چەند کەسێکیان بە دەنگی بەرزەوە گریان دەرفەت و برستی قسەکردن و ئاخاوتنی لێ بڕیبوون…چەند دانەیەکیان سەرقاڵی حزب حزبانێ و خزم خزمانێ و سۆشیال مێدیاو لایک و کۆمێنت و سەوداو بازرگانی و کڕین و فرۆشتن و پرتەوبۆڵەو گاڵتەوگەپ و نوکتەو پێکەنین و مامەڵەو کڕین و فرۆشتنی موڵکو ماڵ و ئوتۆمبێل و شتی گرانبەهایان بوون و ئەسلەن گۆڕستان و گۆڕو مەرگیان لە بیر نەبوو. ئەمان، تەنیا وەک نەریتێکی دینی یا ئەرکێکی کۆمەڵایەتی یا ئینسانی و یا لە روانگەی برواداریانەوە لەگەڵ جەنازەکەدا هاتبووون و خوا خوایان بوو مەراسیمە زوو کۆتایی بێت و ئەمان بەرەو ژیان و رەوتی رۆژانەیان بگەڕێنەوە.
ئەمیشیان چەند رۆژێک لەمەوبەر لەم گۆڕەتەسک و تاریکەدا ناشت و هەرچەندە هاواری کرد جێم مەهێڵن، بەڵام لەوپەڕی حەپەسان و سەرسووڕماندا خۆڵیان کردە سەری و جێیان هێشت و بەرەو ماڵ گەڕانەوە.
تاوێک بۆی گریان و خەفەتیان بۆی خوارد و تاوێکیتریش لەبیر خۆیان بردەوە و بەرەو ماڵ و ژیانی ئاسایی خۆیانەوە گەڕانەوە.
ئێستا بۆنی قوڕو لیتەو خاکوخۆڵی شیداری ناو گۆڕو کرم و مارو حەشەراتی زیانبەخشی ناو گۆڕ و بۆنی گەنیوی مەرگ کاسی کردووە و برستی لێ بڕیوو.
ئازارەکانی ئێرە نەبڕاوەن و کۆتاییان نایەت. هەرچەندە بیری لێدەکاتەوە لەم مەتەلە تێناگات؟
تۆ بڵێی زیندووەکان رۆژێ تاقە جارێک بیرلە مەرگ و مردن و ئازاری بێ سنووری ناو گۆڕ بکەنەوە؟
ئێرە دوامەنزڵگای هەمووانە…سنووری کۆتایی و دواخاڵ و وێستگەی فەلسەفەی ژیان و ماناو چەمکی بوونە. کۆتایی خەون و خەیاڵ و فانتازیاو خاڵی بوونەوەیە لە هەمووشت.
نە ماڵ و سامانی دونیا، نە ناوو شۆرەت و ناوبانگ، نە پایەوپلەی کۆمەڵایەتی و سیاسی و ئابوری و خێل و خێزان و حزب و خزموکەس و بنەماڵەو دۆست و هاورێ دادی کەس نادەن.
ئێرە لوتکەی کۆتایی ژیان و تاریکستان و داڕزان و توانەوەو وێرانەیەکی ئەبەدیە. لێرە تەنیاییەکی جەرگبڕو کوشندەی بێ کۆتا شەوورۆژ وەک دێوەزمەیەکی ترسناک لە فەزایەکی تەواو تاریک و ڕەشدا، دەست دەخاتە سەر بینەقاقاتەوەو چڕنۆکەکانی دەخاتە ناو گەرووتەوەو قورگت هەنجن بەهەنجن دەکات و بەزەیی پێتدا نایەتەوەو وازت لێ ناهێنێ.
پانتای جموجۆڵ و جرت و فرتی ئێرە تا بڵێی سنووردارە، رووبەرێکی زۆر تەنگ و نافرەوانە و هەرچەندە هاوار بکەی، بناڵێنی، بقیژێنێ، فریاد بکەی و بانگ هەڵدەی هیچ ئادەمیزادێک و بوونەوەرێک دەنگ و سەداو ناڵەو نوزەو شین و گریانەکانت نابیستێ.
