ئێمە چیرۆکی نێو کتێبێکی تۆز لێ نیشتووی سەردەمانێکی کۆنین. ئێمە پرسیارێکی قورسی بێ وەڵام و بوونێکی سیحراوی و گومانێکی خەستی هەمیشەیی و خەیاڵێکی فرە رەهەند و بەرهەمی دۆخێکی تێکچڕژاوی ناوەکی و دەرەکی و ئاڵۆزیەکی هەمیشەیین.
ئێمە نەتەوەیەکی پڕ لە گرێی دەروونی و پڕ لە بەسەرهات و تەژی تراژێدیاو خەمنامەیەکی نەنووسراوی نێو کتێبخانەکانی مێژووین.
ئێمە گەلێکی نێو پەیج و لاپەڕەکانی مێژوویەکی نەنووسراوی پڕ لە هەڵکشان و داکشان و تەمومژاوی و کارەساتبارین.
ئێمە نەتەوەیەکین تا دێت زیاتر ڕقاوی و بوغزاوی و پڕ لە گرێی دەروونی بەرامبەر بە یەکتر دەردەکەوین و وەک هێمایەکی بەهێزی پەرتەوازەیی و خۆپەرەستی و سایکۆلۆجیایەکی بێمار و گەلێکی بریندار، بووین بە بەڵاو خەمێکی گەورە و بارێکی گران بە سەر شان و بوون و ماهیەتی خۆمان و نیشتیمان و شوناسمانەوە.
ئێمە بە درێژایی مێژوو و لە هەموو قۆناغەکانیدا، دوژمن و نەیاری ژمارە یەک و سەرسەختی خودی خومان و بەرهەمهێنەری کەرەستەو ئامرازەکانی پەرتەوازەیی و سڕینەوەو سوکایەتی و کەرامەت شکاندن و ستەم و مل شکاندن و مێژوویەکی ڕقاوی و بوغزاوی و پڕ لە هەڵبەرزودابەزی وێرانکەری ماهیەتی کوردبوون و شوناسی یەکانگیری نەتەوەییمان بووینە.
دیواری کۆشکی دونیای کایەی سیاسیمان لە بری هۆشیاری سیاسی و نەتەوەیی و هێزی عەقڵ و مەنتیق، بە وشەو دەربڕین و دەستەواژەو چەمکەکانی دەمارگێری و دابەشکاریەکانی خێڵ و فیرقەو تاقم و دەستەو جەمسەرو کوتلەبازیەکانەوە، سواق دراوە.
ئێمە کەسانێکی کەنارکەوتوی هەناوی ناسیۆنالیزمی جیهانی و کۆتایی کتێبێکین سەرەتاو کۆتاییەکەی دیار نیە. ئێمە شەپۆلێکی بە تەوژمی وێرانکەری شوناس و چەمکی نەتەوەیەکین، لەوەتەی هەین، دەرمارگیری خزم و خێڵ و بەرژەوەندیپەرەستی و کەلەرەقی و عینادی و خۆپەرەستی و هەژمونگەرایی و ناوچەگەرێتی، هێزو پاڵنەری سەرەکی ئاراستەکەی بووە.
هەر ئەم شەپۆلە وێرانکەرەش بە درێژایی زەمەن، بونیادی “ چەمکی نەتەوە” و “ نیشتیمان پەروەری” و “ یەکپارچەیی” لە گشت جوانی ماناو ئامانج و سیحری یەکبوون و یەکپارچەییەوە خستووەو لە رەگ و ریشەوە هەڵیتەکاندووەو ئێمەیشی تووشی “ گێژبوونی”ێکی درێژ خایەنی کوشندەی نەتەوەییەوە کردووە.
ئێمە هەرگیز یەکڕیزو یەکپارچەو تەبا نەبووینە. ئێمە هەرگیز وێنەیەکی جوانی نێو چوارچێوەیەکی بەهێز و یەکگرتووی نەتەوەیەکی زیندووی ئاگامەند نەبووینەو هەرگیزیش هەوڵمان بۆ “ نەتەوەسازی” نەخستۆتە خزمەت پرۆژەو روئیا تاکەکەسی و دەستەجەمعیەکانمانەوە.
کێ ئەڵێت ئێمە یەکین؟ کێ پێی وایە ئێمە پەندمان لە مێژووی پڕ لە کارەسات و مەینەتی و نەهامەتیەکانمان وەرگرتووەو کردوومانە بە چرای روناک کەرەوری هەنگاوەکانی داهاتوومان بە ئاراستەی نیشتیمان سازی و دروست کردنی تاکێکی هۆشیارو بەرپرسیار و پڕلە پرسیارو ئاگامەندەوە؟
ئێمە حیکایەتی هەوڵە شکستخواردووەکانی خودی خۆمانین. حیکایەتێکی ناکۆتا و پڕ لە پێک ناکۆکی و دژبەرو یەکەیەکی ناهەماهەنگ و پرسیارێکی سەت بارە بووەوەی گەورەی بێ وەڵام و ماندووکەر…خەمنامەیەکی قەبارە گەورە…مێژوویەکی خوێناوی و تەماوی و پڕلە ململانێ و دوا خاڵ و دوا بڕگەو دوا پەرەگرافی کتێبێکین، سەرەتاو ئێستاو داهاتووی لە یەک ئەچێ و هیچ جیاوازیەکی بونیادی و فەلسەفی و مەعریفی لە دوێنێ و ئەمڕۆیدا بەدی ناکرێت و ئەمڕۆمان ڕێک کۆپی دوێنێمانە.