لە دونیایەکدا دەژین هەرکامەمان لە رووبەرێکی تەسکی کۆمەڵایەتی و کایەی ئاڵۆزی سیاسیدا، بووینەتە پارێزەر وتەبێژی بەرژەوەندیەکانی خۆمان و سەپانی کردەی پیسخۆریی بەشێکی ترمان.
لە دونیایەکدا گیرمان خواردووە سەرلەبەری بە جەنگ و ئاشوب و گەڕەشەو ململانێی خوێناوی و بۆمباو بەدکاری بەدکرداری و کردەی قێزەوەن و خوێن رشتن و گرژی و ئاڵۆزیەوە تەنراوەو دیوارەکانی لێکترازانی، بە خوێن و باروتەوە سواخ دراوە.
لەم کایەیەدا گرینگ نیە رابردووت چیە؟ تو کێیت؟ پێشینەی مەعریفی و بەکگراوندی کۆمەڵایەتیت چیە؟ پەروەردەی دەستی کام دایکوباوک و کۆمەڵگاو سیستەمی پەروەردەی؟ سەربەکام ئایدیۆلۆژیای؟ باری تەندروستی و سایکۆلۆژیات چەندو چۆنە و سەربەکام تەوژمی سیاسی و کۆمەڵایەتی و ئایینیت و لە ژێر سێبەری کام بەڕێزی کڕدراوی “ بەڕێزتر” لەخۆت، کەنارکەوتوی.
گرینگ نیە ئاستی خوێندەواری و رێژەی هۆشیاری و مەعریفیت چەندە؟ ئاخر پێم ناڵێی کێ هەڵسەنگاندن بۆ ئەم شتانەی سەربە دونیای “ شتەکان” دەکات؟
کێ پێوەری بۆ داناون؟ پێوەرەکان چین؟ کێن ئەوانەی بڕیار لە سەر ئاستی هۆشیاری و تيگەیشتوویی و پێگەیشتوویی و مەعریفی منو تۆ دەدەن؟
کێ بنەما ئەخلاقی و عەقڵانیەکانی داناون؟ و لەم سەردەمەدا چۆن پێناسەی ئەخلاق و عەقڵانیەت و ئینسانیەت دەکرێ؟ پێوەرەکان چین؟
جاران مرۆڤ بوون و نیشتیمانپەروەری دوو دووانەی پێکەوەلکاوو دانەبڕاو بوون…جاران ڕاکردن لە ناو هێزێکی بێ هێزو لاوازی سیاسی بۆ هێزێکی تری بەهێزی سیاسی، عەیبەیەکی گەورەو نشوستێکی ئەخلاقی مەزن و حاڵەتێکی ناشرین و قێزەوەن بوو…ئێستاکە ئەمبەرو ئەوبەرکردن و سەنگەر گۆڕینەوەو حزب گۆڕین و سەرۆک گۆڕین و عەقڵ گۆڕین، رێک وەک کوێستان و گەرمێنی لێهاتووە و فۆرمێکی ناشرینی بەسەر فەزای گشتی سیاسی و نۆڕمە فەلسەفیەکانی سیاسەتدا هێناوە.
ئێستێکە پارەو بەرژەوەندی و تێرنەخۆری و مشەخۆری و پیسخۆری و حەرامخۆری و بەرتیل
خۆری و مافخۆری، شوێن پێی بە باوەڕە جێگیرەکان، بەهاکان، باوەڕە ئایینیەکان، جوانیەکان و ئایدیۆلۆژی و گوتارە شۆڕشگێڕیەکان لەق کردووەو رووبەری ژیان بۆتە مەکۆی تەراتێنی تاک و جەمسەرە بەرژەوەندگەراکان و مسۆگەرکردنی ئێستاو ئاییندە…بەهەر نرخێکەوە بێت.
