شانازی به‌ناسنامه‌ی عێراقه‌وه‌!

دانا مه‌نمی‌
  2020-09-04     801
دیارە گەلی کورد ئەو هەموو خوێنەی داوە و ماڵوێرانیەی بینیوە لە پێناو وەدەست هێنانی ماف و سەلماندنی شوناسەکەی بوو ، نه‌ك له‌ پێناو عێراق و شانازیكردن به‌ عێراقچێتیه‌وه‌ ، پارتی له‌ ژێره‌وه‌ پێشبركێیه‌تی له‌سه‌ر عێراقچێتی و به‌رده‌وامیش هه‌وڵ ئه‌دات  پێش هه‌رلایه‌نێكی تر دڵسۆزی خۆی بۆ عێراقی یەکگرتوو خاوه‌ن سه‌روه‌ری بسەلمێنێ، ئه‌م ئیدعایه‌ی كه‌ ئه‌مڕۆ نێچیرڤان بارزانی سه‌رۆكی هه‌رێمه‌كه‌مان له‌ كۆبونه‌وه‌ی له‌گه‌ڵ سه‌رۆكوه‌زیرانی عێراق كردی له‌باره‌ی ئه‌وه‌ی كه‌ ( کورد شانازی‌ به‌ناسنامه‌ی‌ عێراقیبوون ده‌کات)! ئه‌ی كه‌واته‌  ئەو هەموو خوێن و ماڵوێرانی و ئەنفال و کیمیاباران و ئاوارەیە لە پێناو چی بوو؟ ئه‌ی بۆچی ریفراندۆممان ئه‌نجام داو مه‌سعود بارزانی سه‌رۆكی ئه‌نجومه‌نی باڵای ریفراندۆم گووتی :من هەرگیز خۆم شەرەمەزاری‌ میڵەتەکەم ناکەم، ئەگەر ریفراندۆم سەری‌ نەگرت بڵێن ئەو پیاوە شێت بووە سواری‌ سەری‌ خۆی‌ بووە !

منێكی ریفراندۆمچی كه‌ به‌ شانازییه‌وه‌ ده‌نگم به‌ڵێ بووه‌ وخەباتمان بۆ کوردایەتی و پاراستنی شوناسی کوردبوون بووە ، تۆیه‌كی كوڕه‌ شه‌هید  کە ڕۆژانێک باوكی ئازیزیت لە پێناو خاک و کوردایەتیدا گیانیان بەخشیوە ، ئه‌وێكی زیندانی سیاسی له‌پێناو كوردایه‌تی و كوردبوندا زیندانی كراوه‌و ئازارو ئه‌شكه‌نجه‌ی چه‌شتووه‌ ،كه‌سوكاری ئه‌نفاله‌كان و هه‌ڵه‌بجه‌ییه‌كان و گه‌رمیانیه‌كان ،ئێستا چۆن  شانازی بەعێراقی بوونی خۆیانەوە بكه‌ن ؟! ئێ خۆ حوکمڕانانی عێراقیش هەرلە مەلیکەوە تا سەددام هەر ئەوەیان لە گەلی کورد دەویست کە شانازی بەعێراقی بوونی خۆیانەوە بکەن ، خۆئه‌گه‌ر كاتی خۆیشی ئۆكه‌ی بۆ ئه‌و شانازییه‌ بكرایه پێویستی به‌شۆرش نه‌بوو خه‌ڵكیش‌ ژیانێکی شاهانە دەژیاو گه‌لی كوردیش به‌ر شاڵاوی ئه‌نفال و كیمیاباران و جینۆساید و ته‌عریب و ترحیل نه‌ده‌كه‌وت .

عێراق به‌ درێژایی مێژووچ وه‌كو ده‌وڵه‌ت وچ وه‌كو ده‌سه‌ڵات عێراقێكی یه‌ك پارچه‌ و خاوه‌نی گه‌لێك به‌ناوی عێراقه‌وه نه‌بووه‌ ،هه‌موو هه‌وڵ و ته‌قه‌ڵاكان نه‌یتوانی گه‌لێكی یه‌ك ڕه‌نگ له‌ عیراقێكی یه‌كپارچه‌دا بنیات بنێ كه‌ شانازی به‌ ناسنامه‌ی عێراقه‌وه‌ بكه‌ن ،شا فه‌یسه‌ڵ له‌ یاداشته‌كانیدا كه‌ له‌كۆتایی بیسته‌كانی‌ سه‌ده‌ی بیسته‌مدا ئاماژه‌ی پێكردووه‌ دان به‌وه‌دا ده‌نێت كه‌ نه‌یتوانیوه‌ گه‌لێك دروست بكات شانازی به‌ ناسنامه‌ی عێراقیبونه‌وه‌ بكات ، هه‌نوكه‌شهه‌موو هێماو ئاماژه‌ی رووداوه‌كان سه‌باره‌ت بە دۆخی عێراق و ئایندە و چارەنووسی عێراق ئەوەندە ئاڵۆزە و تاریکه‌ كه‌ هیچ كه‌س به‌رپێی خۆی نابینێت ، له‌ ئه‌جیندای هه‌ر هێزێكدا جه‌مسه‌رو سیناریۆی جیاوازی دژ به‌یه‌ك هه‌یه‌ .

