ئامرازە نوێیەکانی ڕاگەیاندن و سۆشیالمیدیا شکۆ و ئەمانەتی وشەی وێرانکردووە و ، بۆتە گۆڕەپانێک کە کەسانی بێبەھا و ساختەچی و بێناوەڕۆکی جددی تێدا دەسوڕێنەوە ، کەسانێک ئامانجیان شێواندنی مێشک و فریودانی خەڵک و لەدەستدانی ھۆشیاری و بەدەستھێنانی پارەیە ، گەنجە چینیەکە « تشانگ یی مینگ »ی داھێنەری تیک تۆک خەیاڵی بۆ ئەوە نەدەچوو کە ڕۆژێک بێت بەو جۆرە سووکایەتی بە بەکارھێنانی ئەو سەکۆیە ئەلکترۆنیە بکرێت ، بەتەئکید سەکۆی تیک تۆک و دونیای سۆشیالمیدیا لایەنی ئیجابی زۆرە ، بەجۆرێک ئەوانەی بەکاریدەھێنن ڕێگایان بۆ واڵادەکات کە گوزارشت لەخۆیان بکەن و پەیوەندی بە کەسانی تر بکەن و بەشداری بەھرەکانیان بکەن ، ھەروەھا ئەو سەکۆیە کورتە ڤیدیۆی کەسان لەنێوان کات بەسەربردن و وەدەستھێنانی زانیاری و تەعلیم…تاد تێدایە ، بەڵام ئێمە کردومانەتە گۆڕەپانێک بۆ بەتاڵکردنەوە ڕقوکینە و قسەی قێزەوەنی نەشیاو و خۆکردنە پاڵەوان و ھەموو ئەو شتانەی کە موخالفی بەھای کۆمەڵگان ، زۆربەی ئەو تیکتۆکچیانە کاریگەری خۆیان ھەیە لەسەر کۆمەڵگا لە زەمەنێکدا کە وشەی بەھێز و ھزری قوڵ بایەخی ئەوتۆیان نیە و جەماوەریش لەو جیھانە ئەلکترۆنیەدا بەدوای مانادا ناگەڕێت ، بەڵکو بۆ چێژی چرکەسات نەک پەروەردە و تەعلیم…جا کەسانێک لەو دووفاقانە دەناسم بێشەرمانە لەو کورتە ڤیدیۆیانە کە ناویان لەخۆناوە شرۆڤەکار بەڕوخساری غەمگین و دەنگی سۆزاوی خۆیان کردۆتە فریادڕەسی گەلی کورد و باسی نادادی و گەندەڵی…تاد دەکات کەچی خۆیان گەندەڵ و سوودمەند بوون لە دەسەڵات ، ئا لەنێو ئەو بازاڕە فەوزەویەدا جەماوەر بت دروستدەکات ، جا وەرە ڤیدیۆیەک لە ماوەی چەند ڕۆژێکدا ھەزارا فۆلۆوەر کۆبکاتەوە و خاوەن ڤیدۆکەش وەک راعی جەماوەر مامڵەیان لەگەڵ دەکات و چەپڵەڕێزان دەکرێت و باز بەسەر ستاندەر و پێوەرەکاندا دەدات و ڕێگاکەی بە دروشم و ئیمۆجیەکان فەرشکردووە و سەرئەنجام بەسەر پێبلیکانەی ناوبانگی سەردەکەوێت ، جا ئەمە ھەر تەنھا لە سنووری دروستکردنی ھیچوپووچ (التفاھە) ناوەستێت بەڵکو درێژدەبێتەوە بۆ دڕندەیی بینەر « جمھور » جمھورێک کە تەنیا ئەوەی دەدرەوشێتەوە قبوڵ دەکات تەنانەت ئەگەر قوڕ-یش بێت ، بینەرێک کە بۆتە مێگەڵێکی ھێرشبەر کە ھەموو بۆچونێکی جیاواز ھەڵدەلوشێت و گاڵتە بە ھەموو ناوەڕۆکێکی جدی دەکات و تڕێندەکانیش دەبنە ئامێری سەرپەڕاندن بۆ ھەموو ئەوانەی ھەوڵبدەن پێچەوانی تەوژم مەلەبکات .
سەکۆکانی جیھانی ئەلکترۆنی و سۆشیالمیدیا لەکن ئێمە بۆتە کەرنەڤاڵێکی ھەمیشەیی کە ئاڵای داھێنانی لێھەڵناکرێت ، بەڵکو باڵۆنەکانی گاڵتەجاڕی تێدا دەفڕێت و ڕێوی و کەمتیارە تاکەکان بە ئازادانە تەراتێن دەکەن ، ئەوڕۆ وروژاندن لەناو سوشیالمیدیا بازاڕی گەرمە و بۆتە پیشەسازی و ناتوانرێت پشتگوێبخرێت ، ئێمە کە ئێستا لە قۆناغێکی گرنگداین کە پڕە لە کێشە و تەنگوچەلەمە و مەترسی و تەحدیات لەژێر سایەی فەوزای ڕاگەیاندنی کراوە و فەوزای شۆشیالمیدیای چەکدار بە ئامێری کوشتن و بریندارکردن و بەپێشەنگکردنی کەسانی پووچگەرا و میگەل کە لەڕاستیدا ئەمانە بوونەتە ئاوێنەی ڕاستگۆیی ئێمە : ئەدی ئەوە نیە حەز لە ھیچوپووچی دەکەین ، ھیچوپووچی بۆتە خانمی شاشەکان و ، ئەوەی جدیەتە پەڕاوێزخراوە و لە گۆشەکانی لەبیرچوونەوە دوورخراوەتەوە ، ڕاستیە تاڵەکەش ئەوەیە کە ئەمە جەماوەرە وەحش دروستدەکات و لە خۆشی ئەو وەحشەدا خۆراکی دەداتێ ، بەڵام کاتێک ئەو وەحشە لە بەھاکان دادەمڵدرێ و ئەشکرا دەبێت ئەوسا وازی لێدێنێت ، تیک تۆک و توک توک و سۆشیالمیدیا بۆ کورد تاکە سەرچاوەی کاتبەسەربردنە نەک وەرگرتنی زانیاری و ڕۆشنبیری ، کاتبەسەربردنێک کار لەسەر ورووژاندنی غەریزەکان و بڵاوکردنەوەی ھیچوپووچیی و بیرکردنەوەی سەتحی دەکات .