مێژووی ئێمە پڕە لە رووداوی لەمجۆرە.ئەوە ئێمەین لە رێی باوەڕو بۆچوون و نۆڕم و هەڵوێستەکانمانەوە، لە رێی هەڵسوکەوت و جموجۆڵە سیاسی و کۆمەڵایەتیەکانمانەوە، لە چەشنی ئەکتەرە نمایشکارەکانەوە لەسەر ستەیجی شانۆی پانتای پڕ لە ئەکتەری ژیان، گۆڕانمان بەسەر هەموو شت و بەها جوانەکاندا هێناوەو وەستاو شارەزاو پسپۆڕی لە جوانی خستنی بەهاکان و دروست کردنی گرژی و ئاڵۆزی و جەمسەربەندیەکان و دروست کردنی دونیایەکی ئاڵۆزی پڕ لە نیگەرانی و بێ خەوی و بێ خەمی و هەڵکشان و داکشانین.
سەردەمی ئێستا سەردەمی ڕاکردنە لەو واقیعەی خۆمان ئەندازیاری سەرەکی بونیادنانین. سەردەمی لەسەرلەنوێ داڕشتنەوەی حەقیقەتە مێژووییەکانە، بەڵام بە مەزاجی خۆمان و پێوەرە رەمزی و دیسکۆرس و پارادایمەکانی ئارەزوومەندانەکانی خۆمانەوە. لە هەمووشی وێرانکەرتر و پرۆکێنتەر، چاوروانی، سیمای ئێستای ئاڵۆز و تەماویمانە. ئێستا وەرزی شکست و نشوسستی بەهاکانە…شکستی و پوکانەوەی ئینسانیەت و سۆزو و وەفاوئەمەکداری و پەیمان شکێنی و بەڵێنی بەتاڵ و هاشوهوشی بازاڕیانەو گاڵتەجاڕی ماس مێدیایەکی مایەپوچی وێرانکەرو گنە.
دونیای ئێستامان پڕیەتی لە نیشانەکانی پوکانەوەی مافی مرۆڤ و یاساکان و چڵەپۆپەی فاشیزم و پۆپۆلیزم و سەروەرو سەردار کردنی دۆلاریزم و دیناریزم و ناشتنی ویژدان و هاودەردی و هاسۆزبوونە.
زەمەنی نقوم بوونە لە ناو “ ئێگۆ”یەکی لەخۆبایی و خۆپەرەست و خودێکی سەرگەردان و بزرو بزۆزو کەم هێزو سەرکز.
سەردەمی چەکەرەی عەشقێکی خۆڵەمێشی و درۆیینەو ساختە و خودئەڤینیەکی بێ ناوەرۆک و ناشرین و نەغرۆبوونە لە ناو “ ئێگۆ”دا ( خۆپەرەستی). زەمەنی پەراوێزکەوتن و پەراوێز خستن و کەنارکەوتن و گۆشەگیری و بە حاشیەبوون و فەردگەرایی و خۆدابڕینە لە کۆمەڵگایەکی پڕ لە کێشەو نایەکسان و کپ و تووڕەو ئاڵۆزکاو .
ئێستامان وەرزی کاڵ بوونەوەی سۆزە. سۆز بەرامبەر سەرجەم ئەو شتانەی لە تایبەتمەندیە جەوهەریەکانی مرۆڤ و مرۆڤایەتین. زەمەنی میعراجی هزرو سنووربڕینی فکرە بۆ ناشوێن…وەرزی کاڵبوونەوەی فکرو چاولێکەری و مەلەکردنە بە ئاراستەی شەپۆلی زەریاو شەن کردنە بە ئاڕاستەی باو بەرژەوەندی. زەمەنی چەقینە لە ناو دۆخێکی ئاڵۆزی ناکۆتا و میکیاج کراو بە هاورێیەتی درۆیینەو قسەی باقوبریق و بەڵێنە بەتاڵە خەڵەتێنەرەکانی دونیای پڕ لە کێبڕکێی ئابوری و سیاسەت.
قۆناغی لە جوان کەوتنی ئاکارە جوانەکانە.
