مانیفێستی شوناسی هەر ئەکتەرێک لە دونیای سیاسەت، کۆمەڵایەتی یا ئایینی، لە هەڵسوکەوت و ئاکارو کردەکانیدا رەنگ ئەداتەوەو بە رونی دەردەکەوێ، نەک لە رێگەی نمایش و ستایش و بەڵێن و پەیمان و قسەو گفت و لفتەکانیەوە.
کایەی ژیان پڕیەتی لەو بکەرو کاراکتەرو ئەکتەرە لاستیکیانەی بە گوێرەی بەرژەوەندی شەخسی و دۆخی کۆمەڵگاو هەلومەرجەکانەوە لە رووبەری کۆمەڵگاو کایەی سیاسیدا دەردەکەون و ئەسپی خۆیان تاو دەدەن و لە بەشێکی گەورەی فەزای سیاسی و کۆمەڵایەتی و مێدیادا خۆیان ئەخەنە نمایشەوە.
لەم رووبەرە فرە رەنگ و فرە ئاڕاستەو فرە دەنگ و بەرژەوەندیەدا، هەموو تایپێک لە مرۆڤ ئەدۆزرێتەوە. فەزای دەرکەوتنی ئەم کاراکتەرانە یا رووبەری گەورەی سۆشیال مێدیایە یا شاشەی کەناڵە تەلەفزیۆنیەکانە.
لەم بازاڕە ئاڵۆزەی سیاسەتدا کۆمەڵێک کاراکتەری دەمامکداری خۆڵەمێشی و جار سێبەر هەن. بکەرە دەمامکدارە خۆڵەمێشیە نمایشکارەکان، شارەزاییەکی باشیان لە چۆنیەتی ستایش و نمایش و خۆدەرخستن و دەرکەوتندا هەیە.
نمایشی ئەم یا ئەوی دەمامکدار، نمایشێکە تایبەت بە نمایشکارێکی فرە شوناس و فرە دەمامکی سیاسی، کە لە رێگای وێنەو رەنگ و دەنگ و دەمامکی جۆراوجۆرەوە مانیفێستی کەسێتی و عەقڵیەت و دیدگاو باری سایکۆلۆجیای تایبەت بە خۆی دەکات و لاری لەوە نیە بە چەندین شێوە دەرکەوێت و رەنگ بگۆڕێ و سەنگەر بگوازێتەوەو مامەڵە بە ئایدیۆلۆژیاوە بکات.
ئەم ئامادەیە لە پێناو چەند دەسکەوتێکدا، رۆژان بکروزێتەوە و شەوانیش بە پەیکێ عەرەق و لە لوتکەی مەستیدا، گاڵتە بە عەقڵی عەوام بکات و بۆ رۆژی دواتر لە بازاڕی سیاسەتدا وەک پاڵەوان دەرکەوێت و ئەمڕۆ بە شانوباڵی ئەمدا هەڵبدات و لە دۆخێکی تردا بە شان و باڵی یەکێکیتر.
رەنگە ئەمجۆرە خۆ نمایشکارە لە رووبەری نمایشە سیاسیەکان و پانتای دیوەخاندا، دوای زەمەنێکی کورت یا درێژ ، ھیچ پەیوەست بوونێکی بە واقعەوە نەمێنێ و دواجار لە یادەوەری بەشە هۆشیارەکەی کۆمەڵگادا وێنای مانیفێستکارێکی سیلیکۆنی بەرژەوەندخوازی فووتێکراوی بۆ بکرێ و بسڕێتەوەو ئەستێرەی بەخت و تەختی ئاوابێ یا هەڵکشێت و گەورە بێ و لە لوتکەدا نیشتەجێ بێت .
خۆنمایشکاری فووتێکراوی سیلیکۆنی ( ساختە) لە دونیایەکی رازاوەیدا بە رووکەش جوان و لە ناخدا ئاڵۆز و لە جوانی خراو، لە دونیایەکی دەسکردی خەیاڵ و جیھانی فانتازیای کامڵی خۆیدا، ئاواتەخوازە ھەوڵی دەسکاری کردنی رادیکاڵانەی جیھانی ئەوانیتریش بدات.
