دونیای ئێمە پڕیەتی لەو مرۆڤانەی لە ناو خەونی زڕاوو وەهم و پەروەردەی سەقت و تێگەیشتنی هەڵەو پانتای تەسکی فکری و هزری و لە قاڵبدراوی ناشرین، شوناس ودیوە جوانەکەی ئەخلاقیان ون کردووەو وێران کردنی جوانی و دیوە مەعنەوی و مۆڕاڵیەکەی ژیان، بە ئەرکی ژمارە یەکی خۆیان لە قەڵەم ئەدەن.
ئەم جۆرە کاراکتەرە فشۆڵە بوغزاویانە لە لوتکەی داڕمانی ئەخلاق و دڕدۆنگی و سەرلێشێوایدا وەک سەگی هاروگڕ بۆ لەتێک نانی “ گەوادی” و “ سەرشۆڕی”، ئامادەن خۆشیان بفرۆشن و بە داروبەردو بوونەوەرو گیاندارو بێ گیانەوە بوەڕن.
دەمێکە کایەی ژیانی سیاسی و کۆمەڵایەتی مرۆڤی کورد، تەژی ئەو بکەرە دەم زێرابە نەفرەت لێکراوە سەرلێشواوو سوک و بێ نرخانەیە، خوویان بە دەمشڕی و جنێوفرۆشی و سووکایەتی کردنەوە گرتووەو تا بینەقاقایان لە پیسی و پۆخەڵی و گەنی بوونی زێرابی ناخی شێواویاندا نقوم بوونە.
لەدایکبوونی سۆشیال مێدیا بەردەبازێکی گەورەی دونیای فرە رەهەندی زانیاری و خاڵێکی وەرچەرخانی گۆڕانکاریەکی گەورە بوو لە دونیای پەیوەندی کردن و گفتوگۆو ڕاگۆڕینەوە بە یەکەوەبوونەوە. ئەم لە دایک بوونەوە نەک هەر کوالێتی ژیان و ئاستی پەیوەندیەکانی گۆڕی، بەڵکو دەرگایەکی گەورەشی خستە سەرپشت بۆ هەموو ئەو کەس و بکەرە ناخ نەخۆشانەی فرچکیان بە جنێودان و هۆنینەوەی قێزەوەنترین جنێوو دەمشڕی و دروست کردنی گێژاوی ئەخلاقیەوە گرتبوو.
بەداخەوە ئێستاکە دۆخێک هاتووەتە ئاراوە، ئەمان لە چەشنی سەگی هار و بەرەڵاو لغاو پچڕاو، گەر رۆژێک پەلاماری کەسایەتیەک نەدەن و دەمشڕی نەکەن و وەک سەگ پێیدا نەڕشێنەوە، بۆ بەیانی واهەست ئەکەن سێ بەسێ تەڵاقیان کەوتووە.
لە پاڵ ئەمەشدا بیرمان نەچێت کۆمەڵگای کوردی بەداخەوە زەمینەی ئامادەیی ئەم دەمشڕانەی تیایە، ئەگینا ئەم بوونەوەرە داماوانە دەمێک بوو وەک شێرەبەفرینەیەکی درۆیین توابوونەوە.
دۆخی ئەمانە بەمجۆرەیە:
ئەوانەی خوویان بە ژەهراەی کردنی فەزای ژیانی سیاسی و کایەی کۆمەڵایەتیەوە گرتووە و بۆ لەتە نانێک بەم و ئەوەوە ئەوەڕن، تا ئەبەد سەرسەختانە، بێ پەلاماردان و شکاندنی حورمەت و بێ نرخ کردن و قیژەو هاشوهوشی رووبەری مەجازی هەلناکەن.
ئەمان بەردەوام شێواندنی دۆخی سایکۆلۆژیای مرۆڤی کورد و گەرم کردنی بەرەی جەنگی دەستەویەخی مەجازی وشەڕی ئەخلاق و داهێنان لە دەمشڕی، بە ئەرکێکی لە پێشینەو ژمارە یەکی خۆیان لەقەڵەم دەدەن.
جنێودان و سوکایەتی کردن و قسەی بازاڕی، تەنیا زمانی ئاخاوتن و مێتۆدە ناعەقڵانیە قێزەوەنە نەفرەت لێکراوەکەی بەردەستیانە ، وەک کەرەستەیەکی سوک و هەرزان و بەردەستی وێرانکاری کۆمەڵایەتی و سایکۆلۆژی ئینسانی کورد و زیاتر چەقاندنی لە ناو تەنگژەو قەیرانە هەمیشەییەکاندا.
ئەم توێژە تاریکپەرەستە عەقڵ نەخۆشانەی ساڵانێکە لە داڵان و کونج و کەلەبەرە ترسناک و تاریکەکانی سۆشیال مێدیاداو چەند وڵآتێکی ئەوروپی، وەک گورگی هار و سەگی بێ لانەی گڕ، بەم و بەو دەوەڕن و هەموو سنوورێکی ئەخلاقی ، ئایینی و کۆمەڵایەتی و دابونەریتی گفتوگۆ دەبەزێنن، لە هەموو سیفاتێکی ئینسانی و ئەخلاقی جوان داشۆراون. ئەمان وەک بڵێی کەوتوونەتە بەر نەعلەتی مێژوو و کۆمەڵگا، لە عەقڵانیەت و ئینسانیەت داماڵدراون و وەک بوکەشوشەیەکی بێ نرخ و و سۆزانیەکی سوک و هەرزانی بێ عەقڵ و مەعریفەی کۆمەڵایەتیەوە، لەلایەن کەسانێکەوە هان ئەدرێن، لەخۆیان سوکترو بێ نرختر و بێ بەهاترو هیچترن.
دەمشڕە دیارەکانی دونیای سۆشیال مێدیای کوردی کۆمەڵە بەکرێ گیراوێکی دەم زێراب و چەند بوونەوەرێکی رووخاوو داڕماوو داماوو دۆڕاوی سوک و بێ نرخ و دەم بۆگەنن، باکیان بە هیچ کردە و ئاکارێکی قێزەوەنەوە نیە.
کۆمەڵگای کوردی بەهۆی تێپەڕینی بە ناو دەیان قۆناغی جەنگ و کاولکاری و کوشتن و بڕین و گێژاوی سیاسی و ئابوری و دابەشکاریەوە، پێویستی بە بەخۆداچوونەوەیەکی رادیکاڵیە. پێویستی بە پەراوێزخستنی دەمشڕە سوکەکانی رووبەری سۆشیال مێدیاو پاک کردنەوەیەتی لە گشت گەندەڵی هزری و فەسادی فکریەوە. پێویستی بە پەروەردەکردنی نەوەیەکی تازەی هەڵگری سیفاتی جوان و ئەرکوبەرپرسیارەتیە ئەخلاقی و عەقڵانیەکانە. پێویستی بە گۆڕانکاری کردنە لە سەرجەمی ئەو دیوو بوارانەی لە بونیادەوە هەڵتەکێنراون و وا خەریکە داری بەسەر بەردیەوە نامێنێت و شیرازەی خێزان و کۆمەڵگا بەرەو هەڵدێر و هەڵوەشانەوە دەبات.