لە دونیایەکدا دەژین هەمیشە منێک هەیە لە نێوان دوو هیچ و دونیایەکی هیچ و پڕ لە هیچ و پووچدا، لە تەقەلادایە و رووبەرووی هەژمون و فشاری ئاڵنگاریەکانی هیچەکاندا دەبێتەوە.
ململانێکان وێنای دوو دونیای جیاوازی بیرکردنەوەو دوو یا چەند “ من” ێکی لێکنەچووی دژبەیەکە، لە رووبەرێکی پڕ لە هیچوپووچ و بکەرانێکی هەلپەرەست و بەرژەوەندخوازو هیچ لەبارادانەبووی هیچووپووچدا.
جیاوازی منو تو، دونیای منو تۆ، دیدگای منو تۆ، لە خاڵێک و دووانی بونیادیدا نیە.
وێستگەی هەڵوەستەکردنەکانی من لە وێستگەی تۆ ناچن. گۆشەنیگاو هەڵوێستەکانی من وابەستەی ئەمڕۆو گرێدراوی ئاکارو هەڵوێستەکانی ئێستام نین.
تۆ پەروەردەکراوو بەرهەمی بیرکردنەوەکانی دەرەوەی دونیای بیرکردنەوەی خۆتی.
من هەڵقوڵاوی سیستەمی بیرکردنەوەکانی ناخی خۆم و گرێدراوی پاکێجی ئەزمونەکانی خۆمم، لەو بوارو قۆناغانەی هۆشیارانە و نەترس پێیاندا رۆیشتووم و ئەسپی شەلی خۆم تیایدا تاوداوە.
پانتای هزرو تێڕامانەکانی من پانتایەکی رووبەرفراوان و دەوڵەمەندە بە مەعریفەی باوەڕو حەقایقی سیاسی و کۆمەڵایەتی ئەزمونکراو و هۆشیاری کەڵەکەوەبووی دەرەوەی سیستەمی ئاڵۆزکاوی کۆمەڵگاو هەلومەرج و بکەرەکانی ناویەوە.
زمانی قسەکردن و نوسین و وێناکردن و دەربڕینی دونیای من، زمانێکی هەڵاوێردکراوو بژارکراوە بە هەرچی وشەو ڕستەو دەستەواژەی ناشرینی رووخێنەرو ناشرینە و لەبێژینگدراوە لە هەموو هەوڵەکانی تۆمەت بەشینەوەو تۆمەتبارکردن و ئاڵۆزکاریەکەوە.
پرەنسیپی نووسین و نەریتی دەربڕین لە جیهانی من پاک کراوەتەوە لە وتە سوک و سواوەکانی هەرچی و پەرچیەکانی دونیای ئاڵۆزی سۆشیال مێدیاو کارگەکانی وەبەرهێنان و بەرهەم هێنان و بە بازاڕکردنی دەمشڕی و دەم بەهەراشی و درۆسازی و داهێنانی جنێوفرۆشیەوە. من هەرچی دەمشڕو دەم زێرابە، خستوومنەتە دەرەوەی کایەی ژیانم و باوەڕە کۆمەڵایەتی و ئایینیەکانمەوە.
هەروەک هیچ بەربەستێک لە بەردەم هێزی فانتازیا و خەون و خەیاڵ و هۆنینەوەدانیە، تخوبی بیرکردنەوەو تێڕامن و لێڕامانیش لای من وابەستەو گرێدراوی هیچ کۆت و بەندێکی کولتوری و کۆمەڵایەتی و نەریتی باوی جڤاک و دەرەوەی دونیای بیرکردنەوەکانم نیە .
من هیچ کات نەمویستووە لە دەرەوەی مێژوو و ڕووداوو و چوارچێوەکانی، وێنای کەسایەتی خۆم بکەم...هزری من هەڵگری کۆمەڵێک خۆرافاتی عەقیدی ئەبستراکت و پارامێتری فەلسەفی و سایکۆلۆژی و ناسیۆنالیزمی لە خاچ دراو نیە.. فکرو مەعریفە لای من پێوەر نیە بۆ هەڵسەنگاندنی دۆخی ڕوناکبیری تاک و کومەڵگە و کۆی گشتی دیسکۆرسەکانی ڕامیاری و پەیوەندیە جڤاکیەکان.
من بانگەشەکاری سوسیالیزمی نەتەوەیی و وردو خاش کردنی بونیادگەرایی سەقەت و لە خشتەبەری دواکەوتووانەم...ئاستی هۆشیاری بەرهەمهێنراوم لە بازاری سیاسیەت بازی و بەرژەوەندیخوازی و هەلپەرەستی و مشەخۆری، بەرهەم نەهێناوە، تا بێم و بە نرخێکی گران بە نیشتیمانی بفرۆشمەوەو بانگەشەی نیشتیمان پەروەری بکەم... من هیچ کات خۆم لە کۆ جیا نەکردۆتەوە، بەڵکو ئەوە کۆ بووە نەیویستووە لە ناخی من تێبگات و دەرکم کات.
