نووسینی “ دژە باو” یا ڕێچکە شکێن یا نوێگەرا، نووسینێکە دیدگایەکی نوێ بەرهەم دەهێنێ وفۆرمێکی تازە بە دونیابینی خوێنەرانەوە دەبەخشێ و روانگەیەکی ترو ناوازەو تازەگەری وچێژێکی تایبەت بە هونەری نووسین دەبەخشێ .
نووسەری داهێنەر ئەو نووسەرەیە لە رێگەی نووسینی دەقێکی ئەدەبی بەهێزەوە، تێکەڵەیەک وپێکهاتەیەکی نوێ لە رووی فۆرم و ناوەرۆک و ڕستەسازی و بەکار هێنانی دەستەواژە جیاکانەوەبەرهەم دەهێنێ و خوێنەر دەخاتە بەردەم تێگەیشتن و دونیای ئەزموونێکی تازەو ئەزموننەکراوەوە.
نووسەری داهێنەر ئەشێ لە رێگەی نووسینێکی دانسقە و ناوازەوە مانا و مەفهومێکی تر بەکایەی ژیان و رووبەری ئەو دونیاو فەزاو ژینگەیە ببەخشێ، خۆی لە چەشنی بکەرێکیبەئاگاوهۆشیار، بەشێکە لێی و دیدگاو روانگەو دونیابینی تازە دروست بکات و مەعریفەی نوێبەرهەم بهێنێ.
ئەو کەسە نووسەری داهينەرە بتوانێ تێکستێکی شازو بەهێزو تۆکمەو هەماهەنگ و ریتمدار، لەرێگەی تواناو هێزی داهێنەرانەی شەخسیی خۆیەوە، بهۆنێتەوە و فۆرمی نووسینەکانی لەهیکەس نەچێ و کڵێشەیی نووسین و لاسایی کردنەوە نەکاتە ڕێبازی نووسینیەوە.
بۆیە داهێنان لە نووسین واتا رێچکە شکاندن و هێنانە کایەی مێتۆدو رێبازێکی تازە لە نووسینو دەربڕین و هونەرو توانای ڕستەسازیەوە. ئەم تایبەتمەندیە هەڵگری چەندین ڕەگەزو دیویئێستاتێکیایەکی ( جوانکاری) گرێدراوی جۆرێکە لە دونیایەکی تایبەت بە خودی نووسەر و ئەوتواناو هێزە شاراوەیەی نووسەر وەک تاکێک هەیەتی و تایبەتە بە خۆیەوە و لەهی کەسانیترناچێ.
هەڵبەت هیچ مرۆڤێک نیە بە نووسەری لە دایک بێت. نووسەری داهێنەر لە ئەنجامی پرۆسەیەکیدووروودرێژەوە دەبێتە نووسەر و هەمیشە لە دۆخی فێربوون و خۆ نوێ کردنەوەو داهێنانیتازەدا سەرقاڵی داهێنانی تازەو دونیای تازەیە.
ئەو کەسە داهێنەرە لە نووسین، بتوانێ پانتای ژیان بە جوانی ببینێ و خاوەن دیدێکی رۆشنبێت و لە ڕەمزو رازی حەقیقەتی کایەی پڕپێچ و پەنای ژیان ورد بێتەوەو لێی تێبگات.
نووسەری داهێنەر ئەو بکەرە ئەدەبیەیە لەگەڵ خودی خۆی ڕاستگۆ و سەرڕاست و راشکاو بێت ولەرێی سوود وەرگرتن لە دەستەواژە و چەمک و وشە پڕماناکانەوە، بینین و تێگەیشتنی خۆی و ماهیەتی دیاردەو حاڵەت و واقعە هەست پێکراوەکان، لە روانگەی دیدو تێگەیشتنی خۆی بەمێتۆدێکی جوان بنووسێتەوەو فۆرمێکی تایبەت و ماناداریان پێ ببەخشێ و لە لاساییکردنەوەی کرچ و کاڵ دوور کەوێتەوە.