هەر لە دوورەوە دیارە كەبانگەشەكەی مالكی بۆ كۆبونەوەی پەرلەمانی عیراق لە سلێمانی نیاز و مەرامی باشی لە دواوە نیە و ئامانج گەلێكی لە پشتەوەیە كە هیچ قازانجێكی بۆ كورد و رەوتی سیاسی كوردستان و پەیوەندیی لایەنەكانی تێدا نیە . بۆیە دەكرێت لەم جوڵە و هەڵوێستەی مالكیدا هەست بەم مەرامانەی بكرێت:
*ئەگەر ئەو كۆبونەوە لەم كاتەدا لە شارێكی وەكو سلێمانی بكرێت كە واتای خۆی دەگەیەنێت، مەرامی مالكی یان سەرچاوەی بیرۆكەكە روونە ، لە كاتێكدا یەكێتی و پارتی لە هەنگاوی یەكەمی نزیكبونەوە و هەماهەنگین لەسەر مەسەلەكان و بەتایبەتی پەیوەندیە سیاسیە ئابووریەكان و هەلًَبژاردنی سەرۆك كۆمار، بە دیاریكردنی سلێمانی نەك هەولێر لە روانگەیەكی حزبی تەسكی لایەنی عیراقیەوەیە، درزە گەورەكەی پەیوەندی نێوان یەكێتی و پارتی گەورەتر دەكاتەوە، ئەمەش قورٍی بارودۆخە نالەبارە نێوخۆییەكەی هەرێم خەستر دەكات.
* درزی پەیوەندیەكانی نێوان رەوتی صەدر و یەكێتی و تەنانەت صەدر لەگەڵ هەرێم و كوردیش بە گشتی فراوانتر دەبێت، ئەمەش لە بەرژەوەندی هیچ كەسێك نیە، بەتایبەتی كورد.
* ئەم بیرۆكەیە تەنها بۆ دەربازبونی مالكی و سەركەوتنی بلۆكی ئێرانیە لە عیراق و خۆرزگاركردنە لەو چەقبەستنە سیاسیەی كە خۆی و چوارچێوەی هەماهەنگی تێی كەوتوون، ئەمەش لەسەر حسابی بەرژەوەندی كورد و تەنها بۆ ئەوەی داشی ململانێی مالكی لەگەڵ سەدردا سوار بێت و وەكو خۆی و ئێرانیش جوڵەیەكی سیاسی بكەن و لەوانەیە لە چەقبەستوویی وەزعەكەی رزگاریان بێت و زیاتر كورد لە كێشەكانی بەغدا بگلێنن .
ئەگەر ئەم بیرۆكەیە لە بنەرٍەتدا لە تارانەوە دەرچوبێت، ئەوا دەتوانێت بە ئاسانی فشار لەسەر یەكێتی بكات بۆ قبوڵكردنی و یەكێتی ئیحراج دەكات, بەڵام لە رێگەی مالكیەوە دەربچێت ئەوگومانە دوور دەخاتەوە و پێشنیارەكە بە نێوخۆییانە حساب دەكرێت. بۆیە بۆ كورد خۆی زۆر باشترە بۆ یەكجاریش بووە بیری ستراتیجی خۆی بكاتەوە و خۆی لەقەرەی كێشە ئاڵۆزبووەكانی بەغدا نەدات، بۆ ئەوەی دەرئەنجامی ئەم هاوكێشەیە هەرچۆنێك بێت كورد بە سەركەوتوویی لێی دەرچێت و پێگەی خۆی قورستر بكات و بتوانێت قسەی خۆی هەبێت.