کۆی گشتی پڕۆسەی ڕووداوەکانی ژیانی ئاوارەیی و بزر کردنی شوناس وای لێکردم، واز لە دۆزینەوەی بەهەشتی نەمری لەم گەردوونە ناسەقامگیرو پڕلە کێشەو ململانێیە بێنم و شەوو ڕۆژ عەودالی دۆزینەوەی ئارامی دەروونی و پاراستنی کەرامەتی ئینسانی و دان نان بە بوونم بم، وەک ئەوەی هەم، لە نێوان دوو هیچدا، نەک وەک ئەوەی دەیانەوێ لە چوارچێوەی کۆمەڵێک بیروباوەری لەرزۆکی بڕوا پێنەکراوو خاڵی لە متمانە و پیرۆزی، دەستەمۆ بکرێم.
من چیتر لە ڕابردوو بە دوای خۆمدا ناگەڕێم و نامەوێ لە ناو دونیای چەمک و فەزای دەسکردی پووچەڵی بێ مانادا خۆم بزر بکەم. بەڵکو لە ئاییندەدا خەریکی بونیادنانی خۆم و ئاراستەی ژیانێکی پڕ لە تەناهی و دوور لە ململانێ و هەڵبەز ودابەزی ڕووداوەکان دەبم و ئاراستەیەکی تر هەڵدەبژێرم.
من بکەرێکی ئازادم لە بیر کردنەوە و بە شێواوی لە دایک نەبوومە، تا شوێن پێی شێواوانی تر بکەوم و هەوڵ بدەم لەوان بچم و وەک ئەوان دیلی هزروبیرو ئایدیا چەقبەستووەکانی ئەوان بم.
من لە هەڵبژاردنی ئاڕاستە و جۆری ژیان و مەعریفە و گرتنی ئاراستەیەکی فکریی دیاری کراوو پچڕاندنی ئەو تەوقە کۆمەڵایەتی و خۆرافە هزریانەی، دەبنە هۆکاری دواکەوتنم لە گۆڕانکاریە خێراکانی ژیان و دابڕاندنم لە هێڵە گشتیەکانی بیرو هزرو باوەڕە سایکۆلۆژیەکانم، ئازادم.
من هەمیشە وا ڕاهاتووم، قێز لە ئاکاری بەدکاری پەت پەتێنی سیاسی و گۆڕینی ئایدیۆلۆژیاو سەرۆک گۆڕین و حزب گۆڕین و سەنگەر گواستنەوەی شەرمهێنەری پڕ لە دەسکەوتە مادیە سەرشۆڕهێنەرەکان بکەمەوە.. فێرکراوم لە پەیوەندیەکانم تا ئە شوێنەی پێم دەکرێ ڕاستگۆو حەقبێژو ڕاست و ڕەوان و بێ گرێ و گۆڵ بم و خۆم لە دەستەگەریە سیاسیە قێزەوەنە کان دوور بگرم، چونکە ئەمانەم هەمیشە لە زاکیرەمدابە هۆکاری پاشکەوتن و دواکەتن و داکەوتن و بە جێ مان و دۆڕان و پەرتەوازەیی و ترازان و دڕدۆنگی و کاڵفامی زانیوە.
من نەهاتبووم سەرلەنوێ چەمکە ئابوری و سیاسی و کۆی گشتی پەیوەندیەکانی نێوان زمان و فکر و ڕۆشنگەری شرۆڤە بکەم و بیاندەمە بەر شنەبای شەن و کەو کردن و دووبارە دایانڕێژمەوە... من نەهاتبووم بونیادو ستراکتۆری کاری سیاسی داڕمێنم و هەمیسان بە پێی بۆچوون و فکر و نۆڕم و پارامێترەکانی خۆم و پڕەنسیپەکانی پلۆرالیزم دایانڕێژمەوە... من بە کۆڵێک ئەزموون و بارێک بۆچوون و دەریایەک لێکچوون و دوور لە تێکچوون و بە پێشینەیەکی نیمچە دەوڵەمەندەوە، هەوڵمدا لە نێوان دوو هیچ و دونیایەکی هیچ و پڕ لە هیچدا، پەراوێزێکی پڕلە هیواو ئومێد دروست بکەم.
بەڵام لە دونیایەکی هیچ و نێوان دوو هیچدا، هەمیشە پانتایەکی بەرتەسک و پەراوێزێک هەیە، پیسخۆرو مشەخۆرانێکی خۆمەلاسدەر لە باراشی مەعریفەی خەڵکانی تر، لە تەڕی ئەخۆن ولە وشکاییش ئەخەون.