دوای چەندین دیدار و کۆبونەوەی هاوبەش، سەرئەنجام یەکێتی و نەوەی نوێ ڕێکەوتننامەیەکی سیاسی و ستراتیجیان لەنێوان خۆیاندا واژۆ کرد. بەپێی ڕێکەوتننامەکە رێکخستنەوەی باڵانسی هیز و راستکردنەوەی رێرەوی حکومڕانی هەرێم ئامانجی سەرەکی ڕێکەوتنەکەیە.
چوارچێوەی هەڵسوڕانی سیاسی یەکێتی و نەوەی نوێ بە پلەی سەرەکی زۆنی سەوزەو دەسەڵاتی سیاسی و ئەمنی ئەو زۆنەش یەکێتی نیشتیمانییە، ئاڵوگۆرەکانی ئەو زۆنەو هەرچەشنە بەرزی و نزمییەک لە باڵانسی هێزدا کە لەو زۆنەدا رووبدات، کاریگەری دیار لەسەر دۆخی سیاسی هەرێم و باڵانسی هیزە سەرەکیەکانی هەرێم دانانێت. یەکێتی و نەوەی نوێ و تەنانەت هەموو هێزە سیاسیەکانی زۆنی سەوز ئەگەر بچنە ناو هاوپەیمانیەکی هاوبەشەوە، ناتوانن ئاڵوگۆری بەرچاو لە باڵانسی هیز لە دۆخی سیاسی کوردستاندا بکەن. ئەوە بۆ زۆنی زەردیش راستە و پارتی هەر ڕێکەوتن و هاوپەیمانیەتیەک لە زۆنی زەرد و ژێر سایەی قەڵەمرەویەکەیدا بکات، ناتوانێت کاریگەری دیار بەسەر دۆخی سیاسی هەرێمدا بهێنێت و باڵانسی هیز بگۆرێت. بۆ پارتی و یەکێتی هەر ڕیکەوتن و هاوپەیمانیەتیەک لەگەڵ لایەنە سیاسیەکانی زۆنەکەی خۆیاندا، بۆ کەڵک وەرگرتنە لە پێگەی ئەو هیزو لایەنە سیاسیانە بۆ بەرژەوەندیەکانی خۆیان و بەکارهێنانیان وەکو کارتی گوشار لەبەرامبەر بەیەکتریدا، نەک بۆ گۆرینی هاوسەنگی هیز.
پارتی و یەکێتی لە ژێر سایەی قەڵەمرەوی دەسەڵاتیاندا، ئەگەر بە ڕێکەوتن و هاوپەیمانیەتی، ئامادەبن چەند پۆست ببەخشن، بەڵام ئامادەنین دەسەڵاتیان دابەش بکەن و لەدەسەڵاتی خۆیان کەم بکەنەوە، پۆست دەبەخشن بۆ ئەوە رەوایەتی دەسەڵاتیان لە زۆنەکە خۆیاندا زامن بکەن.
بانگەشەی یەکێتی و نەوەی نوێ کە رای دەگەیەنن بۆ گۆڕینی باڵانسی هێزە هیچ راستیەکی تیادا نییە، بەڵكو ئەوە هەوڵیکە بۆ رتوشکردنی ڕێکەوتنامەکەو شاردنەوەی ئامانجە بناغەییەکان. رۆشنە نە یەكیتی بە ڕێکەوتن و هاوپەیمانیەتی لە زۆنی سەوزدا دەتوانێت حکومەت!! بەشیوە کارتۆنیەکەشی پێک بهێنێت و پەرلەمانی کاریکاتۆر ساز بداتەوە و نە پارتیش لە زۆنی زەردا لە رێگای ڕیکەوتن و هاوپەیمانیەتی لە زۆنی زەردا دەتوانێت حکومەتی نمایشی و پەرلەمانی دیکۆر زیندو بکاتەوە. پارتی و یەکێتی تەواوکەری یەکتر و دوو دیوی دراوكن و هەر حکومەتێک کە بڕیارە پێک بێت، لەهەلومەرجی ئێستادا بە بێ پارتی و یەکێتی، لە مەحاڵ نزیکە. جیا لەوانە سەختە یەکێتی بتوانێت لە زۆنی سەوز حکومەت و پەرلەمانی تایبەت بەخۆی و پارتی لە زۆنی زەرد حکومەت و پەرلەمانی خۆی پیک بهێنێت.
