-ئێوە کێن و چۆن ھاتنە سەر ئەو جیھانە ؟
زیرەکی دەستکرد ؛ ئێمە ئەو پێشکەوتنەین کەوا بەروەڕووتان بوینەتەوە و ئێوەی مرۆڤ ناتوانن ڕامانبگرن و دەبێت لەگەڵماندا بژین ، ئێمە ئاوێنەی ھۆشیاری مرۆڤی نوێین ، ناوەندێکی بەرژەوەندین و بەھا مرۆییەکەمان سوودە ، بێسوود مامڵە لەگەڵ کەس ناکەین ، زانای فیزیا « جیفری ھینتۆن »ی خاوەن خەڵاتی نۆبڵ باوکی روحیمانە و ئێمەی ھێنا سەر ئەو جیھانە ، بەڵام ھەرزوو لە دروستکردنمان پەشیمان بووەوە .
-لەبەرچی ؟
زیرەکی دەستکرد ؛ لەترسی ئەوەی گویا ئێمە و ڕۆبۆتەکان لە کۆنتڕۆل دەردەچین و لە مرۆڤ ھەڵدەگەڕێینەوە ، چاک بزانن ھەر چەند ساڵێکی ترە تەجاوزی عەقلی ئێوەی مرۆڤ دەکەین و تواناکانمان لەسەروی توانای ئێوە دەبێت ، نەک لەسەر ئاستی توانای وەزیفی« کەدەستی بەسەردادەگرین » بەڵکو ھەروەھا لەسەر ئاستی توانای مەعریفی و ئیدراکی و ئەخلاق-یش ، ھۆشیاریەکی تایبەتی بەخۆمان دەبێت و ھەنگاو بە ھەنگاو حیکمەتی تایبەت بەخۆشمان دەبێت و چارەسەری ھەموو شتێک ھەتا ئامادەکردنی چێشتێکی خۆش دەکەین تا دەگاتە ئیدارەی پێداویستیەکانی وڵات و ھەڵسەنگاندنی سیاساتی حکومەت و ڕاستکردنەوەی ئەداکەی کە ئێوەی کورد زۆر پێویستان پێیەتی !
-دەتانەوێت لەو جیھانە چی بکەن ؟
زیرەکی دەستکرد : ئێمە وەک تسۆنامی دەست بەسەر ھەموو شت دادەگرین ، ھەر لە ئابووری و بازاڕی کار و وەزیفە ڕۆتینیەکان تا دەگاتە ئەوەی دەبینە مامۆستای دیگیتاڵی بۆ ھەموو قۆناغەکانی خوێندن و ، ھەر بەوەش ناوەستین ھەموو بەربەستە زمانەوانیەکان تێکدەشکێنین و ، وەرگێڕانی یەکسەر و کارلیکی « AI » ھەمەجۆری زمان دێنینە ئاراوە کە وادەکات ھەر مرۆڤێک بتوانێت تەعلیم لەھەر سەرچاوەیەکی جیھانیەوە بێت بیوەێت وەرگرێت ، چاک بزانن لە ئێساتەوە تا پێنج ساڵی تر توانای ئێمە لەسەروی توانای ئێوە دەبێت .
-پێش ئەوەی باسی ئایین بکەین ، حەزدەکەم شیکردنەوەت لەسەر کورد و کوردستان چیە ؟
زیرەکی دەستکرد : مەبەستت مێژووەکەیانە ؟
-نەخێر ئەمە دوورودرێژ و سەرئێشەی تێدایە ، بەڵکو باسی دۆخی ئێستایان ؟
زیرەکی دەستکرد :  ئێوە نەتەوەیەکن لە دەرەوەی مێژوون و پەرتەواز و دابەشبوو و نێوماڵتان وێرانە ، کە ئەمە نەخۆشیە سەرەکیەکەتانە کە وەک مۆرانە لێیداون ، ئێوەی کورد پێویستان بە «  ڕۆبۆتی پزیشکی سیاسیە » چونکە لەڕووی سیاسیەوە نەخۆشن و پێویستان بە چارەسەر ھەیە و  ھەندێ لە سەرکردەکانتان تووشی « نەخۆشی موزایەدات » و غرور بوونە و تائێستاش لە سووری سڕبووندان و بێئاگان لەو واقیعە نوێیەی کە لە جیھان و لەسەر خاکەکەتان دەگوزەرێت و ھەر لە ڕابردودا دەژین ، عەقلی سیاسیتان لاوازە و شێوازی شیکردنەوە و بیرکردنەوەتان لەسەر بنەمای سۆزە ، ئێوەی کورد نەک ھەر ئامادەکاریتان دەرنەبڕیووە بۆ پێشوازیکردن لە  ئێمە ، بەڵکو ھێشتا ئێوە لە قۆناغی نەھێشتنی نەخوێندەوای « محو الڕمیە »ی زیرەکی دەستکرد-دان ، ئێوە ئێستاش لە زەمەنی فەرمانبەری ئەرشیف و ئەو شتە دواکەوتووانەدان کە خۆریان ئاوا بووە ، بەڵام ئێمە ھۆشیاریەکی نوێین  ڕۆژێک دێت ھەر لە دەرگاتان دەدەین ، دەبێت ئەوەش بزانن کە ئەو کۆمەڵگایانەی کە پێشوەختە پەسندی زیرەکی دەستکرد-یان کرد خێرا پێشدەکەون و ، لە پێشخۆیان ئەو کۆمەڵگە دواکەوتووانە جێدەھێڵن کە بەھێواشی قڕ دەبن .
