لە جیهانێکدا دەژین هەمیشە لە گۆشەوکەنارو داڵان و کوچەو کۆڵان و لاکۆڵانە تەنگەبەرەکانی پڕلە جەنجاڵ و ژاوەژاوی شاردا، کەسانێک هەن لە قووڵایی هەژاریەکی ناکۆتادا باری قورسی ژیانتان ناوەتە کۆڵیان و سەختی و نەبوونیەکانیان خستۆتە سەر شانیان و چەماونەتەوە. ئەم توێژە گەرمی و ساردی و هەورازو نشێوو شکست و نوشستەکانی کایەی ژیان بەشێکی دانەبڕاوە لە ماهیەتی بوونیان. هەروەک بەشێکە بووە لە دوێنێیان و ئێستاشیان بەهەموو جۆرێکی ناجۆر سیخنانە بە کوێرەوەری و ئاڵنگاری و قورساییە بەبڕاوەکانەوە.
هەژارە کەنارکەوتووەکانی کۆمەڵگا و شار، بوونەتە سێبەری خۆیان. ئەمان، لە دۆخی تەنیاییەکی رەهاو تاقەت پروکێن و سەخت و پڕلەنەبوونیدا، هەڵگرانی روئیای ژیانێکن، بتوانێ لانی هەرە کەمی مانەوەو پێداویستیە سەرەتاییەکان و گەرەنتی زیندوومانەوەیان بەهۆی نەداری و دەست کورتیەوە، بۆ فەراهەم بکات و ئەو هێزو وزەو توانایەیان پێ ببەخشێ، بۆ بەردەوام بوون پێویستیان پێیەتی.
ئەم توێژە کەنارکەوتووی شاری پڕلە جەنجاڵی و بێ ئاگا لە ئازاری هەژاران، بێ ئاگا لە مەینەتیە ئەبەدیەکان، نائاگا لە سگی برسی و لوتکەی بێ دەرەتانی، بەرهەمی سپڵەیی سێبەرە خۆ بەزلزانەکانی تری شارو ئەهریمە ن و حوتە ئابوریە هەڵتۆقیوەکانی جیهانی سەرمایەپەرەستی و سەرمایەداری دەستەبژێرەکانی سەروەت و سامانن.
ئەوەی لە ژیانی ئەم توێژەدا ئامادەیەو وەک دوژمنی ژمارە یەک، هەمیشە تارمایی خەستی بەسەر هەموو شتێکەوە دیارە و بووە بە دێوەزمەی جەلادی کوشتنی خەونەکانیانەوە، دونیایەکی دەسکردی لێوان لێوە لە بێدادی. هەژارانی قەراغی شار لە خراپترین دۆخی سەختی ژیانیاندا، هەر هیچ نەبێ بە کەرامەتەوە دەژین و لە ناو تەنیاییەکی بێ سنووردا، هەر بە بێ دەنگیش دەمرن و ماڵ ئاوایی لە جیهانی پڕ لە نادادی و نایەکسانی و نامیهرەبانی و مرۆڤە خۆپەرەست و بێ باکەکانەوە دەکەن.
ئەمان هەڵگرانی شکۆیەکی خورست و خواپێداوی شاراوەو حەقیقەتی ژیانێکی پڕلە کۆڵەمەرگین. پاڵەوانە ڕاستەقینەکانی ڕووبەڕووبوونەوەی ئازاری ئاڵنگاریەکان و پاراستنی کەرامەت و مەلەوانە ڕاستەقینەکانی دەریای پڕ لە شەپۆل و باووزریان و مەینەتی و ترس و خەم و پەژارەو ئازارە شاراوەکان و زەمەنێکی لە جوانی خراوی پڕ لە نادادی و سادیست و بێ ویژدان و ناشرینن.
هەژارە کەنارکەوتووە داماوو بێدەنگ و بێ نمایشەکانی شار، هێماو دەرەنجام و بەرهەمی زەمەن و کۆمەڵگاو سیستەم و ئابوری و واقعێکی جیهانی و تەوژمێکی بێ بەزەیی ڕامالەری باڵادەستن، تا دێت بۆن و بەرامەو سرووشت و تایبەتمەندیە ئینسانیەکانی لە قومارخانەی بۆگەنی سادیسم و فۆڕمە قێزەوەنەکانی خۆپەرەستی و بێماری و بێ مافی و بێ بەهابووندا دەدۆڕێنێ و بەشێکی گەورەی کۆمەڵگاکانی خستۆتە دۆخی بەنج بوون و بێهۆشی و نەهامەتی و بێ باکی و کۆلەمەرگیەکی پڕ لە ئازارەوە.
بێ نەواو بێ سەرپەناکانی شار، ئەو بەشەن بەهۆی جەبرو ستەمی سیستەمە نادادیەکان، هەموو شتێکیان لە ململانێکانی ژیاندا دۆڕاندووە…ئەمان، ئەو توێژەن بێ ترس و سڵەمینەوە لە مەرگ، بێ ترس و سلەمینەوە لە پەراوێزکەوتن، گوێ بۆ هەڕەشەکانی سەر ماهیەتی بوون و کایەی ژیان هەڵدەخەن و قوربانی دەستی رۆژگارو بکەران و هاونیشتیمانیان و پێدراوانێکن، تا سەر ئێسقان بێ باکن بەرامبەر بە دۆخی هەژاران و لە قووڵایی بێ هەڵوێستیدا، پێیان پێ دەکەنن و گاڵتە بە عەقڵیان دەکەن.
