شار و شەقام پۆشاکێکی تریان پۆشیوە. لەپاڵ هەر هەنگاوێکدا، دەیان وێنەو پۆستەری رەنگاڵە بە فۆڕم و سیمای جیاوە سەرەنجت بۆ لای خۆیان ڕادەکێشن. پۆستەرەکان هیچ رۆح و جووڵەیەکیان نیە، بەڵام بوونەتە کەرەستەیەک بۆ تۆخ کردنەوەی ململانێکان و هەر کامەیان هەڵگری دەیان پەیام چیرۆک و حیکایەتی ناوەکین و وێنەی کۆمەڵێک لە کاندیدکراوانی حزبەکان دەخەنە نمایشەوە.
شاروشەقام لەم دیمەنەدا چیتر ئەو فەزاو شوێنەنین بکەرانی کۆمەڵگا و لایەنە سیاسیەکان تیایدا بەیەک بگەن و ڕاستەوخۆ کۆمەڵگا و یەکتر بدوێنن و گوێ لە داەاکاری و ڕازونیازو خواستی یەکترەوە بگرن.
پەیامی ئەمجارەی پۆستەرەکان بۆ بە بازاڕکردنی ئەو شتەیە هەڵگرانی پۆستەر و وێنەکان لە ناخی خۆیاندا هەڵیانگرتوون. زمانی جەستەی وێنەو پۆستەرەکان زمانێکی نەنووسراوو نەدرکاوە کەوا لە چوارچێوەی تێکهەڵکێش کردنی چەندین رەنگ لۆگۆو و پەیام و نووسینێکی کەمەوە خۆیان نمایش دەکەن.
فۆڕم و چوارچێوەو قەوارەی وێنەکان بە پێی هەڵگرانی وێنەکان و ئەو بەرەیەی ئەمان نوێنەرایەتی دەکەن، تەواو جیاوازە. وێنەکان نمایشی کەسانێک دەکەن تامەزرۆی دەرچوونن لەو کەرنەڤاڵ و پرۆسە تەژی گرژی و ئاڵۆزی و نمایشەی ناوی نراوە “ هەڵبژاردن”.
کاندید کراوەکان یا کاندیدەکان دەیانهەوێ لە رێگەی ئەم خودنمایشیەوە بانگەشەی دروست کردنی دونیایەکی جوانتر لەوەی ئێستا بکەن. دونیایەک تیایدا دادپەروەری و هێمنی و ئاسایش و خۆشگوزەرانی لە تروپکی بەرنامە و ستراتیژیە سیاسیەکاندا چەکەرە بکات و ئامانجەکان بپێکێ و نیشتیمان بەرەو قۆناغی گەشە سەندن و پێشکەوتن و یەکسانیەوە بەرێت.
فەزای شار و شەقام بە وێنەی دەیان و سەتان کاندیدی حزب و بزووتنەوەو لایەنە سیاسیەکان داپۆشراوە. رووبەری کۆمەڵگا و کەلەبەرو داڵانەکانی کۆمەڵگا لە شاروگەڕەک و ئاوەدانیەکانەوە بگرە تا دەگات بە ناوماڵ و ژوورەکانی نووستن و گەڕەک و حەوشەی ماڵەکانەوە، بووە بە شوێنگەی مقۆمقۆو مشتومڕو قسەوباس و گفتوگۆی هەڵبژاردن و ژمارەی کورسیەکانەور.
باسوخواسی هەڵبژاردن و ئەگەری دەرچوون و دەرنەچوون و رێژەو ژمارەی کورسیەکان، هەژمونی خەستی خۆی بەسەر سەرلەبەری پانتای کۆمەڵگاو بابەتەکانی پەیوەست بە دوارۆژی وڵاتدا سەپاندووە.
وێنەی بکەران و بەربژێرانی حزب و لایەنە سیاسیەکان، دیمەنی شار و شەقامی تەنیوەتەوەو شاروشەقامی لە قسەو باس خستووە. وێنەی ژمارەی لە رادەبەدەری بەربژێرانی لایەنە سیاسیەکان شوناسێکی تری بە شاروشەقام بەخشیوە. برێکی زۆری ئەم شوناسە پەیوەندی بەو پەیام و بەڵێنانەوە هەیە بەربژێران لە رێی تێکست و رەنگ و بزەی سەر لێو یا مچ و موڕی و ناوچەوانێکی گرژو بوغزاوی و فۆڕمی وێنەو پۆستەرەکانەوە بۆکۆمەڵگای دەگوازنەوە.
ئەم دیمەنە، دیمەنێکە هەم ترسناکە و هەمیش یەکسانە بە دروست کردنی دونیایەکی پڕ لە وەهم و خەیاڵپڵاوی دوورەدەستەوە. پۆستەرەکان لە هەندێ فۆڕمیاندا حیکایەتی ئەو دابەشکاری و فرە دونیابینیەمان بۆ وێنادەکەن، کۆمەڵگای لە پەلوپۆو جوانی خستووەو دۆخێکی تەواو ماندووکەرو پڕ لە پاڵەپەستۆو نائومێدکەری بۆ تاک و کۆمەڵگا دروست کردووە.
رووبەری شەقامەکان جگە لە ژمارەی بێ شوماری ئوتۆمبێلەکان و جمەی هاتوچۆ بە شێوەیەکی خەست کەتووەتە ژێر فشارو باڵادەستی پۆستەرەکانەوە. لایەنە سیاسیەکان لە رێگەی ئەم وێنەو پۆستەرانەوە هەوڵی ئاخاوتن و دوان و قسەکردنی کۆمەڵگا دەدەن.
شار و پانتای شەقام و کوچەو کۆڵان و گۆڕەپانەکان چیتر ئەو شوێنە نیە تیایدا ئەندامانی کۆمەڵ پێک بگەن. بەڵکو لە وردبوونەوەو سەرەنجدانێکی خێرادا بووەتە شوێنگەی ململانێی کۆمەڵێک پۆستەری بێ رۆح و گیان و فرە رەهەندی سیاسی و ئایکۆنی ئەو ناکۆکی و دابەشکاریانەی لە فەزای سیاسیدا بە زەقی ئاماژەکانی دەرکەوتوون.
هەر ئەم پۆستەرە بێ رۆح و گیانانە لە رووی هونەریەوە نەک هەر شارو شەقامیان لە جوانی خستووە، بەڵکو وایکردووە شاروشەقام ببن بە گۆڕەپان و بازاڕێکی قەرەباڵغی بۆرسەو قازانج و زیان و کڕین و فرۆشتندا. دۆزینەوەی کڕیار یا دەنگدەر بۆ ئەم پۆستەرانە لە چەشنی ئامانج و نیەتێکی ناوەکی ناوی نراوە بانگەشەی هەڵبژاردن و چۆنیەتی مامەڵەکردنی بکەرانی دونیای سیاسەتیش لە تەک ئەم دۆخەدا، تا دێت قورسایی و نیگەرانی و ترسەکان بە شێوەیەکی زۆر بەرەو هەڵکشان دەبات و ئاسۆیەکی لێڵ دەخاتە بەردەم پرۆسەی سیاسی و دیموکراسی و خودی مەغزای هەڵبژاردن و ململانێی شارستانیەوە.