بۆ یەكیتی چەند ئامانج لە ڕێکەوتنی لەگەڵ نەوەی نوێ هەیە... کەنارخستنی رۆڵ و کاریگەری نەوەی نوێیە لەسەر زۆنی سەوز، ڕیگەگرتن لەوەی نەوەی نوێ لە هێزی ناڕازی کەڵک وەربگرێت و لە هەڵبژاردنەکاندا کورسی یەکێتی ببات، بەدەستەوەگرتتی نەوەی نوێ وەکو هێزێکی گوێ ڕایەل بۆ گوشار خستنە سەر پارتی بۆ سازان و ڕیکەوتن. بۆ نەوەی نوێش هاوپەیمانیەتی لەگەڵ یەکێتی، لابردنی دۆسییە یاساییەکان لەسەر سەرۆکی جوڵانەوەی نەوەی نوێ، مانەوە وەکو لایەنێکی سیاسی ئارام و بێ کێشە و لەبەرامبەردا وەگرتنی پۆست لە حاڵەتی ڕێکەوتنی پارتی و یەکێتیدا.
گۆرینی باڵانسی هیز و قەڵەمڕەوی دەسەڵات لە هەرێمدا لەرێگای ڕیکەوتن و هاوپەیمانیەتی هێزە سەرەکیەکان لەگەڵ هیزو لایەنەکانی زۆنەکەکانی خۆیاندا روونادات، بەڵکو بەگۆرینی هاوسەنگی هیزی جەماوەری لەبەرامبەر بە هیزەکانی دەسەڵاتدا دەشێ ئاڵوگۆری بەسەردا بێت، یانیش پشتیوانی و کاریگەری جەمسەرە ناوچەییەکان، دەتوانێت هێزێک لاواز یان کەنار بخات و ئاڵوگۆر بەسەر قەڵەمرەوی سیاسی هیزە باڵادەستەکاندا بهێنێت.
بانگەشەی راستکردنەوەی رێرەوی حکومرانی لە بانگەشەی یەکەم پوچترە، ئەوەی رێگری بناغەیی لە هەر چەشنە حكومرانیەکی ئیجابی و تەنانەت لاوەکی لە هەرێمدا دەکات، پارتی و یەکێتی و ئەو فورمە لە دەسەڵاتە کە زیاتر لە ٣ دەهەیە دریژەی هەیە. فۆرمی دەسەڵاتی حزبی پشتبەستوو بەچەک و بنەماڵە و خۆبەستنەوە بە جەمسەرە ناوچەییەکان، ڕیگری سەرەکی بەردەم هەر ئاڵوگۆرێکەی ئیجابییە لە هەرێمدا... تەنانەت مانەوەی پارتی و یەکێتی بۆ ئەم ماوە دورو درێژە لە دەسەڵاتیان بەسەر خەڵکی کوردستاندا، بەرهەمی ئەو فۆرمە لەدەسەڵاتە، دەسەڵاتێک کە لە گشتیەتی خۆیدا نامۆیە بە بنەماکانی مۆدیرن و لە بنەرەتدا پشت بەستووە بە بنەماکانی بنەماڵەو خیڵ... هەر ئەوەش یەکێک لە گەورەترین مەودای نیوان ئەو دەسەڵاتەیە لەگەڵ خەڵکی مۆدێرنی کوردستان و واقعیەتی دەوڵەتداری باوی بۆرژوازی دنیا، کە میراتێکی بۆگەن و دەگمەنی دنیای ئەمڕۆیە. راستکردنەوەی حکومرانی دەسەڵات لەهەرێم یان گۆرینی ئەم دەسەڵاتە بەدەسەڵاتیکی جەماوەری پشت بەستوو بە ئیرادەی سیاسی و راستەوخۆی هاوڵاتیان، یان هەر دەسەڵاتێکی باوی بۆرژوازی ئەم سەردەمە، لە پیش هەموو شتێکدا، کۆتایی هینانە بەو فۆرمە لەدەسەڵاتی حزبی و بنەماڵەیی.
