ھاورێی دێرین...بەھەردوو دەستتەوە تووند تووند کلک و سەرووگوێلاک و قاچ و گو…نی دونیات گرتووە...بزانە دونیا تاسەربۆ کەس نەبووەو نابێ....رۆژێک دێ مەرگ یەخەت دەگرێ و دوامەنزڵگەت دەبێتە گۆرستانێکی ساردوسرو بێ روح وتاریک...رۆژێ بۆ ساتێکی کورتیش بێ تۆزێک بیر لە مردن بکەرەوە...شەرم و شوورەییە ئەو ھەمووپان کردنەوەیە...تۆزێک بیری ژەنگ گرتووی ماوەبەسەرچووی چەقبەستووت بخە کارەوە و ھەڵوەستەیەک لە سەر وێستگەی ئێستای ژیانت و ناهەمواری و مەرگەساتەکانی دەورووبەرتەوە بکە...خێرە ئەو ھەموو پان کردنەوەیە...بە تەمای چیت...؟ خۆ ماشااللەت لێ بێ لە هیچت کەم نیە! ئەی بۆ بوویتە کەڕەنای پیاهەڵدان و وەک شایەرە گەڕۆکەکانی سەردەمانی کۆن، کۆڵان بە کۆڵان و جادەبەجادە هەر خەریکی قیژەقیژو فووتێکردن و هۆنینەوەی مەتح نامەو نووسینەوەی شانامەی بەسەر ئەموئەودا.
ھاورێی دێرینم...
دەزانم وات لێھاتووە لە خەیاڵی خۆت، خۆت بە ئەفلاتونیش ناگۆریتەوە...تۆ خۆتت لێگۆراوە...ماوەیەکە مخابن دووچاری پەتای لوتبەرزیش بوویتەوە...رێزو حورمەتی خۆت مەشکێنە بە پیاھەڵدان...خۆت سوک و سەلیم و لەکەدار مەکە بە ھۆنینەوەی شانامەی پیاهەڵدان...ئەوەی پەرێزی پاک و پێشینەی رێک و نمونەی ھەرەجوانی ئاستی باڵای رەوشتبەرزی و دەسپاکی و ویژدانی ئاسودەو تۆماری کارو کردارو کردەو کردەوەکانی جوان و بێ لاری وخواری و خێچی بێ و ئەم لاو ئەولای بۆ دەستخستنی کۆمەڵێک بەرژەوەندی دونیایی نەکردبێ وخۆی لە پەت پەتێنی سیاسی و سەنگەر گواستنەوە بەدوور گرتبێ و وەک ئاوی کانیاوێکی پاک وسازگارو مرۆڤێکی جوان کردار، ھەمووان لە ئاوەکەی بخۆنەوەو ئامۆژگاریەکانی بەهەند وەربگرن، ئیتر چ پێویست بەوە دەکات تۆ بە مەتح و سەناوپیاھەڵدانە بێ پرووپووچ و بێ ماناکانتەوە گۆمان بخەیتە سەری و لاسمع اللە تووشی فەخ فەخەو تەنتەتەنە و خۆپەرەستی و لە خۆبایی بوونی بکەی و دواجار هەرئەم بوونەوەرە دووپێیە لەو پەڕی بێ باکی و غرورو حەماقەتێکی گەنی نائینسانی قووڵدا، بە عەوامی بێدەرەتان و هەژارو کایەی ژیان و ئازارەکانی کۆمەڵگاوە پێ بکەنێ و گاڵتەی بە عەقڵی هەمووانەوە بێت...!!!