پەراوێزکەوتووەکانی شار گوێ بۆ مۆسیقایەکی ئارام و خاوی دەنگی پێی سەختیەکان و هەڕەشەکان ڕادەگرن و لە بەردەم کەژاوەی دونیایەک ئاڵنگاری و پەلەقاژە بۆ مانەوەدا، پرسە بۆ رابردوو ناگرن و شیوەن بۆ ئێستا ناگێڕن و بۆ رووداوو داهاتووی نادیاریشەوە ناشڵەژێن و ناگرین و قوڕ ناپێون و کۆڵ نادەن.
ئەم ئینسانە پاکانە، ئازارەکانی شارو کۆمەڵگا بە هی خۆیان دەزانن و هەمیشە لە نێوان دوێنێ و ئەمڕۆدا، وێنای ئەو دونیا و زەمەن و رۆژگارە دەکەن، رۆژ بەرۆژ بەرەو نادادی فراوانترو گرژی و ئاڵۆزی پڕ رەهەندترو تراژێدیای قورسترو ئازارو مەرگی ناخ هەژێندا، هەنگاوی گەورە دەنێت و ئاراستەیەکی وێرانکەر دەگرێتە بەر و هەموو جوانیەک لە بەردەم خۆیدا ڕادەماڵێ.
پەراوێز خراوانی شار هەڵگرانی پەیام و گوتارو نهێنیەکی رووت و واقیعگەران:
سیستەمی کاپیتالیزم یا سەرمایەداری، دیموکراسی و مافی مرۆڤ و مافی کرێکارو هتد… سیستەمگەلێکی مکیاج کراوی خەڵەتێنەری دەستی سەرمایەدارو پیاوە ماقوڵ و ناماقوڵەکانی سەروەت و سامانن. ئەمان پێیان وایە ئەم جۆرە سیستەم و چوارچێوەو ئایدیۆلۆجیانە وشک و ئەبستراکت و تاک رەهەند و بێ بەزەیین.
هەژارە پەراوێزکەوتووەکانی شارو کۆمەڵگا پێیان وایە سیستەمە سەرمایەداریەکان لە ئێستایەکی دونیایەکی ناهاوسەنگ و پڕ لە کێشمەکێش و ململانێ و ڕووبەڕووبوونەوەدا، مرۆڤ و کۆمەڵگاکان لە ناوەوە دەهاڕن و دابەشیان دەکەن بەسەر جەمسەربەندیە کۆمەڵایەتی و دارایی و سیستەمە موڵکداریەکان و هێڵ و کەلێنە کۆمەڵایەتیەکان تۆختر دەکەنەوە.
ئەمان ڕایان وایە سیستەمی سەرمایەداری لە ئێستایەکی ئاڵۆزکاوی جیهان و شۆڕشی زانیاری و پێشکەوتنە خێراو سەرسووڕهێنەرەکانی بواری ئای تی، سیستەمێکە سیخناخە بە بەرژەوەندیگەرایی و دابەش کردنی مرۆڤەکان و شارو کۆمەڵگاو دواجار نیشتیمان بەسەر هەبوون و نەبوون و بەهێزو بێهێزو هۆشیارو ناهۆشیارو خاوەن ماف و بێ ماف و گرووپ و دەستەو تاقم و حزبدا.
سەرمایەداری رەهاو کۆنترۆڵ نەکراو، سیستەمێکە بڕێکی کەمی بێ بەهرەی کۆمەڵگا ئەشێت خاوەنی بەشە زۆرەکە بێت و بەشەکەی تری کۆمەڵگاش چاو لەدەستی بەشە کەمینەکە.
سیستەمێکە لە رێگەی دونیایەک یاساورێساو رێنمایی دارایی و ئیداری و ئابوری داتاشراو و دەیان دامەزراوەو کۆمپانیای گەورەو بچووکەوە، گیرفانی هەژاران هەڵدەتەکێنێ و چی سەرمایەو هەناسەو دەسکەوت و داهاتی خەیاڵی و بێ شومارە، هەر بە یاساو دەیان پاساوەوە، لای بەشە بەهێزودەسەڵاتدارەکەی کۆمەڵگا گڵ ئەداتەوەو بەرگێکی موڵکایەتی و تاپۆ ئەکا بە بەریەوە.
ئەو پرسیارەی لێرەدا ڕووبەڕوومان دەبێتەوە ئەوەیە:
چ شتێک هەژارونەدارو کەنارکەوتووانی شار بە نیشتیمانەوە گرێ ئەدات؟
دروشمە زەبەلاحە نیشتیمانی و نەتەوەییەکان، خوێن یا خۆشەویستی بۆ ئەو شتەی هەرگیز نەیان بووەو هەرگیزیش بەم حاڵەی ئێستایانەوە نایانبێت و نابن بە خاوەنی؟