کایەی ژیان هەرگیز بێ کێشە و رەهەندی دراماتیکی و نمایشی دیوە پێک ناکۆکان و ململانێی بەرژەوەندیەکان و پارادۆکسەکانی نێوان دوێنێ و ئەمڕۆ نابێت.
کێشەو ئاستەنگە جۆرواجۆرەکان، ئاڵنگاریەکان، نەبوونیەکان، ملهوڕیەکان، لوتبەرزیەکان و بێ باکی نیوەی کۆمەڵگا بەرامبەر بە نیوەکەی تری کۆمەڵگا، بەشێکی دانەبڕاوی دیوە شاراوەکەی پانتای ژیان و رەگەزێکی سەرەکی پێکهێنەری دونیای کردارو بکەرو کاراکتەرە دەمامکدارو بێ دەمامکەکانی ناوینی.
بۆیەش هیچ ژیانێک بێ دراماو ئاستەنگ و ئاڵۆزی نابێت و رۆژەکانیش وەک یەک و تاکرەهەند و تاک سیما نابن. هیچ ژیانێک خاڵی لە خەفەت و نیگەرانی و دڕدۆنگیەوە نابێ.
دونیای ئێستای ئینسانی کورد تا بڵێی دونیایەکی ئاڵۆزە. ئاڵۆزتر لەوەی شاعیرێک بە هۆنینەوەی هۆنراوەیەک وێنای بکات، هونەرمەندێک هەموو دیوەشاراوەکانی بخاتە سەر پەردەی شانۆوە. نووسەرو ئەدیبێکی قەڵەم بە برشت و خاوەن ئایدیا و دونیابینی هێمای بۆ بکات و حەقی خۆی پێ بدات. سیاسیەکی ڕاستگۆو بە ویژدان یا کۆمەڵناسێکی زانایا ئاکادیمیستێکی وردبین رەهەندەکانی شەن و کەو بکات و چاودێرێکی بە ئاگا، شرۆڤەیەکی ڕاستەقینەی بۆ بخاتە روو و چارەسەرەکانیش باس بکات.
زهنیەتی تاکی کورد بەرلەوەی لە یادەوەریە تفت و تاڵ و تراژێدیا ئینسانیەکانی رابردووی خۆی فۆڕمات بکاتەوە، وابەستەی ئێستایەتی و لە ئێستایەکی ئاڵۆزدا چەقیوە. ئێستایەک، هەر رۆژێکی زیاد لە جارێک و دووان و دەیان جار هەڵگری دەیان خەم و ئاڵنگاری و نیگەرانی و ئاڵۆزی و دڕدۆنگیە.
ئەم وابەستەبوونە بە ئێستاو سەرلەبەری رەگەزە پێکهێنەرەکانی، زیاتر لە چەقینێکی نائیرادی و بەدەر لە خواستەکانی تاکی کورد دەچێ، تا دروستکراوێکی سرووشتی.
ئەم دونیا ئاڵۆزە پڕ لە گرژی و ناهەهامەنگیە، دروستکراوی ئێستا نیە. بەڵکو دەرەنجامی سەدەیەکە لە دووبارەبوونەوەو سەت بارە بوونەوەی مێژوو و بەرهەمهێنانەوەی رووداوە تفت و تاڵەکان. مێژوویەک، تاکی کورد هەرگیز نەیتوانیوە لە چەشنی سوارچاکێک رووداو دروست بکات و خۆی مێژوو بنووسێتەوەو خۆی لە پەراوێزکەوتن و بەرکەنارکەوتن و تەماشاکارێکی بێ ئیرادەو حەپەساو بپارێزێ.
ئەم دونیا ئاڵۆزەی ئێستا، ئیمتیداد درێژکراوەی رابردوویەکی لێڵ و پڕ لە هەڵکشان و داکشان و نەهامەتی و مەینەتی و مشەختی و ئاوارەبوون و پەرتەوازەیی نەتەوەییە. ئەم حەقیقەتە وای لە تاکی ئەم سەردەمەی تێکنۆلۆجیاو دونیای سۆشیال مێدیا کردووە هەموو هەوڵێکی بخاتەگەڕ خۆی لەو دونیا پڕ لە کێشەیەی ئێستا جیا کاتەوەو چیتر بڕوای بە “ ئیجماعی نیشتیمانی” ( کۆدەنگی) و قوربانیدان نەبێ و نیشتیمان چیتر لای ئەو ئەو شوێنە نەبێ، هەموو قوربانیدانێکی لە پێناودا ببەخشرێ.
نەوەی ئێستای ناو ئەم دونیاجەنجاڵە نایەوێ چیتر لۆکاڵی بیر بکاتەوەو لە لۆکاڵ و ناوچەو زۆن و دەڤەرێکدا شوناس بۆ خۆی دروست بکات و لە پێناوی “ شوناسی” دەسکردیشدا قوربانی بە سەرووماڵ و ژیان و داهاتوویەوە بدات.
