لەبەردەم پەینجەرەی ژوورە تاریکەکەیدا دانیشتبوو.
بێ ئەوەی بەدەست خۆیەوە بێت و رۆڵی تیادا هەبێ کەوتە بیرێکی قووڵەوەو کۆنترۆڵی لەسەر هەستونەستی نەما. سەرەتا وایزانی کەوتۆتە ناو دونیای “ ژیری دەسکرد” و پێدراوێکی پڕبە هەژمونی “ دەرەکی”ـەوە.
هەموو جەستەی بوو بە زمان و دیوارێکی دابڕ کەوتە نێوان خودی ئێستای و خودی دوێنێی سێبەرەوە. سێبەرێک لەوەتەی هەیە وەک تارماییەکی ترسناک و مۆتەکەیەکی قێزەوەن بە دوایەوەیەو بەرۆکی بەرنادات و تەنگی پێ هەڵئەچنێ و تووشی هەناسەبڕکێی ئەکات.
ئەو، لە چرکەساتێکدا هەم بەشێک بوو لە دوێنێ و هەمیش بەشێک بوو لە ئێستای پڕلە وەهم و بەڵێنی درۆ و خەیاڵ پڵاوی شۆمەنەکانی دونیای نمایش و ستایش و گاڵتەجاڕیەوە.
خودی دوێنێی دەمارگیرومێشک داخراە هەموو گفتوگۆو دانوستانێکی لەگەڵ خودی ئێستای هۆشیارو ئاگادار، رەت کردەوەو ئامادە نەبوو دان بە ڕاستی و حەقیقەتە ترسناکەکاندا بنێت و لەگەڵیدا بکەوێتە گفتوگۆو دانوستانەوەو سنووری دەمارگیری و بیری تەسک ببڕێ و چیتر لە چەشنی بە پیرۆزکراو، مامەڵەی نەکات.
زۆری نەبرد هەستی بە هەژمون و فشاری بەردەوامی هۆشیاری و گەردیلەکانی ناو ژوورە تاریکەکەیەوە کرد و کەوتە ژێر هەژمونیان و لە پڕ زمان هاتە گۆ:
“ساڵەهایە وێڵی نێو داڵانەکانی دونیای وشەو ڕستەو دەستەواژە لاستیکیەکانی نێو وشەدان و هەنبانە بۆرینەی تەمەنێکی لەدەست چوو و زەمەنێکی بەسەرچوو و پڕلە هەڵکشان و داکشاندا شرۆڤەی بۆ؟ لەپای چی؟ کەی؟ چۆن؟ دەکەم و هەرگیز نەمتوانی وەڵامێکی قەناعەت پێکەر بۆ خۆم
بدۆزمەوە”
ساڵەهای ساڵ شرۆڤەی رەوتی کایەی ژیان و هۆکارو دەرەنجامی رووداوەکانی دەورووبەرم بە جۆرێک دەکرد، دڵخوازی خۆم و دەورووبەرم بن، تا دواجار رۆژ بەرۆژ لە واقع و حەقیقەت و ماهیەتی هەموو شتە پێدراوو پێنەدراوەکان دوور کەوتمەوەو بووم بە بوونەوەرێکی نامۆ بە ئێستاو داهاتوومەوە.
دوای ئەم هەموو ساڵە لە چاوەروانی، نە لە داهۆڵە پڕپێچوپەناکانی نێو ڕستەکان و دەستەواژەو پرسیار و شرۆڤە و راڤە و گوتارە میدیاییە سەت بارەکان و بێ وەڵامە هەمیشەییەکان ڕزگارم بوو، نە ئەو ئاسۆیەشم لێ هەڵهات ساڵانێک بە هیوایەوە سات بە ساتی تەمەنم لە چاوەروانی هاتنیدا بەڕێکرد و بە هیوای ( خۆ دێ) لە ناو خودی خۆیەکی شەکەت و سەرگەردانی نێوان دوێنێی وێران و ئەمڕۆی ئاڵۆزدا توامەوەو نەمتوانی سنوورەکانی وەهمە ئەبەدیە کوشندەکە تێپەڕێنم و بۆ سەرزەمینی “ ئازاد” بوون و ئینسانیەت و بەها ئینسانیەکان بگەڕێمەوەو واز لە خەون و خەیاڵ بهێنم.