ڕاپۆرتە رۆژنامەوانیەکان لە سەر زاری شارەزایانی نەناسراوی کەشناسی سیاسی و بوومەلەرزەزانی جەنگی ڕاگەیاندنی هەردوو جەمسەرەکەی هێز لە هەرێم ئاماژەیەکی دڵخۆشکەریان داوە بەوەی رەنگە، گوێی شەیتان کەڕ و چاوی حەسود کوێر، بیلامانێ لەم نزیکانە هینەکانی سەر بە هەردوو جەمسەرەکەی دەسەڵات لە ئاسمانێکی ساماڵی سیاسی و کەشێکی خۆشی دوورلە بارانی بەخوڕو تەرزە و باوو هەورە تریشقە، لە ناشوێنێکی نادیاردا کۆ ببنەوە.
شایانی ئاماژەپێکردنە ماوەیەکی زۆرە بەهۆی کەشی باراناوی رووبەری ئاسمانی سیاسی و تۆخ بوونەوەی هەورەباراناویەکان و خێرایی ململانێی بەردەوامی ئاسمانی ساماڵ و باوو زریانی جەنگی ڕاگەیاندن و یەکتر شۆشتنەوەو هەڵدانەوەی کۆنەقین لەلایەن هەندێ کۆنەهینەوە، هەرێمی کوردستان ڕووبەڕووی دۆخێکی سەهۆڵبەندان و چەقبەستوویی ساسی و باوو زریانی یەکتر تۆمرتبارکردن بووەتەوە.
دوای دەست پێشخەری و هەنگاونانی چەند بکەرو کاراکتەرێکی ئاشتیخوازو سوڵحاوبۆ خواو عەوام و قیامەت، وابڕیارە لە ئاییندەیەکی نزیکدا جەماعەتی ئەملا لەگەڵ جەماعەتی ئەولا بۆ یەکلایی کردنەوەی چەندین پرسی پەیوەست بە کەشوهەواو پرۆسەی باراناوی و نازونیعمەتی سیاسی و چەقبەستوویی سیاسی و شکاندنی بەستەڵەکی زۆنەکان، کۆببنەوە.
بەڵێن دراوە کۆبوونەوەکان لە کەشێکی ساماڵی سیاسیدا بەڕێوەبچن و شارەزایان و چاودێران دەڵێن ئەم دیدارو یەکتر بینین و یەکتر زیارەت کردنە، دوورو نزیک پەیوەندیان بە کۆپۆنی بەنزین و دابەزاندنی کەفوکوڵ و هەڵچوونە سیاسی و بەنزیناویەکانەوە نیە. بەڵکو هەوڵێکە بۆ خۆشکردنی زەمینەی لەبارو کەشی گونجاوو ئامادەسازی و کێڵانی ڕووبەری زەویە سیاسیەکان و رەواندنەوەی لێک تێنەگەیشتنەکانی پەیوەست بە ئاییندەی چاندنی زەوینە سیاسیەکان و چنینەوەی بەرهەمەکان و هاوسەنگی لە بڕی باران بارین و دابەشکردنی دەسکەوتەکان، لە میانەی پرۆسەیەکی تۆکمەو پاڵپشتیکراوی سیاسی و باراناویەوە.
شارەزایانی کەشوهەوای سیاسی پێیان وایە پێویستە وەک دەسپێک هەموو هەوڵەکان بە ئاراستەی ئاسایی کردنەوەی ئاسمانی سیاسی و لادانی هەورەبروسکەو هەورە تریشقەکانی جنێوو ناوزڕاندن و پانتای راگەیاندنەکانی نووسراوو بیستراوو وتراوەوە بن و جەنگی ساردی کوتەک وەشاندن و شیروتیر لە یەکتر سوین، لە رووبەری دونیای مەجازی و پێگەو پەیج و ماڵپەڕە پڕلە ڕق و قینەکان کۆتایی پێ بێت و سەرەتایەکی نوێ دەست پێ بکاتەوە.
زیاد لە مەش شارەزایان و چاودێران هیوادارن لایەنەکان بەوپەڕی متمانەو بڕواوە لە کۆبوونەوەکە ئامادە بن و رێگە نەدەن شەڕە جنێوو شەڕە دەنوک و تێهەڵدان و تۆمەت بەشینەوەکان و هەڵچوون و داچوون و ڕۆچوونە سیاسیەکانی رابردوو، کاریگەری نەرێنی بکەنە سەر کەشوهەواکەوەو ئەگەری باران بارینی بەخوڕو دروست بوونی لافاوو کەفاوی وێرانکەر، بۆ نزمترین ئاستی رێگەپێدراو کەم بکەنەوەو زامنی داهاتوویەکی باشتر بکەن.