ئەم نەوەیە جیهانی بیردەکاتەوەو لە یەک کاتدا هەم کوردە و هەمیش خۆی بە ئەندامێکی هۆشیاری چاووگوێ کراوەو ئازادو سەربەستی دونیای ئازادەوە وێنا دەکات و هیچ سنوورێک و بەربەستێکی کۆمەڵایەتی، سیاسی، ئایدیۆلۆژی و ئایینی ناناسێ و هیچ تخوبێک بەلایەوە پیرۆز و هیچ حزب و سەرکردەو کولتورو نەریتێکی کۆمەڵایەتی و خێڵێک بەلای ئەو ەوە پیرۆز و باڵاو و بەرز نین.
نەوەی ئێستا لە پێناو ژیانێکی باشترو مسۆگەرترو بایەخدارتر و بەهادارتر ئامادەی هەموو جۆرە قوربانیدانێکە. یەخت یا بەلەمی دەریاوان و قاچاقچی دوا هەوڵی ئەو نابێ بۆ دەربازبوون لەو ئێستا تاقەت پروکێنە.
کاتێک کۆمەڵگاو گەورەکان ناتوانن لانی کەمی ژیان و گوزەرانێکی شایستەی بۆ فەراهەم بکەن، داهاتووی بۆ مسۆگەر بکەن، ئەویش چیتر ئامادە نیە خۆی بکاتە قوربانی دروشم و کولتورو خەون و خەیاڵە ئەرخەوانیە ناواقعی و دوورەدەستەکان و گوتارە ئایدیۆلۆژی و دینی و کۆمەڵاتیەکانەوە.
تاکی ئێستا تابڵێی بوونەوەرێکی هۆشیارە بە ناوی “ من”.
ئەم منە دەیهەوێ لە هەموو شوێنێک حزوری هەبێ و هەموو شتێک و زانیاریەک و ئامانجێک دەست بخات. هەموو هەوڵی “منی” ئێستا بوون بە ناوەندنوونە. ئەو واخەیاڵ دەکات لە سەنتەردایە و خەون و خولیاو ئارەزووەکانی “ من” ی ئێستا وابەستەو گرێدراوو زنجیرکراوی هیچ کام لە چەمکە کۆمەڵایەتی و شۆڕشگێڕی و سیاسیەکانی جاران و ئێستا نین. ئەم “ من” لە پێناو بەختەوەریدا خۆی لە ئاوو ئاگر ئەدات و لە هیچ مەترسیەک ناگەڕێتەوەو هیچ ئامۆژگاریەک و ئەزمونی ئەزمونکراوی خەڵکانی تر وەرناگرێ و هیچ “ پیرۆز”یەک بەلایەوە بایەخی نیە.
ئەم “من”ـە بەردەوام لە ژێر کاریگەری پرۆسەیەکی بەراوردکاری “ من” ی ناخی خۆیدایە لەگەڵ “ من”ـە کانی تری دونیای فرە رەنگ و فرە سیمادا.
“ من” ی ئێستای تووڕە سەرکێشی بەهەموو ژیانیەوە دەکات و لە روانگەی تازەگەری و نوێخوازیەوە خوازیاری فێربوون و ئەزمون کردن و بڕینی هەموو سنوورە وەهمی و خەیاڵەکانە. دەیهەوێ ئەزمونی نوێ لە دونیایەکی نوێ کۆکاتەوەو هەرلە روانگەی ئەم خواستە ئەزمونگەراییەشیەوە، هەنگاو بەرەو بڕینی گشت سنوورە وەهمی و حەقیقی و فیزیکیەکانە دەنێ و سڵ لە هیچ بەربەستێک ناکاتەوە.
ئەم “ من”ـە خۆی بە بەشێکی سەرەکی لە بونیادی ئەو دونیایە دەزانێ، تیایدا دەژی.
“ من”ی ئێستا بە دوای دروست کردنی شوناسێکی ترو جیهانێکی تری پڕ لە دەرفەت و یەکسانی، بەختەوەری، خۆشگوزەرانی، دادی کۆمەڵایەتی و جوانی ، هەموو هەوڵێک ئەدات و گشت رێگاو کوێرە رێگاو نەخشە رێگایەک تاقی دەکاتەوەو لە لوتکەی چەکەرەی خەیاڵی ئاڵۆزیدا، باکی بەهیچ مەترسی و نقوم بوون و مەرگ و هەڕەشەو گوڕەشەو چاوسوورکردنەوەیەک و بەربەست و سنوورو ئاستەنگێکەوە نیە.
“ من”ی ئێستای تووڕەو سەغڵەت و سەرکێش، دۆخی چەقبەستوویی فکری و چوارچێوەی شارو لۆکاڵ و ناوچەو دەڤەرو تەسکبینی تێپەڕاندووە و رووەو داهاتوو هەنگاو دەنێ و پشتیش دەکاتە رابردووەوەو تابۆشی بکرێ خۆی لەو دونیایەی ( جوان یا ناشرین) بۆی دروستکراوە، دادەبڕێ.