عەلی زەیدی سەرۆک وەزیرانی عێراق، هەڵمەتێکی!! بۆ بەدواداچوون و لێپرسینەوە لە سەرەوت و سامانی بەرپرسانی عێراق و گرتنە بەری رێکاری یاسایی لە دژیان دەست پێکردووە... ئەم هەنگاوەی عەلی زەیدی لەگەڵ ئەوەدا هەوڵێکە بۆ نیشاندانی دیمەنی پاکی کابینەکەی و وەستانەوە بەرووی دزی و گەندەڵیدا کە وەکو خۆرە لە داهات و سامانی عێراقی داوە، بەڵام لە بنەرەتدا هەوڵێکە بۆ خۆجیاکردنەوە لە کابینەکانی پێشخۆیی و رزگارکردنی دەسەڵاتی بۆرژوای عیراق لە نارەزایەتی و رەخنەی ئاشکرای خەڵکی بێبەشی عێراق لەو دزی و تاڵانییە ئاشکرایەی بەدوای دەسەڵاتی بەعسدا بێ وەستان دەستی پێکردووەو درێژەی هەیە.
زیاتر لە دوو دەهەیە بەرپرسانی حزبی و حکومی عێراقی و زیاتر لە ٣ دەهەیە بەرپرسانی حزبی و حکومی هەرێم و بنەماڵەکانیان... دەستیان ناوەتە بینەقاقای داهات و سامانی عیراق و کوردستان، کە لە بنەڕەتدا ئەو سامان و داهاتە زۆر زەبەندە نەک دەیتوانی ئاسەوارێک لە هەژاری و گرانی و نەبوونی خزمەتگوزارییەکان و پیداویستیەکانی ژیان و گوزەرانی هاوڵاتیان نەهیڵێ، بەڵکو دەیتوانی ژیانێ تەسەل و خۆش گوزەران بۆ هاوڵاتیان زامن بکات، بەڵام بەهۆی ئەو دزی و تاڵانییە بێ سنورەی کە بەرپرسە حزبی و حکومیەکان، لە ئەندام پەرلەمانەوە بۆ وەزیرو گزیرەکان، لە سەرۆکایەتی کۆمارەوە بۆ بەڕیوەبەرە گشتیەکان ...تاد ئەنجامی دەدەن، لەلایەکەوە ژیانێکی شاهانە و فیرعەونی بۆخۆیان و بنەماڵەکانیان پێکهێناوە و بوونەتە ملیۆنیر و ملیاردیر، لەلایەکی تریشەوە خەڵکی عێراق و کوردستان بەتایبەتیش ژیان و گوزەرانی چینی کرێکار و خەڵکی کەم دەرامەتی لەگەڵ گەورەترین سەختی و نەبوونی و هەژاری بەرەوڕوو کردۆتەوە... عیراق و هەرێمیان لە خزمەتگوزارییە زۆر سەرەتاییەکان داماڵیووە، لەوەش زیاتر تاهاتووە خزمەتگوزارییە گشتیەکانیان هەزران فرۆشی کەرتی تایبەتی کردووە و لەو ڕیگایەوە بە ملیۆنەها و ملیارەها دۆلاریان کەڵەکە کردووە، لە بەرامبەردا خەڵکی دەستەنگی عیراق و کوردستان بۆ چارەسەری نەخۆشییەکان رووبەرووی مۆتەکەی مەرگ کردۆتەوە... بە دەیان و سەدان کۆمپانیا و باڵەخانەی قازانجهێن و بەدەیان خەستەخانەی تایبەت و بەسەدان مزگەوت بۆ پاڕانەوەی هەژارانیان قوت کردۆتەوە، کەچی هیشتا بنکەی تەندروستی و خەستەخانەی گشتی پێویست نەک هەربوونی نییە، بەڵکو هەر نەخۆشیەکی قورس بۆ هەر خێزانیکی هەژار یەکسانە بە مەرگ و مردنی دەست ئەنقەستی قازانج پەرستی سەرمایە.
نەبوونی قوتابخانە و زانکۆ و پەیمانگای سەردەمی و پێویست و گشتی بۆ هەمووان، لەجێگایدا کردنەوەی دەیان و سەدان قوتابخانەو پەیمانگاو زانکۆی تایبەت، کە پرۆسەی خوێندن و پەروەردەو زانستی بەرەو داکشان و سەختی بردووە. ریگاو بانەکان تاکو ئیستا وێرانەن و رۆژانە خراپی رێگاکان مەرگی ئینسانەکانی دەچنێ. بازار بۆتە مەیدانێک بۆ ساغکردنەوەی خراپتیرین کاڵا و شیواندنی ئاسایشی خۆراک... هیشتا کێشەی ئاو و کارەبا چارەسەر نەبووەو لەو جێگایانەی شانازی بە کارەبای ٢٤ کاتژمێرییەوە دەکرێت، هاوڵاتیانی نەدار بەهۆی گرانی نرخەکەیەوە توانای کەڵک وەرگرتنی پێویستیان لێی نییە. تاکو ئیستا خەبەریك لە بیمەی بیکاری و تەندروستی نییە... تاکو ئیستا بە هۆی نەبوونی هەلی کار و ئایندەیەکی ڕۆشنەوە لاوان و هیزی کاری ئامادە، یان بە لەشکری بێکارانەوە پەیوەست دەبن یانیش ناچارن بەناو تەلی دڕکاوی و شەپۆلی شێتانەی دەریاکاندا رێگای هات و نەهات و رزگار بوون لەدەستی "نیشتیمان" هەڵبژێرن.