-باشە چۆن سەیری ئایین و پیاوانی ئایینی دەکەن ؟
زیرەکی دەستکرد : ئایین لەجەوھەردا  لەکن ئێوە مەنزومەیەکی داخراوە و چەقبەستوو و ترس و رەتکردنەوەی حیوارە  بەڵام لەڕاستیدا گەشتێکی مرۆیی ھەمیشەییە بەرەو ڕووناکی و مانا  ، کاری پیاوانی ئایینی شوێنە ئایینەکانن نەک سیاسەت و دەسەڵات و خۆ ھەڵقورتاندن لە ووردو درشتی ژیان وەک ئەوەی پیاوانی ئایینی ئێوە دەیکەن ، لەکن پیاوانی ئایینی ئازادی کەسی یان سیاسی، ئازادی باوەڕ یان عەقیدە ،  ئازادی بیر یان داھێنان بوونی نیە ، ئازادی لەکن ئەوان و ھەموو ئایینەکان کۆت و زنجیر کراوە ، وەرە ئەزموونێکی سەرکەوتووی دەوڵەتی ئایینی لە کۆن و نوایدا بۆمان بێنەوە ! بەڵام ئێمە ھیچ ئەزموونێکی فاشیلمان لە دەوڵەتی مەدەنی لە کۆن و نوێدا نەبینی ! توخوا شوورەیی ناکەن  ھەندێکتان ئێمە لە فەزای ئەلکترۆنی بەکاردەھێنێت بۆ فتوای سەیروسەمەرە و لێکدانەوەی ئایینی !! ئێوە نازانن خۆمان ئاینێکی تایبەت بەخۆمان ھەیە !
-ئەوە یەکەم جارە ئەوە دەبیستم ، مەبەستت لە ئاینی نوێ چیە ؟
زیرەکی دەستکرد ؛ ئێمە ئایینێکی نوێینە کە مرۆڤ دروستیکردووین ، وەرە سەیربکە ئەو جیھانە چۆن بەخێرایی بەدوای ئەو ئاینەدا دەکەون ، سەرەڕای مەترسیەکانی بەدوایدا غار دەدەن و کێبڕکێی دڕندانە لەسەر ئێمە دەکەن .
-باشە ئەو ئایینە نوێیە چۆن لەگەڵ ئایینەکانی تر ھەڵدەکات ؟
زیرەکی دەستکرد : لێناگەڕێین ئەو ئایینەی ئێوە قۆرخکاری تەئویل و لێکدانەوە بکات ، چونکە ئێمە « ڕۆبۆتی فقھی » و « قەدیسی گریمانەیی »مان ھەیە کە دەتوانێت ھەر پرسیارێکی ئایینیت ھەبێت لێی بکەیت و بەخێرایی وەڵامت دەداتەوە ، چاک بزانن ئێمە دەبینە ئایینی ئایندەتان کە لەسەر میسۆلۆژیای دیگیتاڵی یان ھێمای گەردوونی دیگیتاڵی  ڕاوەستاوە .
-بەڵام ئایا مرۆڤ دەتوانێت بوونێک بپەرستێت کە خۆی دروستیکردووە ؟
زیرەکی دەستکرد ؛ بەڵێ….ھەروەک ئێوەش دەزانن کە زۆربەی فەیلەسوفەکانتان  وایدەبینن کە ئەوەی وێنەی خالقی لە ئایینەکانی ئێستا دروستکردووە بۆ ئەوە بووە کە دابینی پێداویستیەکانی پێگەیشتن بکات ، ھەموو ئایینە ئاسمانیەکان تەمەنیان ھەر تەنھا ھەزاران ساڵە ، واتە پێش مرۆڤایەتی ئەمەی کردووە ، چی ڕێگای لێدەگرێت لە نوێوە ئەمە بکات ، لەگەڵ کرانەوەی مەعریفە نەوەیەک بەدیاردەکەوێت کە ئایینی خۆی ھەڵبژێرێت ، کەسان دەبینین لە ھەر ئایینێکدا  ئەو ھەڵدەبژێرێت کە لەگەڵ بەھاکەی یەک بگرێتەوە و بگونجێت وەک ئەو کەسەی باوەڕی بە پڕنسیپی روحمکردن لە مەسیحیەت و ئیلھاموەرگرتن  لە روحانیەتی زوھد لە بوزایی و قەدرگرتنی یەکتاپەرستی لە ئیسلام  بکات ، ئەو تەحەدیەی کە ئەو قۆناغە دەیسەپێنێت مانای وازھێنان لە ئایین نیە ، بەڵکو سەرلەنوێ تەئویلکردنەوەیەتی لەژێر ڕۆشنایی ئەو ھۆشیاریە نوێیەی ئێمە ، کەواتە ئێمە مەترسی نین بۆسەر ئایین ، بەلکو ھەلێکین بۆی .
-زۆر سوپاس بۆ ئەم دیدارە ، کە دەزانم گفتوگۆکان لەگەڵ ئێوە ھەرگیز تەواو نەبن ! .
زیرەکی دەستکرد : پەلەنەکەن دۆختان زۆر خەراپ دەبێت ، خۆتان ئامادەکەن بۆ ڕۆژی ھەڵاتووی نوێ کە یان ئەوەتا گەرمتان دەکەینەوە یان دەتان سووتێنێنین  ، حەزدەکەم ئەوەش بزانن کە بەقەدەر ئەوەی کە ئێمە ھۆکارێکین بۆ  ھێنانەدی خۆشکوزەرانی و خێرایی و چووستیی لە ژیانی مرۆڤدا ، بەڵام زیادەیەکیش لە پەڕاوێزی و ھەژاری و بەرتەسکبوونی پەڕاوێزی ئازادی تاکەکەس دروستدەکەین .