دوالیزمی گوتاری سیاسی پارتی له‌ مامه‌ڵه‌كردن له‌گه‌ڵ عێراق جۆرێكه‌ كه‌ له‌ ناشرینیدا پێشینه‌ی نیه ، پارتی هه‌ڵگری شوناسی  ״عێراقچێتی״ ـیه‌و ته‌خوینی هه‌ر لایه‌نێكیش ده‌كات كه‌ هه‌ڵگری ئه‌و شوناسه‌ بێت ، پارتی بۆخۆی زۆرترین خزمه‌تی به‌ ڕه‌وتی عێراقچێتی كردووه‌و پێگه‌ی عێراقچێتی له‌ دوای شكستی ریفراندۆمه‌وه‌ به‌ گوتارو كردار قایمتر كردووه‌ و خۆی چه‌ماندووه‌ته‌وه‌ ،مامه‌ڵه‌ی میدیای پارتی هیچ كات مامه‌ڵه‌یه‌كی زانستی و واقیعی نه‌بووه‌ ، نه‌یتوانیوه‌ وێنه‌كان وه‌كو خۆی بگوازێته‌وه‌ به‌ڵكو ڕوانگه‌یه‌كی گۆڵبزانه‌ بووه‌ ،‌ گەر كەمێك شەرمتان لەو دروشم و بانگه‌شانەی كە حزب و بنه‌ماڵه‌كه‌تان به‌ناوی ڕیفراندۆم و دروستكردنی ده‌وڵه‌تی كوردی‌ به‌رزتان كردووه‌ته‌وه‌ بكردایه‌ ،باوه‌ڕتان به‌ سەربەخۆیی كورد هەبوایە ، هیچ كات شانازیتان به‌ ناسنامه‌ی عێراقچێتییه‌وه‌ لێنه‌ده‌دا !

 

وتاری زیاتر

زۆرترین بینراو
بنەماڵەی وەستا حەسەنی كەبابچی باس لە روداوی كوژرانی كوڕەكەیان دەكەن
عەلی باپیر: ئومێدم نەماوە بەرپرسانی گەندەڵ و پۆخەڵی ئەم هەرێمە بتوانن چاك ببن
شاندێکی ئێران لە سلێمانی چونە ناو کەمپی حزبەکانی ڕۆژهەڵاتەوە
شاڵاو عەلی عەسکەری: کۆدەنگی لەسەر کەمکردنەوەی ژمارەی ئەندامانی ئەنجومەنی سەرکردایەتی هەیە
ته‌لار له‌تیف: زیاتر له‌ 200 ئه‌ندامى كۆنگره‌ پێشنیاریان داوه‌ته‌ لیژنه‌ى په‌یڕه‌وى ناوخۆ
بەرهەم مستەفا: مامۆستایان تەنها بۆ موچە دەچنە ناوەندەكانی خوێندن و بایكۆت بەردەوامە
"هەڵبژاردنی ئەندامانی سەرکردایەتی یەکێتی دەکەوێتە سبەینێ یاخود یەکشەممە"
په‌رله‌مانتارێك: ئه‌نجامی لێكۆڵینه‌وه‌ له‌ رووداوه‌كه‌ی حه‌مدانییه‌ پێچه‌وانه‌ی به‌ڵگه‌ و راستییه‌كان ده‌بێت
لیژنه‌ی دارایی په‌رله‌مانی عێراق جه‌ختی كردوه‌ته‌وه‌ ده‌بێت موچه‌خۆرانی هه‌رێم هه‌ر 30 رۆژ جارێك موچه‌كانیان وه‌ربگرن
مستەفا چاوڕەش: تەنها 15 مادەی ناو پەیڕەوی ناوخۆ پەسەندکراوە ئەوانی تر ماوەتەوە بۆ سبەینێ
© 2023 Awene Online, Inc. All Rights Reserved.
×