کۆمەڵگای کوردی بە گشت پێکهاتەو چین و توێژە پێک هێنەرەکانیەوە، یەکەیەکی تا بڵێی ئاڵۆزو سەیروسەمەڕەو تێکچڕژاوو شوێن هەڵوەستە لەسەرکردنە.
کۆمەڵگای کوردی بە درێژایی سەت ساڵی رابردوو رووبەرووی دەیان و سەتان رووداوی ناخۆش و تەنگوچەڵەمەی جۆراوجۆری سیاسی، سەربازی، ئابوری، زەبروزەنگ پرۆسەی قەڵاچۆکردن و بە سوتماک کردنی نیشتیمان و جەنگ و ماڵوێرانی بۆتەوە. هەر بۆیەش ئەم کۆمەڵگایە هەرگیز نەیتوانیوە قۆناغەکانی گەشەسەندنی مەعریفی و مۆدێڕنیتەو پۆست مۆدێڕنیتە و فکر، لە دۆخێکی سەقامگیری ئاشتی و پڕلە تەناهی و سەقامگیری سیاسی و کۆمەڵایەتی بە جوانی ببڕێ و دیدێکی سەردەمیانە لەسەر ئەزمون و رووداو و بەسەرهاتەکانی ژیانی سیاسیەکەوە گەڵاڵە بکات و بیکات بە چرای رووناک کەرەوەی بەردەمیەوە.
لە کۆمەڵگایەکی لەمجۆرەدا ئاڵۆزی سیاسی و دۆخی ئابوری پڕ لە تەنگژەوقەیران و هەڵبەزودابەزی سیاسی، وەک شوناسی گەلێکی ستەملێکراوی دەستی مێژووی زەبروزەنگی سیاسی ناوچەکە و جەمسەربەندیەکانی دونیای سیاسەت، تاکەکانی هەرگیز دەرفەتی ئەوەیان بۆ نارەخسێ بە گەڵاڵەکردنی دیدگاو مەعریفەیەکی سیاسی نوێوە بە پیر گۆڕانکاریە ناوچەیی و جیهانیەکانەوە بچن و لەگەڵیان رێ بکەن و بیانکەن بە کەرەسەو ئامرازێکی بەهێز بۆ هەنگاونان بەرەو ئاییندەوە.
تاکەکانی ئەم جڤاکە لە ناخی خۆیاندا هەڵگری دەیان خەون و خەیاڵ و خواست و ئومێدو ئارەزووی بەدەست نەهاتوون. خەبات و تێکۆشان و هەوڵدان بۆ دروست کردنی دونیایەکی جوانتر و دابین کردنی ئاسودەیی و خۆشگوزەرانی و ژیان و گوزەرانێکی سەردەمیانە، هەمیشە پەیوەستە بە دەیان هاوکێشەی سیاسی ناوچەیی و هەرێمایەتی و تەریب بوونیان لەگەڵ خواستە حزبی و نەتەوەیی و نیشتیمانیەکانەوە.
زیاد لەمەش ئەم جۆرە کۆمەڵگایانە بەوە دەناسرێنەوە، تاکەکانی لە دەرەوەی مێژوودا خاوەنی شوناسێکی ئاڵۆز و دابەشکاری و پەرتەوازەیی و قەرەباڵغیەکی وان، پێکەوە گرێدانی جەمسەرەکان و یەکپارچەیی و هەماهەنگی و هێنانەکایەی هارمۆنیای کۆمەڵایەتی و سیاسی لە درووشم و کرداردا، لە مەحاڵەوە نزیکترە تا سەرخستنی و کردنی بە خیتابێکی یەکانگیری نیشتیمانی و نەتەوەییەوە.
دەستە واژەی “ جەمال لۆ مارێ” رێک ئەوەمان بیر دەخاتەوە ئەم کۆمەڵگایە هێشتا قۆناغەکانی پێشکەوتن و گەشەی سیاسی و وەرچەرخانە مەعریفی و زانستیەکانی نەبڕیوە و لە رووکەشدا لە ناو قوڵایی تێگەیشتنە بەرتەسکە کلاسیکی و خێڵەکیەکانیدا قەتیس ماوەو خراپ گیری خواردووەو تا قوڵایی چەقیوە.
ناردنەوەی جەمال بۆ ماڵەوە، هێمایەکی رۆشنی ئەو تێگەیشتن و عەقڵیەت و شوناسەیە لەم کۆمەڵگایەدا هێزەکان بۆ پەراوێزخستنی یەکتر و دەرپەڕاندنی ئەوانیتر و رێگە خۆش کردن لەبەردەم “ خوددا’ دا پەنای بۆ دەبەن و سڵ لە دەرەنجام و لێکەوتەکانی ناکەنەوە.
ئەشێ “جەمال “ هێمایەک بێ بۆ ئەو کەسایەتی و بکەرو کاراکتەرانەی لە یەکەیەکی گشتی کۆمەڵایەتیدا نامۆن بە تێگەیشتنە گشتیەکانی فەزایەکی سیاسی و حزبی داخراوو و دۆخی کۆمەڵایەتی بەرتەسک و رووبەری فرە جەمسەر و فرە رەنگ و فرە دەنگی کۆمەڵگاوە.
جەمال لەم تێگەیشتنەدا هێمایەکە بۆ لە جوانی خستنی “ یەکە سیاسیەکە” یا “ یەکە کۆمەڵایەتیەکە” و دەرکردنی هەوڵێکە بۆ جوانی بەخشین بە “ یەکە سیاسیەکە” و خستنە دەرەوەشی هەوڵێکە بۆ گێڕانەوەی “جوانی “ بە تێگەیشتنە گشتیەکەوە.
ناردنەوەی جەمال بۆ مارێ، ئەو ڕاستیەمان بۆ دووپات و سەت پات دەکاتەوە، هێشتا کۆمەڵگای کوردی لە دۆخی نەخۆشی خۆ دووبارە کردنەوەو بەرهەم هێنانەوەی هەڵەو چەوتیە ناشرین و تراژێدیا ئاساکانی رابردووی دەربازی نەبووەو مەوداوی هزرو تێفکرینی کورتەو پانتای بیرکردنەوکەشی گیرۆدەی فکرێکی تاک رەهەند و کورتبین و تاک ئاڕاستەی خۆ بە حەق زان و بە شەیتانی کردنی ئەوانیترە.
لە دۆخێکی ناجۆری بەدجۆری بەد سەلیقەیی ئاوادا، حەقیقەت گرێدراوی دەیان خواست و دونیایەک لە بەرژەوەندیە رەنگاڵەکانەو بە پێی بەژەوەندی و هەلومەرج و دۆخی کۆ مەڵگاوە شرۆڤەو ڕاڤەی جیاجیای بۆ دەکرێ و وەک حەقیقەتێکی “ رەها” و بە “ پیرۆزکراو” و “ بڤە” وێنا دەکرێ و دەخرێتە روو و ستایش دەکرێ.