ئەو سەدان ملیۆن و ملیار دۆلارەی لە چەند دەهەی رابردوو لەلایەن بەرپرسانی حزبی و حکومی دزراوە و لە سێکتەرەکاندا گەندەڵی هەڵی لووشیوە، یان لەبۆرسەی سپی کردنەوەی دراودا کەڵەکە کراوە، بۆتە هۆکاری ئەو ئاستە بەرزە لەو دۆخە سەختەی چینی کریکار و خەڵکی نەداری عێراق روبەرووی بونەتەوە.
هەڵمەتی رووبەرووبوونەوەی گەندەڵی راپیچکردنی دزانی سەدە، گێرانەوەی سەدان ملیار دۆلاری دزراو بۆ خەڵکی عێراق و کوردستان، بەبێ ئەوەی ئەو سیستەمە سیاسییە تائیفی و قەومی و مەزهەبی و بنەماڵەیی و دەسەڵات حزبۆکراتییە وەلابنرێت، تەنها سیناریۆیەکە بۆ راوکردنی ماسییە بچکۆلەکان لەلایەن نەهەنگەکانەوە.
ئەگەر بەراستی گەندەڵکاران و ریزی ورد و درشتی دزانی عێراق و هەرێم لەلایەن دەزگاو دەسەڵاتێکی مەدەنیی و سەربەخۆ و عادلانەوە لێپرسینەوەیان لەگەڵ بکرێت، دەست بەسەر داهات و سامانیاندا بگیرێت... کەم بەرپرسی حزبی و حکومی بنەماڵەکانیان دەمێنەوە راپێچی زیندان نەکرێن.
گێرانەوەی سەدان ملیار دۆلاری دزراو لەلایەن سەرانی حزب و حکومەتەوە بۆ خەزێنەی گشتی و بەرگرتن بەو دزی و تاڵانییە ئاشکرایەی هەموو جومگە سەرەکیەکانی گرتۆتەوە دەتوانێت ئاڵوگۆرێکی بەرچاو لەدۆخی ژیان و گوزەرانی هاوڵاتیاندا بکات و زامنی سەرەکیترین خزمەتگوزارییە پێویستەکانیان بکات...،بەڵام ئەوە کار و پرۆژەیەکە بە گەندەڵکاران و بە سیستەمێکی سیاسی پشت بەستوو بە تایفەو مەزهەب و نەتەوەپەرست و میلێشیاکان ناکرێت، کە خۆی سەرچاوەیەکی دزی و گەندەڵی و تاڵانییە، بەڵکو پیویستی بە وەلانانی ئەم فۆرمە لەدەسەڵاتە. ئەوەی دەتوانێت بە کردەوە سامانی دزراو بگێرێتەوە و گەندەڵی کەنار بخات... ئاڵوگۆرە لەخواستی سزادانی تۆمەتبارانی دزو تاڵانچی بۆ بزوتنەوەیەکی جەماوەری کۆمەڵایەتی رێکخراو و ئاسۆدار.
نەفرەت و نارەزایەتی بەدژی دزی و تاڵانی و گەندەڵی یەکێک لە واقعیەیەکانی کۆمەڵگەی عێراق و کوردستانە، گۆرینی ئەم نەفرەت و نارەزایەتییە بە بزوتنەوەیەکی فراوانی کۆمەڵایەتی رێکخراو نەک تەنها دەتوانێت دەستی تاڵانچیان و دزان کورت بکاتەوە، بەڵکو دەتوانێت عەرشی ئەو دەسەڵاتە بلەرزێنی و ژێرەو ژووری بکات، کە ژینگەی هەڵتۆقینی بەردەوامی ئەو دزی و تاڵانیەیە. عەلی زەیدی گەورە سەرمایەدار و سەرۆک وەزیرانی عێراق خۆی بەرهەمی پشتیوانی سەرانی دز و تاڵانچی هیزو لایەنە سیاسییە قەومی و مەزهەبی و تایفیییەکانی عێراق و بەرهەمی پشتیوانی جەمسەرە ناوچەییەکان و ئەمریکایە... کە کۆمەڵگەی عێراق و کوردستانیان توشی چارەنووسێکی نادیار و تاریک کردۆتەوە و تاهاتووشە قڵشتی چینایەتی بە ئەندازەیەک قوڵکردۆتەوە کە لە ئاستی دنیادا بێ وێنەیە.