لەهەمووی ئازاربەخشتر، جەرگبڕتر و پڕناسۆرەتر ئەوەیە، ئاسۆی دیدو دیدار و دوارۆژ و چارەنووست نادیار و نارۆشنە و خۆزگە بە گەڕانەوە بۆ ژیانی سەر دونیا و دەرفەتێکی تر سات بە سات لەگەڵتە.
لێرە ئومێد بۆ ئەنجامدانی چاکەیەک و قسەیەکی خێر و دەست پاکی و داوێن پاکی و زمان پاکی و پەرێزپاکی وەک نمایش و گرتەیەکی ڤیدیۆیی بێ پچڕان شەوورۆژ بۆ ساتێکیش لەبەر چاوەکانت ون نابن و ئازارت ئەدەن.
لێرە هیچ کەس پرسیاری بروانامە و ئاستی خوێندەواری, ئینتیمای شارو وڵات و ناوچەو دەڤەرو حزبایەتی و هەستی نەتەوایەتی و نەژاد و ئایدیۆژیاو پۆست و پلەو پایەی ژیانی سەر دونیا و سەروەت و سامان و کۆشک و تەلار و موچەو جۆرو ژمارەی ئوتۆمبێل و براندو مارکەی جلوبەرگ و ژمارەی کۆمپانیاو حیسابی بانکی و زەوی و زارو خانوبەرە و ژمارەی کتێبەکان و شتە تایبەتیەکانت لێناکات. ئەسلەم ئەم شتانە لێرە مەوزوع نین.
شەوانی ئێرە تا بڵێی ساردو سڕو تاریک و بە هەیبەت و ترسناکن، نە هاورێیەک، نە دۆستێک و نە ناسیاوو خێزان و منداڵێک شک نابەی.
مردووانی ئێرە لە ژێر تەنێک خۆڵ و قوڕولیتەی گۆڕەکانیاندا برست و هەناسەیان لێ بڕاوەو نقەیان لێوەنایەت و لەوپەڕی دۆخی ماتی و کڕی و بێدەنگیدا راکشاون و جوڵەیان نیە. لێرە هیچ کام لە ئەندامانی ئەم یەکەیە گلەیی لە جۆرو شوێن قەبارەو فۆڕمی گۆڕەکەی ناکات و کەوتۆتە خەوێکی قووڵ و بێ ڕاڤەوە.
ئا لێرەدا گشت خەون و خەیاڵ و ئارەزوو و خواست و ئومێدەکان کۆتاییان دێت و هیچ دەرفەتێکت بۆ گەڕانەوە بۆ دواوەو ژیانی سەر دونیا و دەسکاری کردنی چارەنوس و ئاراستەی ژیان و خۆنمایش کردن و سنگ دەرپەڕاندنت نیە. نەپاسەوانێک، نە دەرگەوانێک نە براو کەسوکارو خوشک و دایک و باوکێک، نەهاوڕێ و دۆستێک، هیچیانت لێ دیار نین و لە ناخی خۆتدا پەنگ دەخۆیتەوە.
لێرە هەمووان وەکو یەکن. پاشاو گەدا، داراو نەدار، هەژارو دەوڵەمەند، سیاسی و ناسیاسی، ساغ و نەخۆش و گەورەوبچوک، هاوئاست و هاوشوێن و هاوشان و هاوپلەو هاوچارەنوس و نیشتەجێی یەک مەنزڵگا و یەک بارەگا و تاکە چارەنووسن.
لێرە رۆژ هەڵاتن و رۆژئاوابوونت لێ دیار نیە. بەیانی و نیوەڕۆ و ئێوارەت وەک یەکن. بۆ تۆ رۆژەکانیش هەر شەون و خامۆشیەکی ترسناک باڵی بەسەر فەزای ناو گۆڕتدا کێشاوە.
لێرە تەنیایی کۆتایی نایەت و سات بە سات خۆزگە دەخوازی خۆزیا هەرگیز مردن بوونی نەبوو و نەدەگەیشتی بە ئێرە.
ئالێرەدا، لەم دوا وێستگەیەی ژیان و هەناسەداندا، مرۆڤ ئاوێتەی ناخی خۆی دەبێ و لە هێزو و گەورەیی و جوانی کەوتن دوا دیاری ژیانی ئەو دونیایەیە، سەردەمانێک خۆی پێوە بائەداو مەستی خۆشی و چرکەساتە لە بیرنەکراوو لەزەتەکانی ناویەوە بوو.