زەمەنی پێویستی بوونە بە عەشقی ڕاستەقینە و خاڵی لە تەڵەکەبازی و نمایشی ساختەو خۆدەرخستن و یاری بە عەقڵ و ئاوەزو خۆشباوەری.
سەردەمی سڕینەوەی دوێنێیەکی جوان و بێ بایەخ کردنی ئێستاو لەکەدار کردنی داهاتوو و دەسخەرۆدانی هیوایە بە بەڵێنە خەڵەتێنەرەکان.
لەم سەردەمەدا زەینەکان ساردوسڕو لە پەلوپۆ کەوتوون و لە خاڵێکدا قەتیس ماون. دۆستایەتی، خزمایەتی، هاوسێیەتی و هاوڕێتی و خۆشەویستی تا پلەکانی ژێر سفر دابەزیون…هاوسۆزی و هاوچارەنووسی لە ماناو واتا کەوتوون…هەرکەسەو بیری لای بەرژەوەندی و مسۆگەرکردنی ژیانی خۆی و دەست خستنی پلەوپایەو پێگەو رێگەو جێگەی گەرم و نەرم و فێنک و سازگارو کڕینی زەوی و ئاسمان و تاپۆکردنی میرات و دەسکەوتەکانە.
ئەگەر یەکێک پێویستی بە یارمەتی بێت، کەم کەسانێک هەن لێی تێبگەن…مرۆڤەکان بەزەیی نەک هەر بە یەکتر، بەڵکو بە سرووشت و ژینگەو ئاژەل و باڵندەکانیش نابەنەوە.
هیچ کەس تاقەتی خوێندنەوەی کتيبی نیە. لە سەر پەڕەی کتێبەکان هیچ نانووسرێت. تەنانەت لە پێناسەکردنی دۆست و نەیارو دوژمنیش دا، پێوەرەکان دەگۆڕێن و هیچ شتێک وەک خۆی نەماوە.
ئێمە پێویستیمان بە گۆڕانکاریەکە هاوتەریب و هاوئاهەنگ بێت لەگەڵ خێرایی ژیان و گەشەو پێشکەوتنی ژیان و جووڵەی تەکنۆلۆژی و لە گەڵ تەمەنی کورتمان رێ بکات و رێکی بێتەوە.
ئێمە حەوجەی گۆڕانکاریەکین فۆرمی ژیانی ئێستامان بۆ باشتر و دۆخێکی جێگرتر بگۆڕێ و لە رووبەرووبوونەوەی سەختیەکاندا یارمەیمان بدات خودی خۆمان بە هزرو دەست و هێزوبازوی خۆمانەوە دروست بکەینەوە.
خێرایی ژیانی ئاڵۆز و چرکەساتە خێراکان وادەکەن لە روانگەیەکی ترەوە لە سەرلەبەری ژیان و رەگەزە جەوهەریە بنەڕەتیەکانیەوە بنوارین و بەدەر لە چاوەروانیەکانمان، بینەری ئەو پێشهات و رووداوانە بین، هەرگیز خەیاڵمان بۆیان نەچووە و لە پێشبینیماندا نەبوونە.
هەمیشە حیکایەتی “دەنگ “بە وشەی “بێدەنگی” کۆتایی دێت و وەک دەنگی تەسبیح، بێمافی، بێ ژیانی، بێ حاڵی، بێ بەختی، بێ دۆستی، بێ نیشتیمانی، بێ گوزەرانی و بێ ئۆقرەیی و…هتدی بەدوادابێت. ئەشێ لە رووبەری کۆمەڵگایەی پڕ لە “ بێ”ـیەکاندا، هەمیشە چاوەڕوانی رووداوە چاوەڕوان نەکراوەکان و خاڵە وەرچەرخانەکانی ئەو چرکەساتانە بین، ئەشێ لە ئانوساتێکدا ئاڕاستەی کۆمەڵگاو ژیان بگۆڕن و لە دووریانێکی چارەنوس سازدا یەکلا بکرێتەوە.