نزیکەی سێ دەیەیە ھەرێمی کوردستان لەعنەتی دابەشبوون و نەخۆشی موزمینی پەرتەوازیی کە لەمێژە لەگەڵیدا بووەو و کزبوونی بێمتمانیەیی بەدەسەڵاتەکەی بەردەوامە ، بەدرێژایی مێژوو تا دەگاتە ئێستا لەژێر سایەی شکست و نشووستیەکانیدا ، تاکەکان و ئەو گەلە مەیلی ئەوەی ھەیە کە نقووم بن لە لەخۆلێدان یان جلد کردنی خۆیان « جلد الژات » واتە بۆتە جەستەیەکی ئازاردیتەی مازۆخی کە چێژ لە ئازار وەربگرێت و ، ھەستکردن بە خەتا و خەمۆکی و خۆبەلاواززانی و لەدەستدانی پاڵنەر بۆ بیرکردنەوە لە باشترکردنی بارودۆخەکە یان ئاییندەکە بە بەردەوامی لەگەڵیدا دەژیت و ، دیدگایەکی وا ڕەشبینیشی ھەیە کە ئەوەی دێت خەراپترە ، کە تێیدا ھەڵە و عەیبەکان بە پلەیەک قەبەدەکرێن کە ناتوانایی لەسەر ڕەخنەی بابەتی و بەخۆداچوونەوە و پێداگریی لەسەر ڕاستکردنەوە و گۆڕانکاری پێشاندەدرێن و دەبنە ئاستەنگێکی گەورە بۆی ، زۆرن ئەو گەلانەی کە دووچاری ئازاری بەردەوام و زەلیل و ئیھانەکردن ھاتوون ، بەڵام توانیان بەسەر شکستەکان زاڵ بن لەوانە چین و ئێرلەندا ، ( ئێرلەندا ) بە نموونە دێنمەوە کە لە زۆر خەسڵەتدا لە کورد نزیکن و ژمارەی دانیشوانیشی نزیکە لە ژمارەی دانیشتوانی ھەرێمی کوردستان ، بەریتانیەکان وا مامڵەیان لەگەڵ ھاوڵاتیانی ئێرلەندا دەکرد کە لە خوار ئادەمیزاد دایاندەنان و ، ناچاریانکردن وڵاتەکایان جێبھێڵن و کۆچبکەن و ، بەشێکی گرانبەھای خاکەکەیان ( ئێرلەندای باکوور )یان دابڕاند و خستیانە سەرخۆیان ، ئێستا ئێرلەندا لەڕووی ئابووری لەسەرووی بەریتانیا دایە و ئەو وڵاتە بۆتە موعجیزەی ئابووری و تەکنۆلۆژیای ئەوروپا ، باشە بۆ ئێمە تەرکیز دەکەینە سەرئەوەی کە ناتوانین لەو چڵپاوە دەرچین و بۆ بەخۆمانداناچینەوە و باوەش بۆ ھاوڵاتیان بکەینەوە و متمانە بگەڕێنینەوە و بەو پەڕی بوێری دان بە ھەڵە و قەیرانە ئابووری و کلتووری و سیاسی-یەکانمان نەنێن و لە ھۆکار و لێکەوتە و مەترسیەکانی ئاییندە بکۆڵینەوە !! گەورەترین کێشەی ھەموو وڵاتان و ئێمەش ئەوەیە کە ھاوڵاتی دەنگی نەبیسترێت و پەڕاوێزبخرێت و مافی پارێزراو نەبێت و دادپەروەری قانون بێجیاوازی بەسەر ھەمووان جێبەجێ نەکرێت…گەشەپێدان ھەر لە دروستکردنی تاوەر و ڕێگاوبان سنووردار نابێت ، بەڵکو لە متمانەی ھاوڵاتیە کە نیشتیمانێک ھەیە دەیپارێزێت نەک دایدەچۆڕێنێت ، ھاوڵاتی متمانە بەچی بکات کە بەرپرس لەو تاجەتاوەرە بڵندە نێتە خوارەوە و جگە لەوەش تەلەفۆنی داخراوە و کەس گوێ لە سکاڵا و ئازارەکانی ناگرێت ، ھاوڵاتی تاوانی چییە ؟ دەیەوێت کەسێک گوێی لێبگرێت…یەکێک لە چیرۆکە جوانەکانی نوسەری ڕووسی ( ئەنتوان تیشیخۆف )ی پێشەنگی چیرۆکی کورت لەجیھان…ئەو چیرۆکەیە کە شۆفێری گالیسکە کە ھەسپێک لێی دەخوڕێت و ، شوفێرەکە ئێش و ئازارێکی زۆری ھەیە و ئەوەی سواری گالیسکەکە دەبێت بۆی باسدەکات ، بەڵام کەس گوێی لێڕاناگرێت و ناچار سکاڵا و ئازارەکانی بۆ ئەسپەکە باسدەکات….ھاوڵاتی تووخمێکی پەراوێزخراو نیە ، ھاوڵاتی بنچینەی ھاوکێشەکە و ھەموو سیاسەتەکان لەپێناوی ئەودا بونیاتدەنرێت ، ڕاستە سەرکردایەتی ڕوئیا و تموحی ھەیە ، بەڵام خەونەکان تەنھا بە بڕیارەکان نایەتەدی ، پڕۆژە گەورەکان پێویستی بەو دەستانە ھەیە کە کار دەکەن ، بەو مێشکانەی کە بەشدارن ، بەشداریکردنی خەڵک و وەڵامدانەوەی داخوازیەکانیان مەرجی جەوھەریە بۆ بووژانەوەی ڕاستەقینە ، بەرپرس کە ئەو پۆستە حکومیەی وەرگرتووە بۆ ئەوە نەھاتووە خۆی گۆشەگیر بکات و گوێ لە سکاڵای ھاوڵاتی لەسەر ئازار و ناخۆشی و بارگرانایی ژیان نەگرێت ، وەک ئەوەی ئێستا ھەندێک لە بەرپرسان دەیکەن ، چۆن متمانە و وەلا بمینێت کە بەرپرس بێئاگا بێت لە پێداویستی ھاوڵاتی و ئازارەکانی ، جەوھەری گرێبەستی کۆمەڵایەتی نێوان دەوڵەت و ھاوڵاتیەکانی لەسەر متمانەی بەرانبەر یەکتر وەستاوە ، ئەگەر ھاوڵاتیت لەناو گرانیی و نەبوونی شەفافیەت و نایەکسانی جێھێێشت ، ئەوە وەبەرھێنان و پڕۆژەی زەبەلاح سوودی نابێت بۆ پڕکردنەوەی کەلێنە زیادەکانی نێوان دەوڵەت و گەلەکەی ، بەڵام دەبێت ھەموو لایەک ئەوە بزانن کە مێژوو باشترین مامۆستایە و فێریکردووین کە بەدرێژایی مێژوو ھەر ھێزێکی گەردوونی ھەرچەند لە دەسەڵات و ھێز و پارە بەھێزیش بووبێت ئەگەر متمانەی ھاوڵاتی لەدەستدا و بەھا و ڕەوشت و پڕنسیبی نەبێت بۆ ئیدارەدان ، ئەوە بەناچای لەناو دەچێت…با ھەموومان پێکەوە بیر لە ئاییندەی دوور بکەینەوە ، با دوای ( ٣٠ ) ساڵ لە حوکمڕانی بیر لە کوردستان بکەینەوە ، ئایا ھەلێک ھەیە بۆ دەرچوون لەو دوڕیانە ترسناکە ؟ بەڵی ھەل ھەن ، دەکرێت کوردستان گەشەبکات و ببێتە خاوەن دۆخێکی تایبەت ، ئەگەر بێتوو سوود لە تواناکانی ئەو گەلە بێجیاوازی لە ھەموو بوارەکاندا و مێژووەکەی وەربگیرێت .