ئەمڕۆ لە دەزگا ناسراوەکانی ڕاگەیاندن گرتەیەکی ڤیدیۆم بینی (بافل جەلال تاڵەبانی) لە وەڵامی پرسیاری ڕۆژنامەنووسێک دەڵێت "کەی کاتی نەوەی نوێیە، حوشتر". لەم دەربڕینە چەند شتێكمان بۆ ساخ دەبێتەوە. لەوانە:
ڕۆژنامەنووسەکە کەسێکی دیار و بە کردەوە ڕۆژنامەنووس بێت، یان نا، بەرپرسە لە پرسیار و پێویستە رێز لەکەسایەتی و پیشەکەی بگیرێت. ئێمە دەزانین ڕۆژنامەنووس لە هەموو دونیا، بەتایبەت لەو شوێن و جوگرافیایانەی دیموکراتین و یاسا باڵادەستە، وەکو کەسایەتییەکی مەعنەوی و پیشەیی و پێشەنگ دیقەتی لێ دەدرێت. ئەو ڕێز لەپیشەکەی خۆی دەگرێت و سنووری پەیوەندییە سروشتییەکان نابەزێت، هەروەها دەزگا فەرمی و هێزە سیاسییەکانیش دەبێت وەکو کەسانی خودان پێگە و پارێزراو سەیری ڕۆژنامەنووس و دەزگاکانی ڕاگەیاندن بکەن.
لەئالەکی دندا ڕۆژنامەنووسان و ڕۆشنبیران هەردەم داکۆکیکەری پیشە و کەسایەتی خۆیانن، پێش ئەوەی داکۆکی لە هەقیقەت و بەدەستهێنانی زانیاری و ئەرکە پیشەییەکەیان بکەن.
سیاسییەکان و هێز و کەسایەتییە باڵادەستەکان هەر چییەک بن و لەهەر پلە و پایە و پێگەیەک بن، هەر گاڤێک سوکایەتی و هەڕەشەیان کرد و هەنگاویان بۆ شکاندنی پیشەی ڕۆژنامەنووسی و خودی ڕۆژنامەنووس نا، واتا بەکردەوە پێشێلی مافی ئازادی دەربڕین و ئازادانە بەدەستهێنانی زانیاری و کاری ڕاگەیاندن کردووە. ئەو زاراوەی (بافل جەلال تاڵەبانی) سەرۆکی (یەکێتی نیشتمانی کوردستان) بەرانبەر ئەم ڕۆژنامەنووسە بەکاری هێنا نیشانەیەکی مەترسیدارە بۆ داڕمان و تێکچوونی پەیوەندی ڕێزلێگیراو و متمانەداری نێوان سیاسییەکان و دەزگاکانی ڕاگەیاندن و خودی ڕۆژنامەنووس و جۆرێکیشە لەهەڕەشەی ناڕاستەوخۆ بۆ بێدەنگکردن و دەمگرتنی ناپەسەندی ڕۆژنامەنووسەکان. لەهەمان کاتدا سووکایەتی و هەڕەشە و ناشیرین نیشاندانی کردەی دیموکراسییە، کە لەکردەوەدا ئەو دەڤەر و جوگرافیایە بەپێی ئەم ڕەفتارانە بێت، دۆخەکەی نیمچە کابۆیی و سنوور شکاندنی بەها پیشەییەکانی ڕاگەیاندنی تێدایە و داڕمانی پەیوەندی سروشتی نێوان سیاسەت و ڕاگەیاندن نمایش دەکات، هەروەها ئەم ڕەفتارە نیشانی دەدات، کە ڕۆژنامەنووسان لە جیاتی گوللە لەرێگەی بەکارهێنانی (وشە و بە قسە) دەکوژرێن و کەسایەتیان بریندار دەکرێت و پیشەکەیان بە کارێکی نەگونجاوی بێ بەها و دوور لەڕەفتاری مرۆڤانە و بێ بنەما دادەنرێت.
یەکەم جارە لە نێو کەتواری سیاسی کوردستان ڕۆژنامەنووس بەم ئاشکرایە و لەبەردەم ڕاگەیاندن و ڕۆشنبیران و دامەزراوەکان و ڕای گشتی بێ منەتانە بە (حوشتر) وەسف بکرێت و وەسفکردنەکەش لەلایەن کەسی یەکەمی هێزێکی سیاسی کاریگەر بەکار بهێنرێت.
بۆیە پێویستە ڕۆشنبیران و خودی ڕۆژنامەنووسان ئەم دەستەواژە کەرامەت شکێنانە ڕیسوا بکەن، بێدەنگی بەرانبەر ئەم وەسف و ڕەفتارانە بنەمای پاشکۆبوون و کۆیلەبوون بۆ هێزی سیاسی بەهێز و فراوانتر دەکات.
پێویستە خودی ڕۆژنامەنووسەکە و ئەو دەزگایەی کاری تێدا دەکات، سکالای یاسایی بەپێی یاسا تۆمار بکات.
پێویستە ڕۆژنامەنووسان وەکو پیشە داکۆکی لە کەسایەتی و پیشە و بنەما سەرەکییە متمانەدارەکانی کارەکەیان بکەن.
وەکو جۆرێک لە ناڕەزایەتی و ڕەتکردنەوەی ئەم جۆرە ڕەفتارە خراپە نا سەردەمی و دژ بە دیموکراسییەی (بافل تاڵەبانی) ناونیشانی ئەم بابەتەم کردە (حوشترنووس) هەر چەندە ئەو مەبەستی (ڕۆژنامەحوشتر)ە و منیش مەبەستم خراپ وەسفکردنی ڕۆژانمەنووس نییە، کە لای من کارەکەی پیرۆز و گرنگە، پیشەکەی لە دەیان وەزیر کاریگەرتر و چاکترە. ئەو بەم ئاخاوتن و رەفتارە ڕاستەوخۆ و بە زەقی هێرش دەکاتە سەر خودی کەسەکە، کە پرسیاری لێ دەکات. هیچ کاتێک ئەو کەسانە ئازاد و ئازا نین، کە دەیانەوێت سووکایەتی بە کەسانی دیکە بکەن بێ ڕەچاوکردنی بەها کۆمەڵایەتی و پیشەییەکانی بەرانبەرەکەیان و بەم جۆرە دەستەواژانە سەرکوت و سەرشۆڕ و پیشەشکێنیان بکەن، هیچ کاتێک دیموکراسی ڕێگا بە هیچ هێزێک و کەسێک نادات ناوزڕاندنی بەرانبەرەکەی وەکو پاڵەوانیەتی و مۆدێل و تێکشکاندنی سنوورە باوە کۆمەڵایەتییەکانی نێو کۆمەڵگەی سیاسی بۆ دەمکوت و سەرکوت و بچووککردنەوەی بەرانبەرەکەی بەمەبەست و پێداگرییەوە بەکاربهێنن.