یەکێتی نیشتیمانی، وەکو هیز و دەسەڵاتی بنەماڵەیی و براکان، لەگەڵ نەوەی نوێی بنەماڵەیی لەپال پارتی بنەماڵەییدا کە دەسەڵاتیان لەسەروی هەموو فۆرم و ئەلگۆیەکی حزبی و دامەزراوەیی و یاسایی دەبینن، رێگری سەرەکی بەردەم هەرچەشنە گۆرانکارییەک و هۆکاری بە زۆنکردنی سیاسی هەرێم و شەقکردنی هەرێمن بۆ دوو بەش.
تا ئەو جێگایەی بە بانگەشەکانی تری ناو ڕیکەوتنامەکە لە پەیوەند بە خزمەتگوزاری و خزمەتکردنی هاوڵاتیان و مافەکانی دانیشتوان دەگەڕیتەوە، کەس دەستی یەکێتی نیشتیمانی وەکو خاوەن دەسەڵاتی زۆنی سەوز و نەوەی نوێی هاوپەیمانی ئیستای نەگرتووە، ئەو ماف و داخوازییە زۆر سەرەتاییانەی هاوڵاتیان لە موچەو خزمەتگوزاری و مافە فەردی و مەدەنییەکان و ئازادییە سیاسییەکان و مافەکانی مرۆڤ جێبەجێ بکات و ئەلگۆیەکی تر لەدەسەڵات پیادە بکات، کە جیاوازیەکانی لەگەڵ پارتیدا بخاتەڕوو، کە خەڵکی سەرجەم کوردستان بیبین و ستایشی بکەن، بەڵام فۆرمی ئەو دەسەڵاتە حزبۆکراتی و میلیشیایی و بنەماڵەیییە ڕیگە نادات بە یەكیتی و پارتی وەکو هەر دەسەڵاتێکی باوی بۆرژوای مامەڵە بکەن و جیاوازی نێوانیان لە ڕیگای خستەرووی سیاسەتی سەرەکی جیاواز بۆ دۆخی سیاسی هەرێم و ئاییندەی سیاسی کوردستان، بۆ مافە فەردی و مەدەنی و ئازادییەکان، بکەنە مەبنا بۆ کێشمەکێشی نیوانیان.
نیگەرانی و کاردانەوەی پارتیش بە ڕیکەوتننامەکەی یەکێتی و نەوەی نوێ، لە هەمان گۆشەنیگای حزبی و بنەماڵەیی و میلیشیاییەوەیە. پارتی وەکو هیزێک کە قەڵەمرەوی زۆنێکی هەرێمی لە رێگای زۆرەوە پاوان کردووە، دەیەوێت لەگەڵ یەکێتی هەمەکارەی زۆنەکان بن و یەکێتی و کوڕانی تاڵەبانی وەکو تاڵەبانی باوک، ڕیکەوتنی ستراتیجی لەنیوانیان هەبێت و پارتی وەکو حزبی دایک!! بە فەرمی بناسێت. پارتی هەموو ڕیکەوتنامەیەک لەنێوان هیزە سیاسیەکان لە دەرەوەی بەرژەوەندیەکانی خۆی وەکو گوشار لەسەر خۆی و بە پیلانگێری!! مامەڵە دەکات، بۆ ئەوەی لەلایەکەوە جەماوەر و لایەنگرانی خۆی لەدژیان هان بدات و لەلایەکی تریشەوە وەکو مەترسی لەسەر قەوارەی هەرێم و کۆسپی بەردەم پیکهێانی حکومەت و پەرلەمان!! لەبەردەم رای گشتیدا نیشان بدات، تا لەو رێگایەوە ئۆباڵی دۆخی سیاسی هەرێم و مەترسیەکانی بخاتە سەرشانی یەکێتی نیشتیمانی بەتەنها و خۆی لە بەرپرسیاریەتی ئەو دۆخە نەخوازراوە بدزێتەوە کەخۆی لایەنی سەرەکییە لە خوڵقاندنیدا.