهمی دوژمنی پاک و چاک و دڵسۆز.
پێنجەم: ئەوەی پێی وایە لە بەغدا دەتوانێت دەسەڵاتی هەرێم و لایەنەکانی دەسەڵات بڕووخێنن، بە ئەزموون دەرکەوت بیرۆکەیەکی فاشیلە، ئەم ئاراستەیە نەک هەر مەترسیدارە، بەڵکو ناسنامەی سیاسی ئەو لایەنانەش دەگۆڕێت، کە بە قەناعەت و ڕوونی پێیان وایە ناهێلن پارتی و یەكیتی لە بەغدا هیچ پێگە و توانا و هێزێکیان هەبێت.
کوردی بەهێز، یان لایەنە بەهێزەکانی کورد لە بەغدا ئەوانەن، کە داکۆی لە مافە بنەڕەتی و سیاسی و دەستوورییەکانی هەرێم و بەهێزکردنی هەرێم دەکەن و لەکوردستانیشدا کار بۆ سەپاندنی دادپەروەریی و پەرەپێدانی دیموکراسی دەکەن. بە واتایەکی دیکە کوردی بەهێز ئەو کاتە بەدی دێت، لە بەغدا بەیەکەوە پەرپە بەتەبایی و هاوسەنگ بوون دەدەن و لە کوردستانیش ململانێیەکی شارستانی و دیموکراسی دەکەن.
لەبەغدا پێویستمان بە هێزی کورد و کوردی بەهێز و گوتارێکی کوردستانی تەباو لۆژیکی و هاوسەنگ هەیە، بیرۆکە و قەناعەتی بەکارهێنانی ناحەز بۆ ڕووخاندنی دەسەڵاتی خۆماڵی کوردی کارێکی شەیتانانەیە و بێ باج و بەلاش و بێ بەرانبەر ئەنجام نادرێت. لەکردەوەد هەندێک "درۆ و سیاسەتیان" تێکەڵ کردووە، ئەمەش تەنیا خۆیان پێی نازانن، دەنا بەشی زۆری خەڵک شوکور هوشیارن و پێی دەزانن.