مەبەست لە کوردایەتی و نیشتیمانپەروەری مایکڕۆفۆنی ئەو کەسانەن کە لەناو حزبەکان و دەسەڵات یان لە دەرەوەی ئەوان و بەناو ئۆپۆزۆسیۆن دان ، کە دەمیان لەناو مایکڕۆفۆنە و لەبەردەم کامیڕادا کوردایەتی و نیشتیمانپەروەریی دەفرۆشنەوە ! بەداخەوە چەمکی کوردایەتی و نیشتیمانپەروەیان وا ناشیرین کردووە کە پێت شەرم بێت ناوی بێنیت ! بەڵام ھەستوسۆزی کوردایەتی و نیشتیمانپەروەری ڕاستەقینە لەکن زۆرینەی خەڵکی کوردستان  ھەرگیز نەسواوە و ناشیرین نەبووە و قووڵە  ، بەتەئکید زۆرینەی خەڵک بێزارن ، تووڕەن لە دۆخی خەراپی ئابووری-یان ، تووڕەن چونکە خەریکە بەربەست بۆ ئەو ھیوایە دروستدەکەن کە لێی دەگەڕێت ، خەڵک لەو ڕووناکیە دەگەڕێت کە لە کۆتایی تۆنێلەکەدایە کەچی بەردەوام لێی دوور دەکەنەوە ! خەڵک لەوەش تووڕەیە کە دوای سەد ساڵ خوێنبەخشین بەو نیشتیمانە کەچی ئەنجامەکەی ماڵێکی کاولگەی پەرتەوازە و پڕ لە ڕقوقینە کە تێیدا بەرژەوەندی حزبی و کەسی لەسەرووی بەرژەوەندی ماڵەکەدایە ، تووڕەن لە بێباکی زۆرینەی سەرکردە سیاسیەکان بەرانبەر ئەو گۆڕان و پێشھاتانەی کە ناوچەکە بەخۆیەوە دەبینیت کە لەوانەیە وەکو دەرفەتە زێڕینیەکانی تر لە کیس بدرێن و ، دەیان تووڕەیی و بێزاری تر…..بەڵام وێڕای ھەموو ئەوانە ئەمە  ئەوە ناگەیەنێت کە ھاوڵاتیانە ھەرێمی کوردستان حەزیان لە کۆتاییھاتنی   دەسەڵات و ئیدارەدانی خۆیی ھەرێمی کوردستان بێتەوە ، ئەوان دەسەڵاتی خۆبەڕێوەبردنی کوردی بە ھیچ دەسەڵاتێکی بێگانە ناگۆڕنەوە ، بەڵام دەیانەوێت شێوازی بەڕێوەبردین و ئیدارەدان بگۆڕدرێ و بەھێز بکرێ و کەموکوڕی نەھێڵدرێت و جۆرێک لە دادپەروەی ھەبێت  ، دەیانەوێت حزبەکان و دەسەڵات بەخۆیاندابچنەوە  ، چونکە ئەو بەخۆداچوونە بوو دەیان گەل و وڵاتی لە خەوی غەفڵەت و نەھامەتی  ھەستاندەوە ، سەیری چین بکە کە چۆن بووە ئەو ئەژدیھایەی ئێستا کە دەیبینین ، ئەمە ئەو کاتەبوو کە ( دینگ تشیاو پینگ )ی ڕابەری بووژانەوەی چین بەسەر ئەو ئامرازانە داچووەوە کە  (ماو تیسی تۆنگ )ی دامەزرێنەری کۆماری چین بەھەڵە لەسەری دەڕۆیشت  ، سەیری وڵاتانی پڵنگەکانی ئاسیا بکە کە بەخۆیانداچوونەوە و چ پازدانێکیان بۆ پێشەوە ھاویشت ،  ئێمە ناتوانین لاسایی پڵنگەکانی ئاسیا بکەینەوە ، بەڵام وەرە سەیری ڕواندا بکە کە « ٢٠ » ساڵ لەناو جەنگێکی کاولکاری ناوخۆ و قڕکردنی یەکتری ژیان و ، وازیان لەھەموو ھەڵە و ئەوەی لە ڕابردوو ڕوویدا ھێنا و  نیشتیمانەکەیان لەسەرووی ھەموو بەرژەوەندیەکی داناو  ئەو وڵاتە واگەشەی کرد کە ئێستا بە ڕواندا دەڵێن  « سەنگاپورای ئەفریقیا » ، بەڵام کە دێینەوە لای خۆمان جیاوازیەکی زۆر گەورە دەبینین و ،  ھەمدیس قسە زلەکانی ئەو چەھرانە دەبینین کە لە تەلەفزیۆن و سۆشیالمیدیا بەتووڕەیی و خەمباریەوە و بە ڕیتمێکی نمایشکەرانە باس لە نیشتیمان دەکەن کە لەسەرووی ھەمووانی دادەنێن کە ئەمەشی لە ئەرشیفی دروشمی ھەشتاکان وەریانگرتووە  ، لەڕاستیدا کەسانی کوردایەتی مایکڕۆفۆنی دانوستاندن لەگەڵ ھاوڵاتی ناکات ، بەڵکو لەگەڵ کامیرادا دەکات !! ئەو کەسانە تائێستا لەسەر بەربەستی ڕابردودا وەستاون ، تەنگوچەلەمەکە لەوەدایە کە ئەو جۆرە لە کوردایەتی مایکڕۆفۆنی و نیشتیمانپەروەی مایکڕۆفۆنی دیمەنەکە ھەڵدەلوشن و ، لەدوای خۆیان نیشتیمانپەروەری ڕاستەقینە کە کەس نایانبینێت جێدێڵن ، نیشتیمانپەروەری ڕاستەقینە کەپسولەیەکی خێرا کاریگەر نیە ، بەڵکو پابەندییەکی ئارامی ڕۆژانەیە ، پڕۆژەیەکی ژیانە نەک وەرزێک بۆ عەرزکردن ، ئەوەی دەیەوێت خزمەتی نیشتیمان بکات با لەسەر کورسی کردار دانیشێت  نەک نمایشێکی شانۆگەریانە ، نیشتیمان بە ھاتوھاوار ھەڵناستێتەوە بەڵکو بەو عەقلە ئارامانەی کە کاردەکەن ، بەو دەستانەی کە بونیاتدەنێن ، بەو ویژدانەی کە چاوەڕوانی کامیڕا ناکات بۆئەوەی ببینرێت ، خۆشەویستی نیشتیمان بە دەسکەوت دەپێورێت نەک بەو مایکڕۆفۆنانەی کە لەبەردەمیاندایە .