ئەم یا ئەوی مەستی پلەو پۆست و پایە و پارە، رەنگە دوا هەوڵەکانی لە پێناوی پاڵەوان دەرکەوتندا چڕ بکاتەوە. ئەم یا ئەوی بە هەڵپە، ئامادەی هەموو جۆرە قوربانیدانێکە بە پڕەنسیپ و ئایدیۆلۆجیا و رابردوو و مێژووەوە. هەروەک لە خراپترین حاڵەتدا، رەنگە هەوڵی هەڵگێرانەوەی مێژوو بدات و حەقیقەتە هەڵگەڕاوە مێژوویی و دەستکاری کراوەکان وەک فاکت و ئایەتی ئاسمانی و ڕاستی مێژوویی دەست لێنەدراو، بە بەشە یەکپارچە ناهۆشیارەکەی کۆمەڵگا بفرۆشێتەوە.
شەمەندەفەری کایەی ژیان بەردەوامە لەو رێچکەیەی گرتوویەتە بەر. کاتژمێرەکان لە ژماردنی کاتەکان و هەڵبژاردنەکان لە بژارکردن و بژاردنی چەوتی و لاریەکان و هەڵبژاردنی کاراکتەرەکان و هەژماردنی چرکەساتەکان نەکەوتن و بەردەوامن لە تۆمارکردنی ساتەوەختە هەستیارەکان و گۆڕانکاریە جڤاکیەکان.
لە فەزاو دونیایەکی سەیرو ئاڵۆزو پڕلە هەڵبەزو دابەزدا دەژین. شەمەندەفەری رووداوەکان بێ وەستان و بێ سڵەمینەوە لە ژێرکەوتن و سەرکەوتنەکان بەردەوامە لە رێ کردن. بەشێکمان سەردەکەوین و بەشەکەی ترمان دادەبەزین. لەم دونیا ئاڵۆزەدا هەموو شتێک قابیلی کڕین و فرۆشتن و سەوداو مامەڵەو ئاڵوگۆڕە. مرۆڤگەلێک نرخ لەسەر مرۆڤەکانیتردا دادەنێن.
ئەم رووبەرەی کڕین و فرۆشتنە لە بازاڕێکی شێواو دوکانێکی بێ سەرووبەرو بەتاڵ کراو لە سۆزو خۆشەویستی و ڕێزو حورمەت و مرۆڤبوون و پرەنسیپ و ئەخلاق ، تا دێت زیاتر لە قەپانێکی گەورەی سەوداو مامەڵەو بازرگانی و پرۆسەیەکی شاراوەی هەڵسەنگاندنی بەهاو نۆڕمە ئینسانیەکان دەچێت.
لەم بازاڕە ئاڵۆزەدا پێوەرەکان بە پێی دۆخ و هەلومەرج و هەڵکشان وداکشان و بۆرسەی نرخەوە، گۆڕانکاری بەسەر بەهاو نرخیان دادێت و لە گومرگێکی سەرپێی لە کێش دەدرێن و بە پێی کێش و پێگەو جێگەو رێگە و قورساییانەوە، کڕین و فرۆشتنیان پێوە دەکرێ.
مرۆڤ بەرھەمی مێژوو و کولتورو پەروەردەی خێزانی و بەھا نەتەوەیی و نیشتیمانیەکانی خۆیەتی. فرۆشتنی ئەم بەهایانە یەکسانە بە بێ نرخ کردن و لە گەورەیی خستن و فرۆشتنی خودی مرۆڤ خۆیەوە.
بەرهەمهێنانی مرۆڤی بەرپرسیارو هۆشیار وهەڵگری مۆڕاڵ، ئەرک و کردەیەکی سیاسی و ئاکارێکی کۆمەڵایەتی جوان و لۆژیک و ستراتیژێکە بۆ ئاییندەسازی و عەقڵسازی و نیشتیمان سازی. ئەمە ئەرکێکی قورس و هەستیارو گەورەیە و پێویستی بە زەمینەسازی و کەرەستەی مەعنەوی و پلانی وردو عەقڵانی و هەڵسەنگاندن و نرخاندنە.